Напярэдадні пачатку новага вучэбнага года Беларускі саюз жанчын правёў акцыю «Збяром партфель разам» ва ўсіх рэгіёнах краіны. Аб гэтым расказала яго першы намеснік Святлана СІТНІКАВА.
— Мы аказваем дапамогу шматдзетным, няпоўным, малазабяспечаным сем’ям, сем’ям, дзе выхоўваюцца дзеці з асаблівасцямі развіцця і дзеці з інваліднасцю. Партфелі для школьнікаў папоўніліся ручкамі, алоўкамі, сшыткамі ды іншымі неабходнымі канцылярскімі прыладамі. А таксама першакласнікам перадалі адзенне і спартыўны абутак. Сем’і, якія маюць патрэбу ў дапамозе па актыўным уключэнні дзяцей у школьнае жыццё, атрымалі грашовыя сертыфікаты, канцылярскія тавары, адзенне і прысмакі на агульную суму больш за 213 тысяч рублёў. Усяго дапамога аказана 3701 сям’і, у якіх парадавалі падарункамі 12 073 дзіцяці. Акрамя таго, навінкай бягучага года стала правядзенне розных урачыстых мерапрыемстваў з удзелам дзяцей і іх бацькоў: канцэрты, спектаклі, тэатралізаваныя паказы, экскурсіі, якія прайшлі па ўсёй краіне.
Дзень ведаў традыцыйна стаў падставай для добрых спраў, падкрэсліла начальнік Рэспубліканскага валанцёрскага цэнтра Яна ШАРАМЕЦЬЕВА.
— Валанцёрскія атрады, цэнтры, установы адукацыі штогод да пачатку вучэбнага года рыхтуюць канцылярскія тавары і салодкія падарункі для дзяцей з сацыяльных устаноў, дзіцячых дамоў, педагагічных цэнтраў, інтэрнатаў і перадаюць сабраныя падарункі напярэдадні 1 верасня. Таксама валанцёры арганізоўваюць інтэрактыўныя праграмы, конкурсы для першакласнікаў. Напрыклад, валанцёрскі клуб «Слон» Беларускага дзяржаўнага ўніверсітэта культуры і мастацтваў распрацаваў інтэрактыўную праграму, падчас якой хлопцы і дзяўчаты дапамагаюць Бураціну трапіць у Краіну ведаў. У сталічнай школе № 56 супрацоўнікі Рэспубліканскага валанцёрскага цэнтра разам з настаўнікам правялі для першакласнікаў урок аб валанцёрстве, дапамозе родным і блізкім, клопаце пра сваю краіну і горад і прэзентавалі кнігу «Падарожжа ў Краіну Добрых Спраў», якую распрацаваў наш цэнтр, каб паказаць, што добрыя справы здольны здзяйсняць кожны.
Дабрачынная акцыя «Збяром дзяцей у школу» Беларускага таварыства Чырвонага Крыжа прадоўжыцца да 30 верасня. Аб гэтым расказаў яго спецыяліст па сувязях з грамадскасцю Кацярына ШАРШУНОВА.
— Аказваем падтрымку сем’ям, якія знаходзяцца ў хісткім становішчы і дапамагаем сабраць канцылярыю, школьную і спартыўную форму, іншыя прылады для школьнікаў. Такую дапамогу ўжо атрымалі больш за 2347 дзяцей, большасць з якіх — з маламаёмных і шматдзетных сем’яў. Зараз сабрана больш за 15 тысяч рублёў пад такія патрэбы. Сёлета мы паспрабавалі новы фармат аказання дапамогі: у Брэсце і Баранавічах даём сертыфікаты на школьныя прылады ў буйных гандлёвых цэнтрах на суму ад 20 да 50 рублёў. Гэты фармат знайшоў добры водгук сярод сем’яў, якія маюць у гэтым патрэбу. Таксама мы закупляем і дорым канцылярскія наборы і школьную форму карэкцыйным і сацыяльна-педагагічным цэнтрам краіны, у Мінску — дзіцячаму дому-інтэрнату для дзяцей-інвалідаў з асаблівасцямі псіхафізічнага развіцця. Да канца нашай кампаніі плануем аказаць дапамогу больш чым 7 тысячам дзяцей.
З 2013 года Беларускі рэспубліканскі саюз моладзі рэалізоўвае дабрачынны праект «У школу з добрым сэрцам». Падрабязней расказала сакратар Цэнтральнага камітэта БРСМ, старшыня Цэнтральнага савета ГА «БРПА» Аляксандра ГАНЧАРОВА.
— Праект традыцыйна стартаваў 3 жніўня. Валанцёры руху «Добрае сэрца» арганізоўваюць збор школьнага адзення і абутку, канцылярскіх прылад, вучэбных дапаможнікаў, спартыўных тавараў і іншых рэчаў, неабходных дзецям з маламаёмных сем’яў для падрыхтоўкі да вучобы. Кожная рэгіянальная структура БРСМ праводзіць гэтымі днямі акцыі і гульнявыя праграмы для школьнікаў. Таксама аказваем дапамогу ўстановам адукацыі па падрыхтоўцы будынкаў да новага вучэбнага года. Мінская гарадская арганізацыя БРСМ выступіла з ініцыятывай дапамогі ў падрыхтоўцы сталічнай школы № 224. Калі традыцыйна праект доўжыўся да 3 верасня, то цяпер — да 6 верасня. Радуе, што ўсё больш і больш маладых людзей далучаецца да добраахвотніцкага руху.
Дар’я ШЛАПАКОВА
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».