У самым канцы мінулага тыдня «Чырвонку. Чырвоную змену» запрасілі на маладзёжны фестываль. Лагер удзельнікаў размясціўся на беразе возера Гаць, што за трыццаць кіламетраў ад Баранавіч. Шчыра кажучы, у першы дзень форуму надвор'е не радавала. Было складана ўявіць: ці атрымаецца правесці тры дні ў палатцы? Але арганізатары запэўнілі, што мерапрыемства пройдзе ў любым выпадку. З усёй Брэсцкай вобласці сабралася 17 каманд, якія мусілі спаборнічаць за права называцца самымі актыўнымі, пазітыўнымі і спартыўнымі актывістамі.
...Пакуль я дабралася да месца правядзення форуму, дождж спыніўся. І возера сустрэла мяне і іншых удзельнікаў сонечнымі прамянямі і хваёвым пахам. Першы, каго заўважыла, быў ветлівы малады мужчына, які дапамагаў удзельнікам ставіць палаткі і распальваць вогнішча. Аказалася, што гэта Юрый Сегянюк — першы сакратар Брэсцкага абласнога камітэта БРСМ, аднаго з асноўных арганізатараў форуму:
— Гэта наш сёмы фестываль — ён стаў ужо пэўнай традыцыяй. Важна адзначыць, што бягучы год стаў рэкордным, таму што на яго сабралася больш за чатырыста чалавек. У мерапрыемстве бярэ ўдзел працоўная моладзь. Гэта не проста турзлёт са звыклымі спаборніцтвамі, мы таксама праводзім яго як дыялогавую пляцоўку, а яшчэ прапаноўваем удзельнікам вырашыць інтэлектуальныя заданні. Кожны актывіст БРСМ можа паспаборнічаць за найвышэйшыя месцы ў вобласці. Хацелася б адзначыць, што такія мерапрыемствы будуць працягвацца.
Нарэшце, надышоў час для самага цікавага: пачаліся гульні. Тыя, хто мог пахваліцца добрай спартыўнай падрыхтоўкай, удзельнічалі ў спартыўным блоку. Яны перацягвалі канат, гулялі ў дартс, праходзілі спартыўна-турыстычную паласу. А самыя смелыя і дужыя спаборнічалі ў падняцці гіры. Моладзь, схільная да навукі, прадэманстравала свае інтэлектуальныя магчымасці падчас квізу і бліц-турніру «Моладзь Беларусі». Адпачыць і расслабіцца атрымалася дзякуючы таленавітым актывістам, якія правялі канцэрт сучаснай поп-музыкі.
Але «Прыбужжа-2021» — не толькі спаборніцтвы і конкурсы. У першую чаргу гэта — летнік на беразе возера. Складана ўявіць, што можа быць лепшае за летнія дні, якія ты правёў у кампаніі сяброў на прыродзе… Я памятаю, як пасля дзясятага класа разам са сваімі аднакласнікамі трапіла ў палатачны лагер. Гэта той вопыт, які застаецца з табой на ўсё жыццё. Гаворка ідзе не толькі пра ежу з вогнішча і купанне ў рацэ. Тут важна іншае: праверка твайго акружэння ў экстрэмальных умовах. Мяркую, што ўдзельнікі форуму са мной пагодзяцца. За гэтыя тры дні яны не толькі праверылі свае сілы, але і правялі час з карысцю.
...На развітанне возера падарыла нам дзіўны жнівеньскі захад сонца і цішыню старога лесу. Хочацца спадзявацца, што наступнае лета таксама не расчаруе.
Арына КАРПОВІЧ
Фота арганізатараў
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
