Вы тут

Выкладчык Аляксей Зайцаў: І сілы, і поспех прыходзяць ад імкнення рэалізаваць талент на карысць свайго народа


Малады гомельскі навуковец, старшы выкладчык кафедры агульнай фізікі Гомельскага дзяржуніверсітэта імя Ф. Скарыны, пераможца 9-га сезона Рэспубліканскага конкурсу «100 ідэй для Беларусі» Аляксей Зайцаў — адзін з дэлегатаў Гомельшчыны на VI Усебеларускі народны сход, вылучаны ад Беларускага рэспубліканскага саюза моладзі.


Летась Аляксей Зайцаў скончыў аспірантуру і атрымаў дыплом даследчыка. Ён — педагог дадатковай адукацыі вышэйшай катэгорыі. Для заняткаў са школьнікамі стварыў гурток робататэхнікі. Пяць гадоў запар прымаў удзел у рэспубліканскім конкурсе «100 ідэй для Беларусі» — прэзентаваў праекты па энергазберажэнні, экалогіі і медыцыне. У рэспубліканскім фінале 8-га сезону конкурсу інавацый прадставіў свой «Хутар Мёбіуса». Гэта праект па стварэнні аўтаномнай станцыі для ўкаранення на фермерскіх і сельскагаспадарчых участках. Яе сутнасць — назапашаная энергія сонца і ветру выкарыстоўваецца для паліву, збору метэаралагічных дадзеных, кантролю за станам сельгаскультур і іх абароны ад шкоднікаў. Пасля гэта работа даследчыка была ацэненая сярэбраным медалём у фінале V Міжнароднага конкурсу «Інтэрнэт +» па інавацыях і прадпрымальніцтве сярод студэнтаў і выпускнікоў ВНУ, які праходзіў у Хенджоў (КНР).

Аляксей Зайцаў — фіналіст стартап-тура Фонду «Сколкава» ў Мінску, актыўны ўдзельнік рэспубліканскага праекта «Разам» і пераможца 9-га сезона Рэспубліканскага конкурсу «100 ідэй для Беларусі». Ён — стваральнік уласнай лабараторыі інавацыйных праектаў. Удзельнік Усебеларускага народнага сходу ад Гомельшчыны лічыць вельмі важным, што на форуме ёсць магчымасць данесці сваю грамадзянскую пазіцыю.

— Наша моладзь сёння інтэгруецца ў такі перспектыўны кірунак, як інавацыйнае развіццё краіны. Упэўнены, што галоўным пасылам такой дзейнасці не павінна быць ідэя дзеля ідэі, якую можна «найлепш прадаць» і выйграць асабіста фінансава. І сілы на складаным шляху і поспех прыходзяць ад імкнення рэалізаваць талент на карысць свайго народа, сваёй краіны, зрабіць асабісты ўнёсак у навукова-тэхналагічны патэнцыял роднай Беларусі, — адзначыў Аляксей Зайцаў.

Як прадстаўнік моладзі, гамяльчанін на Усебеларускім народным сходзе хацеў бы ўзняць пытанне інфармацыйнай падтрымкі і каардынацыйнай работы з творчай моладдзю, якая мае свае распрацоўкі.

— Як удзельнік шэрагу конкурсаў інавацыйных праектаў адзначу, што часам у такой рабоце бракуе імкнення да канчатковай рэалізацыі «прадукту», не хапае дакладнага празрыстага механізму ўзаемадзеяння творчай моладзі з адміністрацыямі раёнаў, дзе жывуць і «крэатывяць» гэтыя маладыя людзі. Важна, каб пасля конкурсаў, дзе вызначаюцца лепшыя ідэі працягвалася курыраванне праектаў кампетэнтнымі спецыялістамі, вялася сталая работа па прасоўванні перспектыўных інавацый, — лічыць Аляксей Зайцаў.

Малады гомельскі навуковец выступае за стварэнне дзяржаўнай структуры — адмысловага банка інавацый. Гэта дазволіць не дапусціць «уцечкі мазгоў», падтрымаць маладых наватараў, якім на пачатку дзейнасці не хапае ведаў і навыкаў, каб прасоўваць свой праект, прыцягнуць інвестара да яго рэалізацыі, часта не хапае нязначнай фінансавай дапамогі.

— Лічу, што вельмі падтрымае маладых творцаў праходжанне стажыроўкі альбо практыкі па павышэнні свайго патэнцыялу. Бо банальна не ўсе могуць адразу стаць бізнес-аналітыкамі, узяць і самастойна з нуля выцягнуць праект. У нас шмат маладых людзей, якія ў тэхнічным плане развітыя, але слабыя ў плане менавіта рэалізацыі сваёй ідэі. Здараецца, апускаюць рукі, губляюцца, пасля конкурсаў распрацовак з імі не заўсёды нават падтрымліваецца сувязь. Калі гэту работу рэгуляваць на дзяржаўным узроўні, гэта будзе стымуляваць цікавасць студэнтаў ВНУ да інавацый і прадпрымальніцтва, а наша краіна захавае для свайго навукова-тэхналагічнага патэнцыялу лепшыя ідэі, — упэўнены дэлегат VI Усебеларускага народнага сходу Аляксей Зайцаў.

Наталля КАПРЫЛЕНКА

Фота з архіва Аляксея ЗАЙЦАВА

Выбар рэдакцыі

У свеце

Каменданцкія часы. Чым падаграецца глабальная пратэсная хваля?

Каменданцкія часы. Чым падаграецца глабальная пратэсная хваля?

Людзі стаміліся ад лакдаўну і беспрацоўя і выходзяць на пратэсты, а надзея перамагчы пандэмію ўсеагульнай вакцынацыяй, падобна, растае на вачах: прэпараты па-ранейшаму недаступныя ўсім ахвотным і ў найбліжэйшы час сітуацыя наўрад ці зменіцца.

Грамадства

«Тут быў...» Што пісалі пяцьсот гадоў таму на сценах і камянях

«Тут быў...» Што пісалі пяцьсот гадоў таму на сценах і камянях

Іна Калечыц — першы і пакуль адзіны спецыяліст у Беларусі, які займаецца эпіграфікай.

Культура

Яго псеўданім быў нават запісаны ў пашпарце. Некалькі гісторый пра творы вядомага сатырыка Кандрата Крапіву

Яго псеўданім быў нават запісаны ў пашпарце. Некалькі гісторый пра творы вядомага сатырыка Кандрата Крапіву

«Хто сустрэўся быў са мною, Дакрануўся раз ці два, Дык той ведае ўжо, хто я: