Вы тут

Качанава правяла нараду з прадстаўнікамі Міністэрства аховы здароўя і работнікамі медустаноў


Старшыня Савета Рэспублікі Наталля Качанава правяла нараду з адміністрацыяй і прадстаўнікамі Міністэрства аховы здароўя, работнікамі медустаноў, перадае БЕЛТА.


«Гэта наша не першая нарада. Сёння тут прысутнічаюць эксперты, урачы-інфекцыяністы, людзі, якія займаюцца пытаннямі COVID-інфекцыі. Нягледзячы на тое, што ў нас цяпер у цэлым па краіне 38,9 працэнта ад піка асенняй захваральнасці, мы разумеем, што гэта сітуацыя можа ў любы час змяніцца, таму што хвароба даволі непрадказальная. Таму я хацела б, каб сёння мы абмяняліся меркаваннямі аб сітуацыі з распаўсюджваннем захваральнасці ў розных абласцях. Тут прысутнічаюць людзі, якія ўваходзяць у маніторынгавыя групы і па даручэнні кіраўніка дзяржавы замацаваны за абласцямі і горадам Мінскам. Я хачу пачуць ваша меркаванне, як сёння складваецца сітуацыя. Лічбы мы ведаем. Але нам неабходна вызначыць тыя вузкія месцы, якія ёсць у лячэнні гэтай хваробы, таму што цяжкасць хворых даволі сур’ёзная. Мы бачым, што людзі хварэюць другі і трэці раз. Таму спыняцца на дасягнутым нельга», — сказала Наталля Качанава.

Паводле яе слоў, важная роля адводзіцца аналітычнаму аспекту. «Мы павінны аналізаваць схільнасць да хваробы. Гэтыя высновы могуць быць выкарыстаны ў рабоце. Тут і прыняцце адміністрацыйных рашэнняў мясцовымі органамі ўлады ў комплексе з аховай здароўя. Толькі тады гэта можа даваць добрыя вынікі. Гэта перапрафіляванне бальніц у выпадку неабходнасці, забеспячэнне кіслародам, сродкамі індывідуальнай аховы і лекавымі прэпаратамі. Прэзідэнт дакладна паставіў задачу і губернатарам, і мэру Мінска — займацца гэтымі пытаннямі разам з сістэмай аховы здароўя, — падкрэсліла старшыня Савета Рэспублікі. — І, вядома, не забываць аб той галоўнай задачы, аб якой заўсёды гаворыць Прэзідэнт. І на гэтым ён яшчэ раз акцэнтаваў увагу маю (як упаўнаважанага прадстаўніка Прэзідэнта па горадзе Мінску) і міністра аховы здароўя. Нам дарагі кожны чалавек, і мы павінны рабіць усё, каб сёння ратаваць жыцці людзей. Гэта першарадная задача».

Наталля Качанава таксама адзначыла работу СМІ ў гэтым напрамку. «Я ўдзячна за тое, што актыўна пачалі працаваць СМІ па гэтым пытанні. Мы павінны як мага часцей гаварыць аб гэтым людзям. Павінны кваліфікаваныя спецыялісты даваць каментарыі, тлумачыць сітуацыю, якая складваецца. Калі ты ўзброены інфармацыяй — значыць, можаш засцерагчы ад небяспекі сябе, родных і блізкіх. Зразумела, выкананне ўсіх санітарна-эпідэмічных мер вельмі неабходна, — сказала яна. — Прэзідэнт на кожным этапе адразу падключаецца і робіць усё, каб вырашыць узнікаючыя пытанні. Гэта і набыццё КТ для паліклінік, забеспячэнне лекавымі прэпаратамі, даплаты медыкам. Дарэчы, гэта таксама важнае пытанне. Шэраг Telegram-каналаў пачаў распаўсюджваць фэйкавую інфармацыю, што даплаты медыкам будуць адменены. Нічога падобнага няма і не будзе. Усё астатняе залежыць ад вас. У першую чаргу ад Міністэрства аховы здароўя, як яно выбудуе гэту работу, як будзе працаваць з кадрамі, бачыць рэальную сітуацыю».

Як дадаў рэктар Гомельскага дзяржаўнага медыцынскага ўніверсітэта Ігар Стома, з часам прыходзіць клінічны вопыт у лячэнні COVID-19. «Урачы-клініцысты, інфекцыяністы значна больш цяпер ведаюць аб лячэнні COVID-19, у прыватнасці аб вядзенні цяжкіх пацыентаў. І мы хочам падкрэсліць, што калі першая хваля была часам клініцыстаў (мы спрабавалі, шукалі новыя спосабы лячэння), то далейшыя ўздымы захваральнасці — гэта пытанне арганізацыі. Паколькі на сённяшні дзень з пункту гледжання лячэння мы валодаем усімі тымі рычагамі, якімі валодае ўвесь свет. Гэта і пытанні купіравання цытакінавага шторму, падтрымкі глюкакортыкастэроідаў, адэкватная суправаджальная тэрапія, — сказаў ён. — Трэба адзначыць, што вірус SARS-CoV-2 займае пэўныя папуляцыйныя нішы. Калі ў першыя месяцы пандэміі гэта былі нішы ўзроставых людзей, то з часам ён пачаў займаць нішы іншых узростаў. Хварэюць і людзі сярэдняга ўзросту, і маладыя. Важна адзначыць, што хварэюць людзі ў тым ліку і без фактараў рызыкі цяжкага ходу захворвання. Нельга гаварыць, што інфекцыя стала лягчэйшай, проста мы крыху больш пра яе сёння ведаем».

Як адзначыў прафесар кафедры інфекцыйных хвароб Беларускага дзяржаўнага медыцынскага ўніверсітэта Дзмітрый Данілаў, сітуацыя не дазваляе пакуль расслабляцца. «Але ў любым выпадку мы хацелі б спадзявацца на асцярожны аптымізм з улікам укаранення масавай вакцынацыі. Пры гэтым хацелася б падкрэсліць, што пытанні дыстанцыравання і масачнага рэжыму па-ранейшаму актуальныя», — канстатаваў ён.

Прафесар дадаў, што цяпер пакуль рана гаварыць аб неабходным працэнце ахопу насельніцтва краіны вакцынацыяй. «Час пакажа. Справа ў тым, што ад краіны да краіны гэтыя даныя могуць адрознівацца і на самай справе мы можам толькі меркаваць, а канкрэтныя працэнты расставіць каранавірус. Я маю на ўвазе з пункту гледжання ідэальнай сістэмы, якая паволі наладжваецца. Гэта значыць у любым выпадку каранавірус нікуды не дзенецца, але хочацца спадзявацца, што ён з вельмі вострай праблемы ператворыцца проста ў адну з задач, якая стаіць перад аховай здароўя. Новыя штамы будуць муціраваць, іх будзе з’яўляцца ўсё больш і больш. Вірус будзе спрабаваць заняць іншыя нішы. Мы павінны быць гатовы да таго, што мы сутыкнёмся ўсё з новымі і новымі штамамі. Іншае пытанне, што рэкамендацыі для насельніцтва застаюцца ўсё тыя ж».

Дзмітрый Данілаў запэўніў, што сістэма аховы здароўя гатова нават да больш хуткага развіцця сітуацыі. «Прынята ўжо рашэнне аб паскарэнні вакцынацыі, і гэта правільная тактыка. Неабходна паскараць вакцынацыю, каб як мага хутчэй атрымаць імунную праслойку. Тут размова ідзе аб набліжэнні вакцынацыі з паліклінік да вялікіх калектываў, магчымасці больш шырокай вакцынацыі па жаданні», — рэзюмаваў ён.

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».