Вы тут

Жэўжык, Ёўнік, чараўніца Свіцязянка...


Нашы продкі ніколі не ведалі адзіноты. Побач з імі заўсёды нехта знаходзіўся: у лесе ды ў жыце, у дрыгве ды пад снапом, у гумне ды ў кутку запрыпечка… Схаваныя ад чалавечага вока звышнатуральныя сілы дапамагалі pacтлyмaчыць i нeйкiм чынaм yпapaдкаваць з’явы нaвaкoльнага cвeту. Беларускія міфічныя істоты і казачныя персанажы 15 красавіка да канца мая “прапісаліся” ў выставачнай зале Гродзенскага абласнога метадычнага цэнтра народнай творчасці.


Усе, хто жадае бліжэй пазнаёміцца з Жэўжыкам і Ёўнікам, зазірнуць у вочы таямнічаму Купальскаму дзядку і пастаяць побач з Гаспадаром палёў, шчыра запрашаюцца на ўнікальную выстаўку-конкурс дэкаратыўна-прыкладнога і выяўленчага мастацтва «Казкі і паданні майго краю», якая стала пачаткам аднайменнага маладзёжнага праекта.

Таленавітыя ўдзельнікі гурткоў і студый выяўленчага і дэкаратыўна-прыкладнога мастацтва, вучні дзіцячых мастацкіх школ і школ мастацтваў, навучэнцы сярэдніх спецыяльных і студэнты вышэйшых навучальных устаноў і адораныя канкурсанты Гродзеншчыны стварылі больш за 120 работ, аб’яднаных адзінай тэмай. Кожны твор адрозніваецца сваёй непаўторнай тэхнікай выканання і кампазіцыяй.

У выставачнай зале цэнтра сярод арыгінальных экспанатаў знайшоў сабе прытулак і клапатлівы захавальнік хатняга ачага — хатнік. З гэтым добрым заступнікам можна не баяцца ні злыдняў, ні шатанаў і смела акунацца ў краіну магіі і чараўніцтва, створаную з дапамогай фарбаў, паперы, дрэва, гліны, саломкі, лямцу, тэкстылю і, вядома ж, бязмежнай фантазіі. Варта адзначыць, што многія з каларытных персанажаў, адлюстраваных на выстаўцы, не маюць аналагаў у сусветнай міфалогіі.

Таленавітыя прадстаўнікі розных рэгіёнаў Гродзенскай вобласці не абышлі ўвагай у сваёй творчасці і герояў мясцовых легенд. Белая Панна Гальшан, чараўніца Свіцязянка, Барбара Радзівіл, князёўна Гражына — увасобленыя ў работах канкурсантаў вобразы ў чарговы раз даказалі, што ўсе без выключэння рэгіёны Гродзеншчыны адрозніваюцца багатай фальклорнай спадчынай, якую варта памятаць і шанаваць.

Кожны наведвальнік выставачнай залы мае магчымасць паўплываць на вынікі конкурсу і аддаць свой голас за таго ўдзельніка, чыю работу ён палічыць самай вобразнай, арыгінальнай ды яскравай. Тым часам казачна-фантастычная тэма Гродзеншчыны будзе падтрымлівацца і ў інтэрнэце. 5 мая плануецца запуск чэленджу ў Instagram «#ЛЮБИМАЯСКАЗКА», а 10 мая экспазіцыя «Казкі і паданні майго краю» пачне дзейнічаць не толькі ў выставачнай зале, але і ў сацыяльнай сетцы «ВКонтакте» з магчымасцю анлайн-галасавання. Самых актыўных і крэатыўных віртуальных наведвальнікаў чакаюць прызы!

Фінальным акордам праекта стане ўрачыстае падвядзенне вынікаў конкурсу, уручэнне падарункаў і вялікае свята каля Маладзёжнага цэнтра «Гродна». Кніжная экспазіцыя, тэтралізаванае прадстаўленне, канцэрт, творчыя пляцоўкі — усе сюрпрызы арганізатары пакуль трымаюць у тайне, але пераконваюць: будзе казачна! І запрашаюць усіх далучацца.

Праект «Казкі і паданні майго краю» — гэта не толькі цікавае падарожжа ў свет арыгінальнай народнай культуры, але і гарантаваная падтрымка казачных персанажаў, якія дакладна ведаюць, як дапамагчы добраму чалавеку.

Ала БЯЛЬКЕВІЧ, рэдактар ДУК «Гродзенскі абласны метадычны цэнтр народнай творчасці»

Фота дадзена ўстановай

Выбар рэдакцыі

Грамадства

На Гомельшчыне актыўна развіваюць валанцёрскі рух

На Гомельшчыне актыўна развіваюць валанцёрскі рух

Форма сацыяльнай актыўнасці падлеткаў.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».