Вы тут

Смецце ператвараецца ў каштоўную сыравіну. У зборы ДМР лідзіруюць Мінск, Магілёўская, Брэсцкая і Віцебская вобласці


Збор і перапрацоўка другасных матэрыяльных рэсурсаў — ужо даўно грунтоўная галіна эканомікі. І яна ўвесь час развіваецца. Да канца года будзе ўведзена ў эксплуатацыю некалькі аб'ектаў па перапрацоўцы ДМР.


Адна з галоўных задач Мінпрыроды, якая каардынуе работу ўсіх арганізацый у сферы абыходжання з адходамі, — не дапусціць захавання ДМР на палігонах. За дзевяць месяцаў бягучага года тэрытарыяльнымі органамі міністэрства праведзена амаль 4300 абследаванняў аб'ектаў захавання адходаў. Пры гэтым выяўлена 3611 фактаў парушэння правілаў эксплуатацыі такіх аб'ектаў і 1609 фактаў захавання другасных матэрыяльных рэсурсаў. Начальнік упраўлення рэгулявання абыходжання з адходамі Мінпрыроды Максім ТАРАСАЎ паведаміў, што 305 вінаватых асоб прыцягнуты да адміністрацыйнай адказнасці, а фінансавыя санкцыі ў дачыненні да іх склалі 214 тыс. рублёў.

Як станоўчы момант Максім Тарасаў адзначыў, што сёлета былі паўторна выкарыстаны 97 % адходаў гумы, а паперы і кардону — 94 %.

Дырэктар установы «Аператар другасных матэрыяльных рэсурсаў» Наталля ГРЫНЦЭВІЧ таксама расказала, што ўзраслі аб'ёмы збору ўсіх відаў ДМР. У прыватнасці, за тры кварталы бягучага года ў краіне было сабрана 297 тыс. тон адходаў паперы і кардону, адходаў шкла — каля 24 тыс. тон, палімерных адходаў — 12,5 тыс. тон, адходаў электрычнага і электроннага абсталявання — 76 тыс. тон. Насельніцтва актыўна здае адпрацаванае аўтамабільнае масла і зношаныя шыны. Цікава, што траціна ўсіх адходаў збіраецца ў Мінску. Таксама ў зборы ДМР лідзіруюць Магілёўская, Брэсцкая і Віцебская вобласці.

Начальнік упраўлення па абыходжанні з другаснымі матэрыяльнымі рэсурсамі ААТ «Белрэсурсы» — кіруючай кампаніі холдынга «Белрэсурсы» Юлія ХАРКЕВІЧ растлумачыла, што ў нашай краіне восем арганізацый займаюцца зборам ДМР, а чатыры прадпрыемствы — перапрацоўкай. У прыватнасці, у Мінску працуе лінія сартавання змешанага шклабою. Яе праектная магутнасць складае 100 тыс. тон у год. Пакуль што вытворчасць загружана на 90 % ад сваёй магутнасці. Між тым сабекошт вырабаў са шклабою ніжэйшы, чым вырабленых з першасных матэрыялаў. Немалаважна, што ў гэтым выпадку зніжаецца і колькасць выкідаў шкодных рэчываў у атмасфернае паветра.

Адзін з традыцыйных кірункаў работы Белкаапсаюза — збор ДМР. «Для насельніцтва другасныя рэсурсы — гэта смецце, а для спажывецкай кааперацыі і дзяржавы — гэта сыравіна і рэсурсы для загрузкі прадпрыемстваў», — заявіла начальнік упраўлення нарыхтовак Белкаапсаюза Аксана СКІНДЭР. Каб насельніцтва актыўна здавала другасную сыравіну, Белкаапсаюз не толькі павысіў закупачныя цэны, але і правёў вялікую растлумачальную работу. Цяпер у сістэме спажывецкай кааперацыі працуе 710 прыёмна-нарыхтоўчых пунктаў, якія займаюцца нарыхтоўкай другасных відаў сыравіны, гэта значыць, па сутнасці, яны ёсць у крокавай даступнасці. Сёлета Белкаапсаюз закупіў 380 тыс. тон другаснай сыравіны, з іх 90 % — ад насельніцтва. За здадзеныя ДМР людзі атрымалі 115 млн рублёў. Аксана Скіндэр адзначыла, што за апошні час істотна пашырыўся асартымент ДМР. Калі раней здавалі шкло, металалом і паперу, то цяпер дадаліся поліэтылен, адпрацаваныя машыннае масла і электратэхнічнае абсталяванне.

Аб'ёмы збору ДМР можна смела нарошчваць, бо для іх перапрацоўкі з'яўляюцца новыя магчымасці. Да канца года будуць уведзены ў эксплуатацыю завод па перапрацоўцы смецця ў Віцебску, лінія па выкарыстанні RDF-паліва на «Краснасельскбудматэрыялах». Таксама завяршаецца рэканструкцыя патоку папяровай машыны на ААТ «Папяровая фабрыка «Спартак». Нагадаем, што мадэрнізацыя абсталявання на кардонна-папяровым заводзе «Альбярцін» дазволіла павялічыць перапрацоўку макулатуры ў паўтара раза.

Спецыялісты прагназуюць, што аб'ёмы збору і перапрацоўкі макулатуры і шкла павялічацца, бо зніжаецца колькасць упакоўкі з пластыку, а на замену ёй прыходзяць папера і шкло.

Маргарыта ДРАЗДОВА

Фота: wіkіmapіa.org

Выбар рэдакцыі

Грамадства

Эканомім на касметыцы. Як мінімізаваць выдаткі на прыгажосць і маладосць

Эканомім на касметыцы. Як мінімізаваць выдаткі на прыгажосць і маладосць

Како Шанэль сцвярджала, што чым горшыя справы ў жанчыны, тым лепш яна павінна выглядаць.

Грамадства

«Сталінскі праспект мы называлі брадвеем». Як і чым жылі беларускія стылягі

«Сталінскі праспект мы называлі брадвеем». Як і чым жылі беларускія стылягі

Пасля смерці Сталіна «жалезная заслона», якая аддзяляла Савецкі Саюз ад навакольнага свету, прыадчынілася.