Вы тут

Абмеркавалі выдавецкія рэаліі і перспектывы ў Саюзнай дзяржаве


Выдавецкія рэаліі і перспектывы ў Саюзнай дзяржаве абмеркавалі напярэдадні Дня яднання народаў Беларусі і Расіі, што адзначаецца 2 красавіка, падчас сустрэчы прадстаўнікоў Пастаяннага камітэта Саюзнай дзяржавы і беларускіх выдавецтваў з журналістамі. У ходзе размовы згадалі яркія выдавецкія праекты, якія ўжо рэалізаваны, і тыя, што чакаюць свайго ўвасаблення.


— Выдавецкая дзейнасць вельмі важная сфера для Пастаяннага камітэта Саюзнай дзяржавы, паколькі дазваляе акумуліраваць і канцэнтраваць тыя напрамкі і моманты, якія з’яўляюцца найбольш актуальнымі ў пэўныя перыяды інтэграцыйнага супрацоўніцтва, рэалізоўваючы іх у друкаваных выданнях. Традыцыйна ў нас у выдавецкай дзейнасці трэнды і напрамкі — гэта нарматыўныя, прававыя дакументы Саюзнай дзяржавы, паколькі мы з’яўляемся выканаўчым органам, матэрыялы, што адлюстроўваюць ход праграм і іх рэалізацыі ў Саюзнай дзяржаве. Тут мы карыстаемся магчымасцямі перыядычных СМІ. Што тычыцца рэалізацыі буйных сумесных праектаў з беларускімі выдавецтвамі, то тут заўсёды заўважны быў іх прафесіяналізм,  гатоўнасць працаваць нават у форс-мажорных абставінах, дэманструючы тэхнічны і творчы патэнцыял, — адзначыла кансультант прадстаўніцтва Пастаяннага камітэта Саюзнай дзяржавы ў Мінску Наталля Конанава.

Так, вынікам цеснага і плённага супрацоўніцтва стала з’яўленне выданняў, сярод якіх кнігі «Крыніцы памяці», «Мустай Карым. Доўгае-доўгае дзяцінства», «Адрасы рускай літаратуры ў Беларусі. Адрасы беларускай літаратуры ў Расіі» і многія іншыя. Таксама варта згадаць выданне альманаху па выніках конкурсу маладых літаратараў «Мост дружбы», які сёлета выйдзе ў пяты раз. Гэтае выданне — не толькі добрая магчымасць для маладых аўтараў апублікаваць свае творы, але часам і перспектыва быць заўважанымі іншымі выдаўцамі. У ім творы маладых пісьменнікаў перакладаюцца з рускай мовы на беларускую і наадварот, і друкуюцца ў двух варыянтах. Альманах выпускаецца раз на два гады, бо і творчае спаборніцтва праводзіцца з такой жа перыядычнасцю…

— Кнігі, якія выдаюцца па праграме Пастаяннага камітэта Саюзнай дзяржавы Беларусі і Расіі — гэта дастаткова складаная і шматгранная бібліятэка, якая сфарміравалася за апошнія гады. Яна звязана і з пытаннямі нашага агульнага гістарычнага развіцця, з пытаннямі грамадска-палітычнай праблематыкі і з той літаратурай, рознымі кірункамі ў нацыянальных культурах Беларусі і Расіі, якія выклікаюць цікавасць, — падзяліўся дырэктар — галоўны рэдактар Выдавецкага дома «Звязда» Алесь Карлюкевіч. — У нас выходзяць кнігі звязаныя з тэмай памяці пра Вялікую Айчынную вайну, актыўна прадстаўляем літаратуру народаў Расіі і ў такіх праектах, як, напрыклад, альманах «Сугучча», дзе прадстаўлены сучасныя празаікі і паэты… Спадзяемся, што і ў далейшым наша супрацоўніцтва будзе працягнута.

Што тычыцца нашых планаў на бягучы год у выдавецкім сектары, якія будуць рэалізаваны пры падтрымцы Пастаяннага камітэта Саюзнай дзяржавы, то вядзецца праца над падрыхтоўкай кнігі «Да Іллі Рэпіна ў Здраўнёва», над альбомам прысвечаным 30-гадоваму юбілею фестывалю «Славянскі базар у Віцебску», а таксама свет убачыць кніга пра Максіма Багдановіча. Апошняя, дарэчы, з’яўляецца праектам выдавецтва «Мастацкая літаратура», з якім яно перамагло ў ходзе конкурснага адбору. Як акрэсліў канцэпцыю будучага выдання галоўны рэдактар «Мастацкай літаратуры» Віктар Шніп, у ім будуць змешчаны творы класіка, успаміны пра яго родных, сяброў і знаёмых, артыкулы пра яго на рускай і беларускай мовах.

Алена ДРАПКО

Прэв’ю: pixabay.com

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».