Вы тут

Лукашэнка: У сучасных умовах саюзніцтва набывае ўсё больш важкі сэнс


Выступаючы на сесіі Савета калектыўнай бяспекі АДКБ Прэзідэнт Беларусі Аляксандр Лукашэнка звярнуў увагу на няпростыя ўмовы, у якіх ажыццяўляецца дзейнасць арганізацыі.


«Мы выразна бачым павелічэнне сістэмных мерапрыемстваў ваеннага характару ў Польшчы і ў дзяржавах Балтыі»

«Значнай дэфармацыі падвяргаюцца сістэмы міжнародных адносін і механізмы кантролю над узбраеннямі. У зносінах усё больш дамінуе канфрантацыйная рыторыка. Свет у чарговы раз стаіць на парозе развязвання некантралюемай гонкі ўзбраенняў, — пералічыў ён. — Абвастраюцца самыя небяспечныя з’явы, а менавіта ваеннае супрацьстаянне паміж сусветнымі цэнтрамі сілы».

Сур’ёзную занепакоенасць выказаў Прэзідэнт Беларусі з-за нарошчвання ваеннай прысутнасці ЗША і НАТА каля заходніх граніц АДКБ.

«У першую чаргу гаворка ідзе аб размяшчэнні дадатковага амерыканскага кантынгенту ў Польшчы і яе планы па стварэнні новых аб’ектаў ваеннай інфраструктуры. Мы выразна бачым павелічэнне сістэмных мерапрыемстваў ваеннага характару на тэрыторыі гэтай краіны і ў дзяржавах Балтыі», — заявіў Аляксандр Лукашэнка.

Па яго словах, пад прыцэлам ваеннай актыўнасці знаходзяцца не толькі нацыянальныя інтарэсы Рэспублікі Беларусь. У дадзеным кантэксце, лічыць кіраўнік беларускай дзяржавы, варта разглядаць і заявы НАТА аб распрацоўцы новай стратэгічнай канцэпцыі.

«Мяркую, ужо ўсім ясна, супраць каго і чаго яна будзе накіравана», — заўважыў Прэзідэнт.

Беларускі лідар спыніўся на тэме санкцый. Ён заўважыў, што такія міжнародна-прававыя меры павінны прымяняцца ў выключных выпадках і толькі для вырашэння найважнейшых пытанняў забеспячэння міру і бяспекі, але сталі штодзённай практыкай.


«Універсальны баланс паміж грамадзянскімі свабодамі і інтарэсамі нацыянальнай бяспекі ў заходнім грамадстве так і не знойдзены»

Пандэмія СOVID-19 не толькі ўскладніла праблемы міжнароднага ўзаемадзеяння, але і справакавала абвастрэнне сацыяльных канфліктаў, дадаў Аляксандр Лукашэнка. 

«Ужо зразумела, што гэта не спантанная праява незадаволенасці, як нам імкнуцца паднесці ў СМІ. Міжнародны парадак скочваецца ў бок так званага кіраванага хаосу. У наяўнасці добра прадуманая і зрэжысіраваная дзейнасць глабальных гульцоў, якія часам не лічацца ні з чым, нават з інтарэсамі ўласных народаў», — упэўнены Прэзідэнт. 

У якасці прыкладу ён прывёў беспарадкі ў ЗША і краінах Еўропы, якія да апошняга часу лічыліся ледзь не ўзорам дэмакратыі.

«Відавочна, што ўніверсальны баланс паміж грамадзянскімі свабодамі і інтарэсамі нацыянальнай бяспекі ў заходнім грамадстве так і не знойдзены, — зрабіў вынік кіраўнік Беларусі. — Мабыць, менавіта з гэтага вынікае ўсё больш бесцырымоннае навязванне сусветнай грамадскай свядомасці падвойных стандартаў».

З аднаго боку надзвычай жорсткая рэакцыя заходніх уладаў на пратэсты і ў цэлым непапулярная дзяржаўная палітыка падаюцца як аб’ектыўная неабходнасць, з другога — меры іншых краін па «забеспячэнні стабільнага развіцця, падтрымання правапарадку і законнасці» выстаўляюцца як дыктатура і дэспатызм, патлумачыў свой тэзіс Прэзідэнт. 


«Беларусь адчувае на сабе адкрытае ўмяшальніцтва ва ўнутраныя справы, у тым ліку праз правакаванне грамадзянскай незадаволенасці»

«Ва ўмовах гэтых нераўнапраўных сістэм каардынат маніпуліраванне людзьмі, прымяненне гібрыдных уздзеянняў і тэхналогій каляровых рэвалюцый сталі звычайнай з’явай, — дадаў ён. — Менавіта таму Беларусь у 2020 годзе адчувае на сабе адкрытае ўмяшальніцтва ва ўнутраныя справы, у тым ліку праз правакаванне грамадзянскай незадаволенасці. Нам прама прапануецца памяняць уладу, законы і сацыяльныя арыенціры. У адваротным выпадку пагражаюць задушыць санкцыямі, разбурыць эканоміку і інфраструктуру, змяніць маральныя асновы нашага грамадства. Цяпер ужо няма сумненняў, што на коне стаялі і да гэтага часу стаяць грамадзянскі мір і цэласнасць нашай Беларусі».

Асаблівую ўвагу Прэзідэнт звярнуў на паводзіны Польшчы і краін Балтыі ў адносінах да Беларусі. 

«Мы выразна бачым, што іх дзеянні забяспечваюць рэалізацыю ўласных інтарэсаў і накіраваны на павышэнне сваёй значнасці ў Еўрасаюзе, — падкрэсліў Аляксандр Лукашэнка. — І я хачу, каб пра нявартыя і бессаромныя паводзіны палітыкаў пачулі простыя людзі гэтых суседніх з намі краін».


«Важна не толькі своечасова выяўляць новыя выклікі і пагрозы, але і запускаць механізмы іх адбіцця»

У цяперашні час многія зразумелі, што свет не будзе такім, якім ён быў год ці два таму, сказаў кіраўнік беларускай дзяржавы. 

«Аднак ва ўмовах паўсюднай канфліктнасці і з новымі хваробамі, якія на нас абрынуліся, нам трэба будзе жыць і развівацца. Гадаваць дзяцей, радавацца дабру і адзін аднаму. Любымі спосабамі захоўваць тую тонкую і далікатную грань, якая аддзяляе чалавецтва ад катастрофы», — дадаў ён.
Сёння ад членаў АДКБ з улікам дынамікі выклікаў і пагроз патрабуецца не проста падтрыманне існуючага ўзаемадзеяння, але і яго нарошчванне, лічыць Прэзідэнт. 

«У сучасных умовах саюзніцтва набывае ўсё больш важкі сэнс. АДКБ павінна паказаць сваё ўменне інтэнсіўна, надзейна працаваць у палітычным, ваенным, інфармацыйным вымярэннях, а таксама эфектыўна супрацьстаяць тэрарызму і экстрэмізму, незаконнаму абароту наркотыкаў, дзейнічаць на апярэджанне і пазбягаць сацыяльных бедстваў», — падкрэсліў беларускі лідар.

Важна не толькі своечасова выяўляць новыя выклікі і пагрозы, але і запускаць механізмы іх адбіцця, пры гэтым максімальна збліжаць пазіцыі дзяржаў-членаў па калектыўным рэагаванні, падсумаваў Аляксандр Лукашэнка і выказаў меркаванне, што гэта ў членаў АДКБ атрымаецца.

«Сітуацыя ў свеце такая, што мы абавязкова павінны сустрэцца і з улікам урокаў апошніх падзей абмеркаваць перспектывы нашых дзеянняў»

Пад канец свайго выступлення Прэзідэнт Беларусі заклікаў сваіх калег знайсці магчымасць для вочнай сустрэчы ў больш шырокім фармаце — з удзелам не толькі членаў АДКБ, але і іншых краін, якія адчуюць небяспеку цяперашняга часу.

«Сітуацыя ў свеце такая, што мы абавязкова павінны сустрэцца і з улікам урокаў апошніх падзей абмеркаваць перспектывы нашых дзеянняў, каб гэтага не дапусціць наперад ва ўсіх краінах. Нікому нельга самазаспакойвацца ў дадзенай сітуацыі, думаю, усе з нас гэта разумеюць», — сказаў ён. 

Пуцін: Беларускаму народу хопіць палітычнай сталасці для таго, каб вырашыць усе свае ўнутраныя пытанні самім, без усякага ціску і ўмяшальніцтва звонку
Прэзідэнт Расіі Уладзімір Пуцін пагадзіўся, што сітуацыя ў Беларусі выклікае занепакоенасць, і не столькі ў сувязі з пратэсным рухам, які там падняўся, колькі з-за ўмяшальніцтва звонку, фінансавай і палітычнай падтрымкі гэтага руху з-за мяжы. 

«Трэба даць, нарэшце, народам  самім разабрацца з пытаннямі, якія для іх прадстаўляюць асаблівы інтарэс. Мы бачылі, як адбывалася развіццё падзей, скажам, у арабскім свеце, падчас так званай “арабскай вясны”, — сказаў ён. — Да чаго гэта прывяло? Я ўжо не кажу пра ўсякія іншыя каляровыя рэвалюцыі. Заўсёды тлумачаць лепшымі намерамі. А як вядома, добрымі намерамі выбрукавана дарога ў пекла».

Расійскі прэзідэнт выказаў спадзяванне, што беларускаму народу хопіць палітычнай сталасці для таго, каб «вырашыць усе свае ўнутраныя пытанні самім, без усякага ціску і ўмяшальніцтва звонку».

«Не сумняваюся ніколькі, што атрымаецца, у тым ліку, і ўлічваючы палітычны досвед Прэзідэнта Беларусі», — дадаў ён. 

«Каляровыя рэвалюцыі, якія разгарнуліся ў шэрагу дзяржаў, гэта ніякія не каляровыя рэвалюцыі, мы бачым па Беларусі, гэта — звычайны мяцеж, — падкрэсліў Аляксандр Лукашэнка. — Рэвалюцыя — гэта калі ёсць аснова для рэвалюцыі, мы ўсе з вамі вывучалі. Калі нізы не хочуць, вярхі не могуць і гэтак далей. І калі ёсць рэвалюцыянеры».

У Беларусі, як і ў іншых краінах — членах АДКБ, няма рэвалюцыянераў, лічыць кіраўнік дзяржавы.

«Усе рэвалюцыянеры хочуць жыць добра і пажадана за чужы кошт. І калі з імі пачынаеш размаўляць на іх мове, яны хутка пераўтвараюцца з так званых рэвалюцыянераў у бежанцаў палітычных», — дадаў ён.

Адносна падзей у нашай краіне, справа, перакананы лідар, у тэрытарыяльных прэтэнзіях Польшчы да Беларусі.

Ён прывёў адпаведную цытату, якую раней агучваў на сустрэчы з калектывам 6-й гарадской клінічнай бальніцы Мінска. Размова пра выказванні польскіх палітыкаў, у якіх заяўляецца пра «гістарычную прыналежнасць беларускіх земляў Польшчы».

«Гэта заяўляецца ўжо ў адкрытым рэжыме, — абурыўся Аляксандр Лукашэнка. — Слухайце, ці магу я як Прэзідэнт, і беларусы з гэтым пагадзіцца? Аказваецца там, дзе мы сёння жывём, нам не належаць гэтыя землі. Ясна — каму. У гэтым кірунку і дзейнічаюць».

Да таго ж, беларускаму кіраўніцтву стала дакладна вядома пра стварэнне ваеннай групоўкі НАТА для захопу гэтых земляў, заявіў Прэзідэнт Беларусі. Яшчэ адзін намер заходніх палітыкаў — стварэнне «санітарнага поясу» паміж Еўрасаюзам і Расіяй, дадаў ён.

«Гэта даўняя мара, гэта мэты, якія пасля распаду Саюза ў сярэдзіне 90-х не ўдалося рэалізаваць, — напомніў беларускі лідар. — Хто-хто, але мы з Прэзідэнтам Расіі гэта вельмі добра разумеем. Падзеі ў Беларусі, адкрыта ўжо кажуць, — гэта трамплін для ціску на Расійскую Федэрацыю».

Аляксандр Лукашэнка заўважыў, што не варта думаць, што краіны — члены АДКБ, якія знаходзяцца ў іншых рэгіёнах, у большай бяспецы.

«Нават пра падзеі ва Украіне думалі: „Гэта не ў нас“. Не паспееце азірнуцца, як гэта будзе ў вас, — папярэдзіў калег Прэзідэнт Беларусі. — Таму нам трэба працаваць супраць гэтага зараз. ».

Прэзідэнт падкрэсліў: «Нам як ніколі, пра што казалі ўсе, трэба быць сёння разам. Адзінымі. Але давайце шчыра будзем казаць, што аснова нашага адзінства сёння — эканоміка. Будзем мы тут бачыць адзін аднаго, у эканоміцы, як мы даўно паставілі перад сабой мэту ў рамках Еўразійскага эканамічнага саюзу, значыць, захаваемся. Не — прэзідэнт Расіі дакладна пра гэта сказаў, па адным разбяруць і выкарыстаюць».

Вольга МЯДЗВЕДЗЕВА

Фота БелТА

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.