Сёлета ў Падзвінні абласны фестываль-кірмаш працаўнікоў вёскі пройдзе ў Шуміліне

Сёлета ў Падзвінні абласны фестываль-кірмаш працаўнікоў вёскі пройдзе ў Шуміліне. Па сутнасці, гэта прыгарад Віцебска, да якога ўсяго прыкладна сорак кіламетраў.

Штаб па падрыхтоўцы да «Дажынак-2021» узначальвае старшыня Віцебскага абласнога Савета дэпутатаў Уладзімір Цярэнцьеў. Кіраўнік абласнога парламента заклікае дэпутатаў розных узроўняў актывізаваць удзел у падрыхтоўцы да свята. І было зроблена нямала, каб вывучыць пажаданні жыхароў раёна наконт таго, якія горадабудаўнічыя змены неабходныя ім. Заўсёды трэба выслухваць меркаванні людзей, улічваць заўвагі, калі яны аргументаваныя. А поспех у рэалізацыі вялікіх праектаў — у зладжанасці каманднай работы, упэўнены дэпутат.

Гарадскі пасёлак прыгажэе літаральна з кожным днём. Мясцовыя жыхары ўдзячныя ўладзе за ўвагу да іх населенага пункта. І гэта не проста прыгожыя словы. Людзі разумеюць, што перамены — не дзеля справаздачы, а ўсё робіцца на дзесяцігоддзі.

Тутэйшыя старажылы не памятаюць, каб калісьці раней так маштабна (адразу ў дзясятках месцаў з раніцы да ночы) працавалі сотні будаўнікоў, азеляняльніка, сувязістаў і гэтак далей.

Да «Дажынак» каля стапяцідзесяці аб'ектаў — у райцэнтры і глыбінцы — капітальна рамантуецца, атрымлівае больш прывабны выгляд; будуюцца новыя.

Усяго для таго, каб сталіца «Дажынак» выглядала годна, плануецца скарыстаць каля 28 мільёнаў рублёў. Гэтыя вялікія грошы — з абласнога (18 мільёнаў) і раённага бюджэтаў, а таксама сродкі прадпрыемстваў і арганізацый раёна, плюс заробленыя жыхарамі рэгіёна падчас суботніка. А рэспубліканскія субсідыі накіроўваюць на рамонт дарожнага пакрыцця вуліц, што з'яўляюцца часткай рэспубліканскіх і мясцовых трас.

Толькі на тое, каб Шуміліна стаў «кветкавым горадам» (з прыгожым азеляненнем, клумбамі-карцінкамі, скульптурамі), вылучана больш за 61,5 тысячы рублёў.

Старшыня Шумілінскага райвыканкама Віктар Гутараў канстатуе, што робіцца ўсё магчымае, каб рэалізаваць задуманае поўнасцю, своечасова і якасна.

Сярод буйных аб'ектаў, якія атрымаюць другое жыццё, — шумілінскі стадыён. Каля пяцідзесяці гадоў там не праводзілі вялікіх будаўнічых работ.
А да «Дажынак» ён стане адным з найлепшых у Віцебскай вобласці, на ім можна будзе праводзіць нават рэспубліканскія спаборніцтвы. Адначасова за гульнёй футбалістаў на полі з новым пакрыццём змогуць назіраць дзвесце гледачоў. Абнавілі хакейную пляцоўку, абсталявалі пляцоўкі для заняткаў на трэнажорах, для варкаўта. Мадэрнізавалі бібліятэку, паліклініку, раённы Цэнтр культуры і гэтак далей.

Наогул, робіцца многае, каб у школах Шуміліна ўмовы былі не горшыя, чым у абласным цэнтры. Адметна, што каля пятнаццаці жылых дамоў і пад дваццаць двароў капітальна рамантуецца.

Наступныя «Дажынкі» пройдуць у Глыбокім, а потым сталіцай свята стане Шаркаўшчына.

Старшыня Віцебскага аблвыканкама Мікалай Шарснёў упэўнены, што падрыхтоўка да фестывалю працаўнікоў вёскі спрыяе станоўчым зменам у раёнах, паралельна мясцовыя работнікі сельскай гаспадаркі павышаюць вытворчыя паказчыкі. Зразумела, сорамна станавіцца гаспадарамі свята, калі аграпрамысловы комплекс не на вышыні. Дарэчы, сёлета на Шуміліншчыне ўраджай збяруць большы, чым летась.

Аляксандр ПУКШАНСКІ