Пра гэту маленькую дзяўчынку Арыну Рудніцкую ведаюць амаль усе ў Брэсце. Грошы на яе выратаванне збіралі працаўнікі і пенсіянеры, чыноўнікі і дыпламаты, спартсмены і дзеячы культуры. Яе можна выратаваць, але сума патрабуецца, паводле мерак адной асобна ўзятай сям'і, астранамічная — крыху больш за 2 мільёны 250 тысяч долараў.
У канцы 2020 года Арыне Рудніцкай паставілі дыягназ — спінальная мышачная атрафія (СМА) другога тыпу. Гэта рэдкае генетычнае захворванне, абумоўленае «паломкай» гена. Дарэчы, у Беларусі толькі адзін спецыяліст выстаўляе такі дыягназ. Калі дзіця з названай хваробай не пачаць лячыць своечасова, да двух гадоў яно акажацца ляжачым інвалідам. Дзіця са СМА паступова страчвае здольнасць трымаць галоўку, адбываецца парушэнне глытальнай функцыі, яму становіцца цяжка дыхаць. Працягласць жыцця такіх пацыентаў рэдка перавышае 20 гадоў. Пры гэтым разумовыя здольнасці малога захоўваюцца, яно поўнасцю ўсведамляе сваю немач і адчувае, як цела паступова і настойліва перастае яго слухацца. І чым раней пачынаецца лячэнне, тым больш шанцаў на поспех.
Сёння ў свеце вядомыя тры асноўныя лякарствы ад спінальнай мышачнай атрафіі. Курс лячэння кожным з іх абыходзіцца прыкладна аднолькава. Але для Арыны найбольш падыходзіць укол Zolgensma амерыканскай вытворчасці, які робіцца адзін раз і на ўсё жыццё. Каштуе ён каля 2,3 мільёна долараў. Гэты прэпарат на базе віруса запускаецца ў арганізм і замяшчае той самы «паламаны» ген. Праўда, папярэдне трэба праверыць сумяшчальнасць арганізма з лякарствам. І кроў Арынкі ўжо паслалі на аналіз у лабараторыю, якая знаходзіцца ў Нідэрландах. Укол неабходна ўвесці не пазней чым праз месяц з дня здачы аналізаў. Так што працэс, можна сказаць, запушчаны.
Лякарства, пра якое ідзе гаворка, з'яўляецца інавацыйнай распрацоўкай амерыканскіх вучоных. У саміх Штатах яно адобрана толькі ў 2019 годзе. У Беларусі прэпарат пакуль не зарэгістраваны. Таму Міністэрства аховы здароўя адмовіла Рудніцкім у дапамозе па закупцы лякарства.
Спачатку яны спадзяваліся на цуд. Справа ў тым, што ёсць магчымасць выйграць укол Zolgensma у латарэю. Такі розыгрыш праводзіць вытворца — роўна 100 доз ён дорыць дзецям з розных краін свету, дзе не лечаць СМА. Трэба толькі прадставіць дакументы аб адпаведнасці дзіцяці пэўным крытэрыям. Арыне зрабілі аналізы, і дзяўчынка была дапушчана да ўдзелу ў латарэі. Дарэчы, менавіта ў гэтай латарэі ўжо атрымалі жыццё трое беларусаў: Софія Жагунь з Ляхавіч, Даша Шапятоўская з Наваполацка і Даніла Дзянісаў з Мінска. Арыне тым разам не пашанцавала. Чакаць новага розыгрышу няма часу.
Трэба аддаць належнае бацькам Арыны — Арцёму і Кацярыне Рудніцкім. З хваробай дачкі, са зборам сродкаў яны ўжо прайшлі не адзін круг пекла, але не здаліся, не апусцілі рукі. Яны адкрылі рахункі ў банку, завялі нумар мабільнага аператара МТС, які можна папаўняць, накіравалі лісты з просьбамі куды толькі можна. Падлічылі: калі кожны беларус ахвяруе 3 рублі — дзяўчынцы можна падарыць жыццё!
І паволі пачаліся паступленні. Людзі пералічвалі, хто колькі змог. Артысты выступалі з дабрачыннымі канцэртамі, дыпламаты з дыпмісій, акрэдытаваных у Брэсце, правялі тэнісны турнір, а прызавы фонд перавялі сям'і Рудніцкіх. Апарат гарвыканкама сабраў грошы на навагодні карпаратыў і вырашыў яго не праводзіць, а суму перавесці на рахунак Арынкі. За некалькі месяцаў назбіралася 340 тысяч долараў. На адрас нашай газеты таксама прыйшоў ліст з просьбай да нашых чытачоў аб дапамозе.
...Нядаўна стала вядома, што прадпрыемства «Савушкін прадукт», дзе працуюць бацькі дзяўчынкі, заявіла аб гатоўнасці пералічыць вялікую суму на лячэнне дзіцяці. Гэта сума стане вырашальнай. Але для сям'і каштоўны кожны рубель, лячэнне не скончыцца ўвядзеннем уколу, спатрэбяцца новыя абследаванні, кансультацыі, якія вымагаюць сродкаў. І ў гэтым сэнсе любая наша з вамі дапамога будзе вельмі дарэчы.
Нядаўна гутарыла з адной жанчынай-сенатарам. Яна сказала, што пасля дабрачыннага мерапрыемства, арганізаванага ёю для дзіцячага дома сямейнага тыпу, адчула сябе больш шчаслівай. Думаю, што гэта якраз той выпадак, калі кожны можа стаць крышачку больш шчаслівы, калі аддасць хоць кавалачак, маленечкую іскрынку надзеі на лепшае іншаму. Уявіце, нашы з вамі тры, пяць, дваццаць рублёў могуць паўплываць на жыццё і здароўе дзіцяці! Гэта ж так проста — ахвяраваць адной піцай, пірагом ці пачкам дарагіх цыгарэт.
Святлана ЯСКЕВІЧ
P. S. Калі матэрыял быў падрыхтаваны і стаяў ужо на паласе газеты, якую вы разгортваеце сёння, стала вядома, што збор закрыты — патрэбная сума сабраная цалкам! І мы з вялікай радасцю за Арынку здымаем з друку лістоўку з нумарамі рахункаў. Але гэта не значыць, што хтосьці з нас спазніўся з дапамогай, не паспеў зрабіць унёсак у справу выратавання жыцця. Кожны дзень просьбы аб дапамозе паступаюць з экрана тэлевізара, размяшчаюцца ў газетах і інтэрнэце. Прыклад Арыны Рудніцкай паказвае, што чалавечая спагада здольная зрабіць, на першы погляд, немагчымае. І нашы з вамі тры рублі могуць стаць вырашальнымі для іншага дзіцяці, якое чакае і спадзяецца. Пералічыце і станьце крышачку шчаслівейшыя!
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
