Штогод у трэцюю суботу верасня гродзенцы святкуюць Дзень горада. А сёлета гэтай падзеі папярэднічала і новае дзяржаўнае свята. Можна сказаць, што Дзень горада завяршыў цэлы шэраг урачыстых мерапрыемстваў, якія прайшлі напярэдадні і былі прысвечаны Дню народнага адзінства. Дарэчы, і дэвіз гарадскога свята быў адпаведны: Гродна3D#адзінства. Для святкавання 893-й гадавіны Гродна была запланавана працяглая праграма.
Праўда, з-за няспыннага дажджу некаторыя лакацыі не ўдалося правесці ў поўным маштабе. І хаця прыходзілася ўвесь час не выпускаць з рук парасонаў, усе, хто прыйшоў апоўдзень на плошчу Леніна, сталі сведкамі ўрачыстага відовішча. Менавіта тут, на галоўнай сцэне, адбылося адкрыццё гарадскога свята з удзелам абласных і гарадскіх улад, прадстаўнікоў дэпутацкага корпуса, грамадскасці горада. У прывітальным лісце старшыні Гродзенскага аблвыканкама Уладзіміра Караніка яшчэ раз згадалі тэму Дня народнага адзінства і важнасці гэтай даты для гродзенцаў. Па сутнасці, 17 верасня стала адпраўным пунктам для развіцця Заходняй Беларусі ў складзе адзінай краіны. А сёння сучасныя пакаленні працягваюць ствараць дабрабыт краіны, аддаючы сваю працу, талент, стараннасць дзеля росквіту сваёй Радзімы, гаварылася ў пасланні губернатара.
Найлепшыя гродзенцы ўдастоены ганаровага звання «Чалавек года Гродна». Такое званне існуе на ўзроўні вобласці, і вось упершыню яно зацверджана і для жыхароў горада. Узнагароду за асаблівыя заслугі атрымалі 12 чалавек — прадстаўнікі розных сфер дзейнасці: ад прамысловай да сацыяльнай.
Яшчэ чацвёра гродзенцаў дапоўнілі Кнігу Славы горада. А трое жыхароў абласнога цэнтра ўдастоены звання «Ганаровы грамадзянін горада Гродна». У іх ліку — заснавальнік будаўніча-мэблевай кампаніі «ЗОВ» Уладзімір Зухавіцкі, рэктар Гродзенскага аграрнага ўніверсітэта Вітольд Песціс, кіраўнік галаўнога філіяла ААТ «Прыёрбанк» па Гродзенскай вобласці Міхаіл Шылін.
Старшыня Гродзенскага гарвыканкама Мечыслаў Гой выказаў словы падзякі ганаровым гараджанам, а таксама усім гродзенцам, хто любіць і цэніць гэты старажытны, але такі малады і сучасны горад.
— Сёння Гродна — гэта абласны цэнтр, які дынамічна развіваецца. Нягледзячы на ўсе складанасці мінулага года, мы змаглі рэалізаваць новыя інфраструктурныя праекты, — зазначыў падчас сваёй прамовы мэр горада. — Завяршылася будаўніцтва новага аўтамабільнага моста — самага высокага ў Беларусі. Асаблівая ўвага сёлета ўдзялялася вырашэнню камунальных праблем.
Мэр горада прывёў такія лічбы. Адрамантавана 75 тысяч метраў дарожнага палатна, у горадзе з'явіліся першыя электробусы, за гэты год мяркуецца ўвесці ў эксплуатацыю больш за 200 тысяч квадратных метраў жылля, што дазволіць вырашыць жыллёвую праблему сотням гродзенскіх сем'яў. Развіваюцца новыя мікрараёны — Альшанка і Грандзічы. Там будуюцца дзіцячы сад, школа і паліклініка.
А падчас свята, бадай, самым папулярным стаў фестываль сыру. Ён праходзіць у Дзень горада ўжо восьмы раз і заўсёды выклікае інтарэс у наведвальнікаў як дэгустацыяй розных відаў сыру, так і магчымасцю набыць сваю любімую марку. Увогуле, шырокі асартымент быў прадстаўлены амаль усімі вытворцамі гэтай прадукцыі. А найбольш масава выглядалі арганізатары фестывалю — ААТ «Малочны Мір». Было зазначана, што сыраробчы кірунак адзін з прыярытэтных у нашай краіне. Толькі ў Гродзенскай вобласці штогод перапрацоўваецца 1,3 млн тон малака, выпускаецца 50 тыс. тон сыру. Валютная выручка ад рэалізацыі сырнай прадукцыі склала ў рэгіёне больш за 150 млн рублёў. Такія лічбы прывёў падчас адкрыцця фестывалю сыру першы намеснік старшыні Гродзенскага аблвыканкама Юрый Валяваты.
Нягледзячы на тое, што некаторыя лакацыі з-за дажджу прыйшлося адмяніць, канцэрт пад адкрытым небам усё ж такі адбыўся. На плошчы Леніна стваралі святочны настрой вакальныя і танцавальныя калектывы горада. На іншых пляцоўках выступілі кавер-бэнды і прайшоў фестываль касплею «Кампай». Гэта касцюміраваная гульня, якая папулярная ў свеце і дазваляе кожнаму на нейкі момант стаць акцёрам, раскрыцца па-новаму. Вечарам на плошчы Леніна прайшоў канцэрт з удзелам беларускіх артыстаў. А вось заяўлены ў праграме вядомы спявак Кай Метаў не змог выступіць з-за аварыі, у якую трапіў па дарозе ў Гродна. Праўда, артыст паабяцаў, што абавязкова пазней прыедзе сюды з сольным канцэртам. Свята завяршылася позна вечарам лазерным шоу і феерверкам.
Маргарыта Ушкевіч, фота grodnonews.by
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!