Вы тут

Фільм «Урокі фарсі» можна ўбачыць у кінатэатрах краіны


Пракат фільма «Урокі фарсі» стартаваў па гарадах Беларусі на мінулым тыдні. Ён папоўніў шэраг кінематаграфічных прац, прысвечаных тэме Халакосту, але аўтарская растаноўка акцэнтаў у гэтай гісторыі робіць яе непаўторнай і вартай увагі.


Кінастужка з’явілася ў выніку супрацоўніцтва трох краін: Беларусі («Беларусьфільм»), Расіі (Hype Film і LM Media) і Германіі (One Two Films). У аснове сюжэта — гісторыя бельгійца яўрэйскага паходжання Жыля Крэм’е, якога схапілі немцы пры яго спробе перайсці мяжу Швейцарыі. Па дарозе да месца растрэлу герой мяняе апошні бутэрброд на кігу персідскіх казак, а потым за лічаныя хвіліны да смерці крычыць, што ён не яўрэй, а перс. І па неверагоднаму збегу абставін адзін з афіцэраў бліжэйшага канцлагера якраз шукае перса. Мясцовы кухар Клаўс Кох хоча вывучыць персідскую мову, каб пасля вайны пераехаць у Іран, куды ад вайны і нацыстаў збег яго брат, і там адкрыць свой рэстаран. Аднак, замест персідскай мовы палонны вучыць немца неіснуючай мове, якую выдумаў дзеля свайго выратавання. І глядач на працягу ўсяго прагляду назірае, як герой знаходзіцца на мяжы жыцця і смерці. У галоўных ролях — нямецкі акцёр Ларс Айдзінгер і аргенцінец Ноэль Перэс Біскаярт. Першага высока цэняць на радзіме, другі вельмі папулярны ў Францыі і ў Лацінскай Амерыцы. Айдзінгер вядомы прыхільнікам кіно па фільмах «Мацільда», «Вышэйшае грамадства», «Праца без аўтарства» і многіх іншых. Яго калега па здымачнай пляцоўцы Біскаярт раней зняўся ў такіх карцінах як «120 удараў у хвіліну», «Ідэальная будучыня», «Да сустрэчы там, наверсе»... А вось акцёрамі масавых сцэн і эпізодаў сталі беларусы.

Рэжысёрам фільма выступіў Вадзім Перэльман, а сцэнарыстам — Ілля Цофін. У адным з інтэрв’ю перад пачаткам здымак Перэльман адзначыў: «Я зразумеў, што вельмі хачу зняць гэты фільм, калі ўпершыню прачытаў сцэнарый. Гэтая гісторыя кранула мяне сваім драматызмам і паэзіяй. Яна разварочвалася, быццам таленавіты музычны твор: станавілася ўсё грамчэй, яе гучанне нарастала і, напоўненае чыстай эмоцыяй, завяршалася крэшчэнда. Я вельмі рады, што маю магчымасць працаваць з такім матэрыялам. Думаю, у гэтага фільма пра халакост ёсць асаблівая танальнасць, якая адрознівае яго ад многіх іншых. „Урокі фарсі“ — вельмі важная, магутная і драматычная гісторыя, але ў ёй ёсць месца і гумару, аптымізму, надзеі, іроніі, веры ў гуманізм. Я шчыра спадзяюся, што гэта знойдзе свой водгук у гледачоў ва ўсім свеце». Перэльман вядомы такімі працамі як фільм «Дом з пяску і туману», які быў адзначаны трыма намінацыямі на прэмію «Оскар», «Імгненні жыцця», а таксама серыяламі «Попел», «Здрады». Аператар Уладзіслаў Апельянц таксама адметны прафесіянал, які здымаў і ў Міхалкова, і Сярэбрэннікава. За аснову ўзялі апавяданне нямецкага драматурга Вольфгана Кольхаазэ «Вынаходніцтва мовы». Яго аўтар напісаў па матывах рэальных гісторый вязняў канцлагероў, якім удалося выжыць, дзякуючы збегу абставін і асабістай хітрасці і адвазе. Паяднаўшы трагічную гісторыю з камедыйнымі сцэнамі, рэжысёру ўдалося зняць пранізлівы фільм, прысвечаны тэме Халакосту, дзе на першым плане аказаліся не здзекі нацыстаў у канцлагеры, а чалавечнасць, разуменне, шчырасць і праблема ўзаемаадносін паміж людзьмі.

Варта адзначыць, што асноўныя здымкі «Урокаў фарсі» прайшлі на тэрыторыі Беларусі. Многія сцэны здымаліся ў Бабруйску і на натуральнай пляцоўцы «Беларусьфільма».

— Калі гэты праект здымаўся, то нават здымачная група дакладна не ведала да канца, што гэта за праект. Але мы разумели, што рыхтуецца нешта маштабнае, і для яго стварэння задзейнічаны вялікія прафесіяналы з розных краін. Ведаеце, у нас, у Беларусі, здымаецца шмат фільмаў пра Вялікую Айчынную вайну, але гэты праект вельмі адрозніваўся дэталізацыяй. У ім дэманструюцца такія дэталі, якія не сустрэнэш у нашым кіно, таму шмат новага і цікавага даведаліся ў працэсе працы, — распавядае кастынг-дырэктар фільма Юрый Корабаў. — Даведаліся многае пра той час і тых людзей, якія былі ўдзельнікамі падзей. Напрыклад, калі здымалі ў казармах, дзе жылі палонныя, то дэталізавалася нават тое, што людзі спалі на сене. Таксама ўсе нашыўкі на адзенні рабіліся па фотаздымках. Яшчэ ў нас у маштабных сцэнах удзельнічалі сапраўдныя яўрэі. Мы аб’язджалі сінагогі Беларусі і прывозілі людзей на здымкі. І мы, кіношнікі, хоць і звяртаем на эмоцыі ўвагу не ў першую чаргу, бо нам важней, якая выбудоўваецца карціна ў кадры, у некаторых момантах былі пад моцнымі ўражаннямі. Падчас таго ж эпізода, калі яўрэяў строілі і прымушалі чытаць свае нумары па-нямецку, а хто не мог, таго растрэльвалі, адчуванні былі жудасныя. Бо, назіраючы за ўсім гэтым збоку і пад суправаджэнне выстралаў, цяжка ўспрымаць, быццам нічога не адбываецца.

Сусветная прэм’ера фільма адбылася на Берлінскім кінафестывалі, дзе публіка сустрэла карціну доўгімі авацыямі. Таксама «Урокі фарсі» ўвайшоў у праграму спецыяльных паказаў Маскоўскага кінафестывалю. У пракаце за мяжой фільм плануюць паказаць у краінах Еўропы, ЗША, Лацінскай Амерыцы. Беларускія гледачы змогуць убачыць кінастужку ў кінатэатрах Гродна, Гомеля, Барысава, Магілёва, Салігорска, Ліды і іншых гарадах да 25 лістапада. Паколькі «Урокі фарсі» здымалі на нямецкай мове (сцэнарый пісалі на англійскай), то для пракату ён перакладзены на рускую мову. Шукайце ў афішах свайго горада і далучайцеся да прагляду добрага кіно.

Алена ДРАПКО

Фота: kino.mail.ru, kino-teatr.ru

Загаловак у газеце: Кінагісторыя з асаблівай танальнасцю

Выбар рэдакцыі

Грамадства

«Да штыка ён пяро прыраўняў». Узгадваем ваеннага карэспандэнта Канстанціна Сіманава

«Да штыка ён пяро прыраўняў». Узгадваем ваеннага карэспандэнта Канстанціна Сіманава

28 лістапада 2020 года спаўняецца 105 гадоў з дня нараджэння вядомага рускага пісьменніка, ваеннага карэспандэнта і журналіста Канстанціна Сіманава. 

Грамадства

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

«Калі б не сям'я Абрамукоў, наш род перастаў бы існаваць яшчэ ў 1941 годзе». Расіянка з Ніжняга Ноўгарада знайшла ў беларускай вёсцы сваякоў

І аднавяскоўцаў людзей, якія ў час вайны ратавалі сям'ю яе бабулі, жонкі афіцэра Чырвонай Арміі.

Спорт

«Вікторыя», якая робіць з Гродна баскетбольную сталіцу

«Вікторыя», якая робіць з Гродна баскетбольную сталіцу

Гродна — горад з багатай не толькі культурнай, але і баскетбольнай гісторыяй. 

Грамадства

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

У Гродне жыхары кватэр адмовіліся падчас капітальнага рамонту здымаць аздабленне з балконаў. На іх падалі ў суд

Такога кшталту справа ў судзе Кастрычнiцкага раёна Гродна разглядаецца ўпершыню.