Вы тут

На Гродзеншчыне адкрылася выстава «Фарбы роднай старонкі»


Багатая палітра колераў, спантанныя сюжэты і па-дзіцячы наіўнае адлюстраванне рэчаіснасці — усё гэта ўласціва выстаўцы інсітнага («прымітыўнага») мастацтва, якая адкрылася ў Гродзенскім абласным метадычным цэнтры народнай творчасці. Экспазіцыя «Фарбы роднай старонкі» налічвае каля 100 палотнаў, прадстаўленых найлепшымі мастакамі-прымітывістамі вобласці.


Дзевяць таленавітых жывапісцаў дазволілі сабе праігнараваць законы перспектывы і адмовіцца ад строгіх правілаў кампазіцыі. Галоўная ўмова іх творчасці — глядзець на свет вачыма дзіцяці і тварыць так, як патрабуе душа. У аўтараў удала атрымаліся не толькі надзіва «жывыя» пейзажы ды нацюрморты, але і арыгінальныя эксперыменты з пастэллю, керамікай і шоўкам.

Своеасаблівым талісманам выстаўкі абраны казачны «Кот у яблыневым садзе», вобраз якога ўвасобіла алейнымі фарбамі Валянціна Шышпаронак з Бераставіцы. Таленавітая мастачка на працягу многіх гадоў працавала ў галіне будаўніцтва. Дарэчы, усім удзельнікам выстаўкі па жыцці заўсёды ўдавалася сумяшчаць некалькі сур'ёзных заняткаў. Так, Лідзія Шпектарава і Ганна Чуканава, мастачкі з народнага аматарскага аб'яднання «Гарадзенскі каларыт» Гродзенскага гарадскога цэнтра культуры, доўгі час працавалі на абутковай фабрыцы, Зоя Сярко — у вытворчым аб'яднанні «Азот», Данута Цыбулька-Цвятніцкая — у гандлі, Сяргей Еўдакімаў — на розных прадпрыемствах у якасці мастака-афарміцеля. Вядомая ў Гродзенскім раёне мастачка Ларыса Касіцкая сёння працуе кіраўніком дзіцячага гуртка выяўленчага мастацтва ў аграгарадку Азёры і піша іконы... на страусавых яйках. Алена Піразева з Навагрудка захапляецца інкрустацыяй бяростай, мастацкім роспісам, вышыўкай і актыўна ўдзельнічае ў мясцовым клубе майстроў «Каляровая альтанка».

Нездарма кажуць: чалавек таленавіты — таленавіты ва ўсім. Жывы доказ гэтых слоў — удзельнік выстаўкі Анатоль Кардаш з пасёлка Наваельня Дзятлаўскага раёна. Па прафесіі ён юрыст, з 1989 года займаецца жывапісам. Пейзажы Анатоля Аляксандравіча — сапраўдная крыніца мар для кожнага вандроўніка і аматара адпачынку на ўлонні прыроды! Вядомы на Дзятлаўшчыне творца сваімі рукамі змайстраваў ганчарнае кола і горн, засвоіў выраб глінянага посуду і на гэтым не спыніўся. Новы твор Анатоля Кардаша — аматарскае аб'яднанне «Эпатажны блюз» для наваельненскіх прыхільнікаў танцавальнай культуры.

Мастакі, чые работы да канца ліпеня можна будзе ўбачыць на выстаўцы «Фарбы роднай старонкі», перакананыя, што кожная творчая прыступка ў жыцці — гэта заўжды невялікая нагода для свята. Большасць аўтараў ужо ў досыць паважным узросце, але гэта не перашкаджае ім адчуваюць крылы за плячыма і імкнуцца да новых вяршынь.

Ала БЯЛЬКЕВІЧ, дырэктар Гродзенскага абласнога метадычнага цэнтра народнай творчасці

Загаловак у газеце: Інсітная краса «Фарбаў роднай старонкі»

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».