«Цаню любімую газету за разважлівасць, памяркоўнасць»

Добры дзень, сяброўка «Звязда»!

Піша табе пастаянная чытачка і аднадумца. З табой я пасябравала яшчэ ў пачатку 90-х гадоў мінулага стагоддзя. Люблю цябе за тое, што на першых старонках нясеш пазітыў. Героямі фота на першай старонцы з'яўляюцца простыя людзі. Гэта не абавязкова «калгаснікі». Ёсць сярод іх і айцішнікі, і ўрачы, і настаўнікі, і вучоныя, і рамеснікі. Вельмі паважаю «Звязду» за тое, што ніколі не здраджвала беларускай мове. Цаню любімую газету за разважлівасць, памяркоўнасць. Вучуся ў сяброўкі гэтым рысам.

Хачу праз газету «Звязда» выказаць словы падзякі дэпутату Палаты прадстаўнікоў Нацыянальнага сходу Рэспублікі Беларусь па Пухавіцкай выбарчай акрузе № 65 Алегу Белаконеву за падтрымку і дапамогу членам спажывецкага кааператыва «ГазБудЗалужжа» па газіфікацыі аграгарадка Залужжа Старадарожскага раёна. Мы ўжо і надзею страцілі, што будзем з газам, што ўкладзеныя ўласныя сродкі не прападуць, але дзякуючы настойлівасці шаноўнага Алега Аляксандравіча цывілізацыя прыйшла ў наш глухі кут.

Такім чынам улада паказала свой дзейсны падыход не на словах, а на справе. Жадаю шаноўнаму дэпутату моцнага здароўя, вялікага цярпення ў наш няпросты час.

З павагай да сваёй любімай газеты «Звязда» яе пастаянная падпісчыца

Валянціна Заяц