Заказаць дадому сантэхніка ў зручны для жыхара час. Даведацца праз вайбер, калі спецыялісты справяцца з аварыяй. Пракантраляваць, дзе находзіцца смеццявоз. Усё гэта і шмат што іншае, мяркуецца, змогуць неўзабаве рабіць мінчане праз зручныя сэрвісы. Пра сістэму электронных паслуг у Мінску, пашырэнне іх функцыянальных магчымасцяў і перспектыўныя праекты расказалі спецыялісты Цэнтра інфармацыйных тэхналогій Мінгарвыканкама.
Поўная алічбоўка і кіраванне прасторай
З пункту гледжання інфарматызацыі ў Мінску, пэўна, самае цікавае і штодзённае для людзей — гэта сістэма ЖКГ, а дакладней — служба 115 — адзіны цэнтр прыняцця заяў ад грамадзян і каардынацыі ўсіх паслуг у гэтай сферы, лічыць Іван БУТУК, вядучы бізнес-аналітык Цэнтра інфармацыйных тэхналогій (ЦІТ) Мінгарвыканкама:
— Для паляпшэння сістэмы шмат робіцца ў тэхнічнай, арганізацыйнай і каардынацыйнай частцы. Служба 115 эвалюцыянуе, развіваючыся ў платформу, агульную для ўсёй сістэмы ЖКГ краіны. Задача — стварыць дзяржаўную інфармацыйную сістэму ЖКГ, якая не толькі аб'яднае службу 115 з яе ўнутранымі сэрвісамі, але і пачне пашыраць свае сэрвісы за кошт геаінфармацыйных сістэм (картаграфіі), а таксама ствараць умовы для разумнага кіравання дамамі на ўзроўні ЖЭУ і кожнага раёна, прычым не толькі ў сталіцы, але і па ўсёй краіне.
Да службы 115 заўжды шмат пытанняў. У прыватнасці, адносна якасці аказання паслуг водазабеспячэння. Спецыялісты разважаюць, як можна аўтаматызаваць сістэму інфармавання грамадзян, каб як мага хутчэй яны атрымлівалі інфармацыю, што на пэўным участу здарылася аварыя і калі яе плануюць устараніць. Мяркуюць стварыць шматканальную сістэму інфармавання праз усе сродкі камунікацый: тэлеграм, вайбер, мабільныя праграмы, сайт.
Адна з функцыянальных змен — стварэнне платформы для грамадзян, на якой яны змогуць заказаць не толькі паслугі ЖКГ, але і пабочныя паслугі, якія аказваюць прадстаўнікі малога і сярэдняга бізнесу. Мяркуецца, яны ўсе будуць змешчаны на гэтым рэсурсе. Такім чынам прадпрыемствы прыватнага сектара і прадпрымальнікі далучацца да абслугоўвання, і, адпаведна, палепшыцца сэрвіс ЖКГ, лічыць эксперт:
— Кожны гараджанін зможа заказаць дадому слесара, сантэхніка, электрыка ў зручны для сябе час, нават пасля работы. Такім чынам здзейсніцца пашырэнне паслуг для насельніцтва і яны будуць больш якасна і аператыўна аказвацца. Задача — даць транспарэнтны комплексны аналіз таго, што звязана з фарміраваннем сабекошту за аказаныя паслугі ў ЖКГ. Гэта вялікая комплексная работа, бо існуе шмат нарматыўна-прававых актаў, якія фарміруюць правілы, як складаецца гэты сабекошт.
Гэтай работай спецыялісты займаюцца з дапамогай спецыялізаваных праграм. Так, «АіС Домаўлік» будзе поўнасцю алічбоўваць дом з пункту гледжання арганізацыі, якая яго эксплуатуе, і ствараць рэальны інструмент, які дазволіць кантраляваць фарміраванне сабекошту паслуг на ўзроўні дома, дзе яны аказваюцца, і нават пад'езда. Гэта датычыцца, у прыватнасці, уліку электрычнасці для асвятлення пад'езда, уборкі прыдомавай тэрыторыі.
Яшчэ адна задача — стварыць зручнае кіраванне прасторай. Гэта ўсе картаграфічныя геаінфармацыйныя сэрвісы, якія дазволяць грамадзянам кантраляваць тое, што адбываецца побач з іх домам і ў горадзе. Прынамсі, гэта датычыцца вывазу цвёрдых камунальных адходаў, раздзельнага збору смецця з сістэмай кантролю за транспартам, які іх забірае.
Новая платформа ДЗІС ЖКГ
— Праблемны момант у тым, што кожны, не да канца разбіраючыся ў сферы дзяржкіравання, якое звязана з ЖКГ, імкнецца рабіць нешта сваё. Гэта контрпрадукцыйна, бо ствараецца парк рашэнняў, якія не скаардынаваны і не рэгламентаваны агульнымі мэтамі. Самы просты прыклад — вялікая колькасць мабільных прылад у карыстальніка. Цяпер існуюць дзясяткі тысяч розных прылад, і кожны хоча прыўнесці сваю ідэю на ўзровень агульнага рашэння. У выніку пачынаюцца спарадычныя высілкі ў розных пунктаў. У адным раёне адна праграма, у іншым — другая, але ў прынцыпе яна пра адно, — абазначыў Іван Бутук.
Спецыялісты Мінгарвыканкама сумесна з Міністэрствам сувязі і інфарматызацыі, «Белтэлекамам! і іншымі ўдзельнікамі структуры Мінсувязі плануюць стварыць каардынацыйны савет па развіцці платформы ДЗІС ЖКГ у межах праграмы «Разумныя гарады Беларусі». Адпаведны пілотны праект у 2022-м будзе праведзены ў Заводскім раёне сталіцы і Оршы. Усіх, хто мае пэўныя ініцыятывы, спецыялісты заклікаюць звяртацца ў цэнтр каардынацыі, дзе будзе стварацца каталог рашэнняў, каб пазбегнуць стварэння мноства варыянтаў аднаго рашэння.
Жыроўкі па е-мэйлу і прыз за фота
Цэнтр інфармацыйных тэхналогій Мінгарвыканкама — ІT-твар Мінска. Цэнтр мае вялікі вопыт у рабоце з жыхарамі і іх праблемамі, якія датычацца ЖКГ і добраўпарадкавання. Яго супрацоўнікі зацікаўлены ў экавыхаванні грамадства і ў гэтым плане маюць два праекты, якія ўжо дзейнічаюць, паведаміла Аксана ГАЛАВАЦКАЯ, начальнік аддзела маркетынгу Цэнтра інфармацыйных тэхналогій Мінгарвыканкама:
— Яшчэ ў 2014-м мінчанам, каб атрымліваць электронныя плацежныя паведамленні, трэба было ісці ў разлікова-даведачны цэнтр (РДЦ), пісаць заяву, і ў наступным месяцы атрымліваць электроннае паведамленне пра аплату, налічаную за камунальныя паслугі. Тым самым эканомілася папера і ратаваліся дрэвы. Электронныя жыроўкі, дарэчы, прыходзяць раней за папяровыя, паглядзець іх можна нават калі ты знаходзішся за мяжой, і плюс не трэба захоўваць іх недзе стосам папер.
У 2019-м спецыялісты ЦІТ стварылі на сайце адзінага разлікова-даведачнага цэнтра асабісты кабінет, у якім кожны мінчанін можа запоўніць рэгістрацыйную форму і пакінуць заяўку на атрыманне жыроўкі ў электронным выглядзе. У 2019-м такім чынам было адпраўлена 232 337 электронных паведамленняў, а летась — 493 839. Гэта, між іншым, каля 75 дрэў, якія не сталі паперай.
Другі праект — «Зялёны двор разам!». Ён функцыянуе штогод увосень і вясной. У яго межах кожны жыхар можа выбраць расліну, месца і час, калі ён хацеў бы пасадзіць дрэва ці куст. Летась у Мінску высадзілі звыш 15 тысяч дрэў і 34,5 тысячы кустоў.
— Сёлета мы вырашылі два праекты аб'яднаць разам. На галоўнай старонцы сайта РДЦ знаходзіцца актыўны банер пераходу на электронныя плацежныя паведамленні. Кожны жыхар можа перайсці па спасылцы і адмовіцца ад папяровых паведамленняў пра аплату камунальных паслуг. Праз тры рабочыя дні пасля запаўнення заяўкі спецыялісты цэнтра правераць пакінутую чалавекам інфармацыю і пацвердзяць, што паведамленні будуць прыходзіць на электронную пошту. Яшчэ ў асабісты кабінет дадалі актыўны банер, націснуўшы на які чалавек можа перайсці на старонку, дзе пакінуць заяву на пасадку раслін.
У асабістым кабінеце можна будзе таксама змясціць фотасправаздачу: як было ў двары да пасадкі і як стала пасля. Выпадковым чынам будзе абраны пераможца, які атрымае прыемны прыз, паабяцала спецыяліст.
Ірына СІДАРОК
Фота аўтара
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
