Вы тут

У Высокім камісія вывучала сітуацыю з добраўпарадкаваннем


Пастаянная камісія Камянецкага раённага Савета дэпутатаў па пытаннях мясцовага кіравання і самакіравання на мінулым тыдні збіралася ў горадзе Высокае. Афіцыйна пытанне, якое вынеслі на разгляд, гучала так: «Аб мерах, якія прымаюцца Высокаўскім гарадскім Саветам дэпутатаў, па забеспячэнні годных умоў пражывання і жыццядзейнасці насельніцтва».


Фота з сайта газеты «Навіны Камянеччыны».

— А калі гаварыць прасцей, мы сабраліся з дэпутатамі, каб паглядзець, што зроблена ў горадзе пасля дажынак 2018 года, як развіваецца 5-тысячны населены пункт, — сказала карэспандэнту «МС» старшыня камісіі Людміла ЖУРАЎЛЁВА. — Зразумела, што пад дажынкі былі выдзелены значныя сродкі, і невялікі горад перажыў абнаўленне. Многа было зроблена па замене інжынерных камунікацый, праведзены рамонт часткі жылога фонду, шмат зроблена ў плане добраўпарадкавання вуліц, двароў. Але не менш важна, каб з мерапрыемствамі «пад дажынкі» клопаты пра знешні выгляд, якасць жыцця людзей не заканчваліся.

Вось на гэта і звярнулі асаблівую ўвагу дэпутаты, наведваючы шэраг аб'ектаў. Старшыня Высокаўскага гарвыканкама Аляксандр РАГАЛЬЧУК расказаў дэпутатам, якая работа вядзецца па добраўпарадкаванні, як у гэтай рабоце ўдзельнічаюць самі гараджане. Штогод праводзяцца суботнікі, высаджваюцца кветкі на клумбах, садзяцца маладыя дрэвы і кусты, паляпшаюцца дарогі і двары.

Яшчэ да дажынак была адрамантавана і мадэрнізавана школа разам са школьнай тэрыторыяй. А летась работу працягнулі. Быў праведзены капітальны рамонт з мадэрнізацыяй стадыёна Высокаўскай сярэдняй школы (другі пускавы комплекс). Уладкаваны футбольнае поле, пляцоўкі для скачкоў у даўжыню, бегавыя дарожкі, сектар для кідання кап'я. Цяпер вучні могуць займацца ў секцыях па многіх відах спорту.

Уведзены ў эксплуатацыю жылы дом па вуліцы Сацыялістычнай. ААТ «Газпрам трансгаз Беларусь» прафінансавала закупку і ўстаноўку дзіцячага гульнявога комплексу ў двары дома. Яшчэ адзін комплекс паставілі паміж дамамі па вуліцы Зоі Космадзям'янскай і інтэрнатам па вуліцы 60 гадоў Кастрычніка. Грошы на пакупку апошняга ўдалося выручыць з аўкцыёну па продажы зямельных участкаў, якія канфіскуюцца ў гаспадароў, што так і не распачалі будаўніцтва. На чэрвень зноў прызначаны такі аўкцыён. Выручаныя сродкі плануецца патраціць на пакупку лавак, сметніц, усталяванне пясочніцы для дзяцей.

У адказ на звароты выбаршчыкаў уладкавана месца для сезоннага гандлю прадукцыяй, вырашчанай на прысядзібных участках.

Падчас работы дэпутаты засяродзілі ўвагу і на тых пытаннях, што яшчэ не вырашаны і застаюцца на кантролі. Найперш гэта асфальтаванне вуліц Свярдлова, Гагарына, Заслонава, Кірава, Арджанікідзэ, Мяжэніна, Беларускай. Вулічнае асвятленне патрабуецца на дваровай тэрыторыі трох дамоў па вуліцы Будаўнікоў. Квартал жылой забудовы ў раёне вёскі Кавалікі неабходна падключыць да цэнтральнай каналізацыі. Работа па вырашэнні пытанняў будзе прадоўжана, запэўніў кіраўнік мясцовай улады ў Высокім.

Як адзначыла старшыня Камянецкага раённага Савета дэпутатаў Ірына НЕГЯРЫШ, дэпутацкая камісія па пытаннях мясцовага кіравання і самакіравання працуе даволі эфектыўна. Усе яе пасяджэнні праходзяць з абавязковым выездам на месца. Дэпутаты сустракаюцца з людзьмі, інфармацыю атрымліваюць з першых вуснаў.

Святлана ЯСКЕВІЧ, Камянецкі раён

Загаловак у газеце: А што пасля дажынак?

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».