Курсанты-першакурснікі Акадэміі МУС прынялі прысягу на вернасць Беларусі і яе народу

Гэтыя вельмі важныя словы навабранцы галоўнай міліцэйскай альма-матар краіны вымавілі на плошчы Дзяржаўнага сцяга. Сёлета шэрагі акадэміі папоўніла звыш 440 курсантаў, у тым ліку каля 20 дзяўчат.

Усе яны ўжо прайшлі курс маладога байца. За месяц засвоілі агнявую, страявую і фізічную падрыхтоўку, атрымалі тэарэтычныя першапачатковыя веды, якія спатрэбяцца ім у прафесіі. Цвёрда ўпэўненыя ў правільнасці свайго выбару, юнакі і дзяўчаты прынялі ўдзел у адной з галоўных урачыстасцяў свайго жыцця.

Як адзначыў намеснік міністра ўнутраных спраў генерал-маёр міліцыі Сяргей ХАМЕНКА, сярод усіх міліцэйскіх рытуалаў прыняцце прысягі з'яўляецца самым хвалюючым, які запамінаецца на ўсё жыццё ў найдрабнейшых дэталях. «Вымавіўшы слова «клянуся», вы сёння ўсклалі на сябе самую высокую адказнасць за абарону жыцця і здароўя людзей, павагу іх правоў і свабод, — звярнуўся да курсантаў прадстаўнік сілавога ведамства. — Гэта клятва вернасці нашай роднай Беларусі назаўсёды застанецца ў вашых сэрцах, будзе вашым надзейным арыенцірам у службе».

Сяргей Хаменка падкрэсліў, што сёння ў Акадэмію МУС паступілі найлепшыя прадстаўнікі маладога пакалення. «Гэта адказ тым зласліўцам, якія кажуць аб зніжэнні іміджу беларускай міліцыі, — удакладніў намеснік міністра. — Гэтыя людзі валодаюць ведамі, яны фізічна развітыя, а ў іх вачах — імкненне палепшыць жыццё».

Каб павіншаваць хлопцаў і дзяўчат з прыняццем прысягі, на плошчы Дзяржаўнага сцяга сабраліся родныя і блізкія, а таксама сябры ўчарашніх школьнікаў.

— Паступіўшы ў Акадэмію Міністэрства ўнутраных спраў, вы сталі на вахту па ахове закона, — акцэнтавала ўвагу новага папаўнення мама курсанта Алеся Лябедзік. — Вы заўсёды павінны памятаць, што галоўны абавязак супрацоўніка сілавога блока — мець халодны розум, гарачае сэрца і крыштальна чыстае сумленне, верна і шчыра служыць народу. Гледзячы на гэтыя стройныя шэрагі, мы, вашы бацькі, адчуваем вялізны гонар і радасць: вы абралі нялёгкі, але вельмі ганаровы шлях — служыць свайму народу, сваёй Радзіме.

Сярод іх — і Мікіта Лукашэвіч. Калі паўстала пытанне аб будучай прафесіі, малады чалавек ніколькі не вагаўся: перад ім быў заўсёды прыклад — бацька. Участковага, якога ў акрузе, дзе ён служыў, называлі сучасным Аніськіным, вельмі любілі і паважалі людзі, бо ён заўжды прыходзіў на дапамогу. На жаль, афіцэр міліцыі падчас выканання службовых абавязкаў загінуў. Сёння бацькаву справу працягвае яго сын.

— Дынастыя не спыняецца ўжо ў трэцім пакаленні: дзядуля Мікіты ў мінулым — палкоўнік міліцыі, — расказвае Наталля Лукашэвіч, мама курсанта. — Мы не настойвалі, каб па гэтым шляху пайшоў і сын, аднак ён сам прыняў рашэнне, і мы яго толькі падтрымліваем.

Словы прысягі ўчора вымавілі яшчэ і курсанты Магілёўскага інстытута МУС. Сярод тых, хто прыняў рашэнне служыць у міліцыі, — нямала прадаўжальнікаў сямейных дынастый супрацоўнікаў органаў унутраных спраў, а таксама выпускнікоў кадэцкіх вучылішчаў.

— Міліцэйская прафесія прад'яўляе да вас, хто прысвяціў сябе справе барацьбы са злачыннасцю, асаблівыя патрабаванні, — павіншаваў навабранцаў з прыняццем прысягі намеснік міністра ўнутраных спраў генерал-маёр міліцыі Генадзь КАЗАКЕВІЧ. — Супрацоўнік павінен быць усебакова развітым, прынцыповым і патрабавальным да сябе і навакольных, непрымірымым да фактаў парушэння закона, а таксама гуманным і справядлівым, смелым у хвіліну небяспекі, хуткім у прыняцці рашэння.

Чатыры гады навучання праляцяць вельмі хутка, і сённяшнія навабранцы зноў збяруцца на плошчы Дзяржаўнага сцяга, дзе ім будзе прысвоена першае афіцэрскае званне. А пакуль у добры шлях!

Вераніка КАНЮТА

Фота Яўгена ПЯСЕЦКАГА