Вартаўнік скраў з прадпрыемства амаль 300 кілаграмаў камбікорму

Узлом склада і выкрадзены адтуль камбікорм раніцай выявілі прадстаўнікі адной з сельгасарганізацый Талачынскага раёна. 

Высветлілася, што начны візіцёр вынес амаль 300 кілаграмаў казённай маёмасці. Прыбыўшыя на месца злачынства праваахоўнікі ўстанавілі, што зламыснікам аказаўся той, хто павінен быў адказваць за захаванасць камбікорму, паведамляе аддзяленне інфармацыі і грамадскіх сувязяў УУС Віцебскага аблвыканкама.

33-гадовы вартаўнік прызнаўся, што сапраўды выкраў даручаную яму маёмасць. І, каб адвесці ад сябе падазрэнне, імітаваў узлом. У дачыненні да мужчыны следчымі заведзена крымінальная справа.

Сяргей РАСОЛЬКА

Прэв’ю: pixabay.com