На вуліцы Гаўрылава ў Брэсце пачалі працаваць два мастакі сталічнай артстудыі ALMІRA. Яны наносяць на сцяну шматпавярховіка мурал героя, чыё імя носіць вуліца.
Старшыня Брэсцкага гарвыканкама Аляксандр РАГАЧУК у сваім тэлеграм-канале паведаміў, што гэта работа стала сумесным праектам гарадскога выканаўчага камітэта і Расійскага цэнтра культуры і навукі ў Брэсце. Яе плануецца завяршыць да 28 ліпеня — дня вызвалення горада.
Варта сказаць, што маёр Гаўрылаў — адзін з самых вядомых абаронцаў крэпасці. Ён быў цэнтральнай фігурай абароны Усходняга форта крэпасці. Яго заслугі прызнаў нават непрыяцель. Нямецкі генерал у сваім данясенні з павагай назваў яго «душой абароны». Пётр Гаўрылаў быў тым самым «невядомым маёрам», якога ў канцы чэрвеня ні сярод загінулых, ні сярод палонных немцы не знайшлі. Ён трапіць у палон 23 ліпеня. А да гэтага будзе абараняцца. Спачатку ў складзе трох рот, потым з астаткамі групы ў 12 чалавек з трыма кулямётамі, а ў канцы — калі застанецца адзін.
І толькі параненага, зусім знясіленага, яго знойдуць 23 ліпеня. Сяргей Смірноў у кнізе «Брэсцкая крэпасць» так апісаў момант захопу ў палон: «Палонны маёр
быў у поўнай камандзірскай форме, але яго вопратка ператварылася ў лахманы, твар быў пакрыты сажай і пылам, аброс барадой... Гэта быў у поўным сэнсе слова шкілет, абцягнуты скурай. Да якой ступені дайшла змардаванасць, можна было меркаваць па тым, што палонны не мог нават зрабіць глытальны рух:
у яго не хапала на гэта сіл, і дактарам давялося прымяніць штучнае харчаванне, каб выратаваць яму жыццё. Але нямецкія салдаты, якія бралі яго ў палон, расказалі ўрачам, што гэты чалавек, у чыім целе ледзьве трымцела жыццё, усяго гадзіну таму ў адзіночку прыняў бой, кідаў гранаты, страляў з пісталета, забіў і параніў некалькіх ворагаў».
Ён правядзе яшчэ чатыры гады ў нямецкіх канцлагерах, а затым пройдзе ўсе колы пекла былога ваеннапалоннага. Менавіта пісьменнік Сяргей Смірноў дапамог аднавіць добрае імя герою. Амаль праз дзесяць гадоў пасля вайны Гаўрылаву вярнулі званне і ўзнагароды, якіх пазбавілі без падстаў, а пазней прысвоілі
званне Героя Савецкага Саюза. Пётр Гаўрылаў пражыў жыццё ў Расіі, але завяшчаў пахаваць сябе ў Брэсце.
Прах яго знайшоў спачын на Гарнізонных могілках Брэста. Імя героя носіць вуліца ва Усходнім мікрараёне абласнога цэнтра. А цяпер з'явіцца мурал, які будзе відаць здалёк, бо героі не паміраюць, пакуль іх памятаюць.
Святлана ЯСКЕВІЧ
Фота з тэлеграм-канала А. Рагачука
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.