Вы тут

Аксана Спрынчан. Радзюжка


* * *

неба сягнуць

ды не стаць

небасягам

хатай застацца

дзе на покуці

беларускі абраз

і ручнік

і здымкі на сцяне

яшчэ не фэйсбучныя

а побач кветкі красуюць

вяртаюць неба

дахаты

 

* * *

калі не магу ісці

і падаю на дарозе

што кіруе да той

на якой знайшлі

Язэпа Драздовіча

мяне ліжа ліс

уздымае хваста

і пярэднюю

правую лапку

і вяртаецца

ў свой дывановы рай

не забіраючы

мяне з сабой

не адпускае

і ў пекла

 

* * *

радзюжку

з ложка здыму

складу

што мінула

гарою

крыж-накрыж

ражкі звяжу

ускіну на плечы

няхай

цяплынь ратуе

ад болю

 

* * *

побач п’юць сок

майго ўлюбёнага дуба

шэршань і мятлік

і адно дзякуючы

красе адмірала

адмірае памкненне

забіць

 

* * *

грушы з дзедавага саду

і яблыкі з мамінага саду

някрамнага выгляду

невядомых гатункаў

без ніякай хіміятэрапіі

і ніводнага продажу

ведама ж, райскія

асвечаныя

Крэўным Храмам

амаль паўстагоддзя

пад дрэвамі роднымі пахаджаю

і ні грушка, ні яблычак

не выцялі мяне

а толькі клічуць пакланіцца

да зямлі

а толькі ўздымаюць

у неба

 

* * *

мой кастрычнік

вужына-сонечны

і лякае

і свеціць

плямкамі золата

і таемна ў мяне

ўзіраецца

доўга-доўга

хваляй лёгкаю

коціць жыццё

нязлоўнае

недзе спяць ужо

не мае вужы

ад Узвіжання

да чужой вясны

 

* * *

зіма

выбельвае

мае ногі

ад роднай зямелькі

забірае

пясчынку

за пясчынкай

і сыходзіць

задаволеная здабыткам

на залатых капальнях

каб вярнуцца

 

* * *

над Лунінцам

Вялікі Воз

над Луцкам

Воз Чумацкі

і той, і той

вязе мой лёс р

астрэсвае

на часткі

а як я з воза –

дык лягчэй

таму

хто возіць

шчасце

 

№ 3 «Полымя», 2020

Выбар рэдакцыі

У свеце

Чарназём з дастаўкай. Чаму ва Украіне зямлю выставілі на продаж?

Чарназём з дастаўкай. Чаму ва Украіне зямлю выставілі на продаж?

Набываць землі сельгаспрызначэння замежнікам па-ранейшаму не дазваляецца.

Культура

Які будзе каралеўскі палац у Старым замку?

Які будзе каралеўскі палац у Старым замку?

Гэта другая чарга рэстаўрацыі.

Грамадства

Вучоба анлайн і афлайн. Як лічбавыя тэхналогіі дапамагаюць спраўляцца з выклікамі часу?

Вучоба анлайн і афлайн. Як лічбавыя тэхналогіі дапамагаюць спраўляцца з выклікамі часу?

Пасля пандэміі каранавіруса адукацыя ўжо ніколі не будзе ранейшая.