Аб сітуацыі ў транспартным комплексе Прэзідэнту Беларусі Аляксандру Лукашэнку далажылі намеснік прэм’ер-міністра Анатоль Сівак і профільны міністр Аляксей Аўраменка.
Прэзідэнт пачаў размову з таго, што адзначыў: дастакова добра ведае стан спраў у галіне, таму слухаць заяўлены першым даклад «Аб значнасці транспартнага комплесу ў сацыяльна-эканамічным развіцці краіны» яму няма неабходнасці.
«Калі ласка, не трэба аб значнасці. Я не першы год працую Прэзідэнтам і ведаю, што такое транспартны комплекс і яго значэнне ў сацыяльна-эканамічным разівцці краіны. Гэта прэс-сакратару і Адміністрацыі Прэзідэнта раскажаце, калі яны не валодаюць гэтым пытаннем», — заўважыў кіраўнік краіны.
Прэзідэнт канстатаваў, што больш яго хвалююць пытанні, якія на першым плане ў прысутных чыноўнікаў.
«Мяне хвалююць і непакояць пытанні, што хвалююць вас. Пачынаючы ад „Белавіа“, калі гэтыя бязумцы пачалі душыць нашу кампанію (цяпер ужо зразумела, чаму), як там абставіны? Ну і ў цэлым, як жыве наш транспарт і ўвесь транспартны комплекс», — сказаў Аляксандр Лукашэнка.
Па словах Прэзідэнта, з паслуг, якія аказвае дзяржава, амаль палову займае гэтая сфера. Транспарт сёння фарміруе амаль палову валютнай выручкі ад экспарту паслуг — 2,3 мільярда долараў.
«Гэта велізарныя маштабы. Велізарная сума. Мы транзітная краіна. Я нават не хачу ўнікаць у праблему санкцый, якія адносяцца да вас. З’яўляемся транзітнай краінай, таму вы проста абавязаны забяспечыць нармальнае функцыянаванне транспарту», — заявіў Прэзідэнт.
Ён дадаў, збоі магчымыя, але яны павінны быць кароткатэрміновымі.
«Усе мы разумелі, што яны нас у супакоі не пакінуць, а будуць нас гэтымі санкцыямі падсілкоўваць. Як складваецца зараз сітуацыя, калі ёсць нейкія праблемы? Якія шляхі выхаду з гэтага стану вы бачыце?» — задаў пытанні дзяржслужачым Аляксандр Лукашэнка.
Яшчэ адна тэма, якая на парадку размовы, — будаўніцтва дарог. Тут кіраўніка краіны цікавіць, якія будуем, як будзем гэтым займацца пасля, які стан у мясцовых дарог. З гэтымі пытаннямі Прэзідэнт звярнуўся да Анатоля Сівака.
«Мабыць, Анатоль Аляксандравіч, табе гэта тэма бліжэй, бо ты ўсё жыццё будаваў дарогі і ведаеш усе задачы. Мы іх фармулявалі разам у свой час, пачынаючы ад мясцовых дарог і заканчваючы будаўніцтвам новых», — звярнуў увагу Аляксандр Лукашэнка.
Прэзідэнт канстатуе: Мінск злучылі з усімі абласнымі цэнтрамі, а на месцах ёсць праблемы.
«А там, на месцах, нам трэба больш-менш у нармальным стане падтрымліваць дарожна-транспартную сетку. Прынамсі, да аграгарадкоў мы павінны даязджаць свабодна на аўтамабілі», — заўважыў кіраўнік краіны.
Таксама ён пацікавіўся іншымі буйнымі будаўнічымі праектамі ў транспартным сектары і альтэрнатыўнымі шляхамі паставак нашай прадукцыі.
Аляксей АЎРАМЕНКА, міністр транспарту і камунікацый Беларусі паведаміў, што дынаміка паказчыкаў галіны станоўчая. Па першым паўгоддзі экспарт паслуг дадаў 19 % да леташняга ўзроўню. Прэзідэнт заўважыў, калі вытрымаюць гэты тэмп да канца года, будзе вельмі добра. За паўгоддзе на экспарце зарабілі больш за два мільярды долараў, у канцы года арыентуюцца дасягнуць чатырох мільярдаў долараў.
Як расказаў міністр пасля нарады, на сустрэчы таксама абмяркоўваліся праблемныя пытанні дзейнасці службаў таксі. Прэзідэнт ухваліў падыходы Міністэрства транспарту і камунікацый да зменаў у галіне аўтамабільных перавозак пасажыраў. Ведамства раней падрыхтавала адпаведны праект указа. У прыватнасці, дакументам мяркуецца ўвесці рэгістрацыйныя карты транспартнага сродку, карты допуску кіроўцы, дыспетчара аўтамабільных перавозак пасажыраў у нерэгулярных зносінах і дыспетчара таксі. Гэта дасць магчымасць упарадкаваць работу ў гэтым сектары.
«Мы фактычна ідзём па шляху Расійскай Федэрацыі. Яны ўжываюць прыкладна аналагічныя падыходы да работы таксі. Сёння рынак да канца не ўрэгуляваны з пункту гледжання наяўнасці транспартных сродкаў, кампаній, якія дзейнічаюць. Маецца на ўвазе ўсё гэта рабіць у электронным выглядзе. То бок, будзе электронная база з кіроўцамі, транспартнымі сродкамі», — адзначыў міністр.
У першую чаргу гэта робіцца, каб забяспечыць бяспеку перавозак, падкрэсліў Аляксей Аўраменка. «Гэта неліцэнзаваны від дзейнасці. Калі кіроўца хоча працаваць, у яго павінна быць заведзеная картка ўліку, дзе будуць фіксавацца ўсе парушэнні, праходжанне тэхнічнага агляду транспартнага сродку, адпаведнасць транспартнага сродку. Тым самым не будзем дапускаць да перавозак нявопытных кароўцаў», — дадаў ён.
З кіраўніком краіна таксама ўзгоднена пераразмеркаванне сродкаў інвестыцыйных праектаў. Над аднаўленнем дарогі Р46 будуць працаваць з кітайскімі партнёрамі, а работу па дарозе М3 плануюць весці з Еўразійскім банкам развіцця. Увогуле, па словах міністра, кіраўнік краіны паставіў задачу рэканструяваць не менш 1000 кіламетраў мясцовых дарог.
Гэтым часам працягваецца рэканструкцыя трас Мінск—Смалявічы, Р23 у кірунку Слуцк—Салігорск, Р16 у Брэсцкай вобласці на граніцы з Польшчай.
Як дадаў Аляксей Аўраменка, Беларусь гатова аператыўна рэагаваць на абмежаванні перавозак калійных угнаенняў.
«У лютым было падпісана пагадненне з Расійскай Федэрацыяй. Мы фактычна на расійскія парты перавезлі каля аднаго мільёна тон нафтапрадуктаў. Адпаведна, у нас ёсць альтэрнатыва. Гэта парты Ленінградскай вобласці, Мурманска. Гэтыя схемы напрацаваны. Таму будзем вельмі аператыўна рэагаваць на змены альбо ўвядзенне нейкіх дадатковых абмежаванняў у частцы перавозкі калійных угнаенняў», — сказаў Аляксей Аўраменка.
Марыя ДАДАЛКА
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».