«Камволь» плануе пастаўляць жаночую вопратку ў Расію і Украіну

ААТ «Камволь» плануе пастаўляць жаночую вопратку ў Расію і Украіну, паведамілі БЕЛТА ў прэс-службе канцэрна «Беллегпрам».

Старшыня «Беллегпрама» Таццяна Лугіна наведала ААТ «Камволь», дзе азнаёмілася са стратэгіяй развіцця прадпрыемства на бліжэйшы год.

Адным з драйвераў росту ААТ «Камволь» бачыцца рэалізацыя гатовых вырабаў з тканін ўласнай вытворчасці жаночага асартыменту. «У другім паўгоддзі 2020 года прадпрыемства выпусціла ў продаж шырокую лінейку жаночага адзення, больш за 550 адзінак якой было рэалізавана, — адзначылі ў прэс-службе. — У цяперашні момант калекцыя прадаецца праз сталічныя мультыбрэндавыя крамы і ўласныя гандлёвыя аб’екты ў Мінску і Брэсце. У бягучым годзе плануецца адкрыццё яшчэ двух магазінаў у сталіцы, а таксама інтэрнэт-крамы. Акрамя таго, на прадпрыемстве маюць намер пастаўляць гатовае адзенне дробным оптам у Расію, Украіну і іншыя краіны».

У завяршэнне візіту кіраўнік канцэрна пагутарыла з работнікамі «Камволя», асобна сустрэлася з маладымі спецыялістамі.