Чарговы выпадак здарыўся ўвечары 21 верасня, паведамілі ў Дзяржпагранкамітэце. У Свіслацкім раёне пагранічны нарад заставы «Тушэмля» Гродзенскай пагранічнай групы непасрэдна на лініі беларуска-польскай граніцы знайшоў іншаземца ў непрытомным стане з прыкметамі фізічнага гвалту. У гэты ж час на сумежным баку польскія сілавікі спакойна назіралі за тым, што адбываецца.
З улікам цяжкага стану бежанца ён быў дастаўлены на пагранзаставу, выклікана брыгада хуткай медыцынскай дапамогі. Пасля першаснага агляду медыкамі высветлілася, што мужчына знаходзіцца ў коме і мае яўныя прыкметы пераахаладжэння. Пры сабе ў іншаземца знойдзены пашпарт грамадзяніна Ірака і адмоўны ПЛР-тэст польскай медустановы.
Згодна з запісамі, зробленымі ў польскай карце неадкладнай меддапамогі, 20 верасня польскія пагранічнікі знайшлі маладога чалавека ў дачным доме і на месцы паказалі медыкам. Падчас агляду ўрачы зафіксавалі шокавы стан, ваніты, скаргі на боль у назе, крывацечныя пашкоджанні ад калючага дроту. Нягледзячы на цяжкі стан іншаземца, які працягваў ускладняцца, уся дапамога польскіх урачоў абмежавалася выдачай абязбольвальнага прэпарату. Мужчыну пакінулі на месцы знаходжання з прадстаўнікамі пагранічнай варты без далейшай шпіталізацыі. Акрамя таго, польскія сілавікі не далі дакументы пацярпелага медыкам для афіцыйнай фіксацыі стану асабістых звестак. Пазней сілавікі сумежнага боку проста выкінулі чалавека ў такім стане на лініі граніцы з Беларуссю.
Маладога чалавека даставілі ў Свіслацкую ЦРБ, дзе беларускія медыкі аказалі яму неабходную дапамогу. Першапачаткова ён знаходзіўся ў рэанімацыі, цяпер жа пераведзены ў хірургічнае аддзяленне, паведаміла БелТА. Пацярпелым аказаўся 20-гадовы грамадзянін Ірака Алі Салах Адан. Паводле яго слоў, у Польшчы правёў чатыры дні. Трапіў туды разам з сябрам. «Апынуліся ў лесе, без ежы і вады. Быў разгублены, спалоханы. Польскія сілавікі пачалі выштурхваць у Беларусь. Пагражалі сабакамі, зброяй, выкарыстоўвалі шокер. Казалі, каб больш не вяртаўся, інакш яны мяне заб'юць», — распавёў малады чалавек. Ён адзначыў, што не ведае, дзе цяпер яго сябар. Алі Салах Адан адзначыў беларускую клініку са станоўчага боку. «Добрае стаўленне медыкаў і харчаванне», — падкрэсліў ён.
«Пацярпелы быў дастаўлены брыгадай хуткай дапамогі ў стане зблытанай свядомасці і з элементамі пераахаладжэння. Яго адразу ж агледзелі профільныя спецыялісты. Праведзены неабходныя дыягнастычныя даследаванні, аказана неабходная медыцынская дапамога», — адзначыла выконваючая абавязкі галоўнага ўрача Свіслацкай ЦРБ Ларыса Клімчук. Здароўю маладога чалавека, звярнула ўвагу яна, нічога не пагражае.
«Сілавікі сумежных краін прымяняюць новую тактыку незаконнага выдварэння бежанцаў: для запалохвання мігрантаў, якія імкнуцца атрымаць прыстанак у краінах Еўрасаюза, праваахоўнікі дастаўляюць да граніцы збітых, вельмі знясіленых іншаземцаў і выкідваюць на тэрыторыю Беларусі», — адзначылі ў ДПК.
Тым часам Упраўленне вярхоўнага камісара ААН па справах бежанцаў (УВКБ) і Міжнародная арганізацыя па міграцыі (МАМ) заклікалі расследаваць выпадкі смерці бежанцаў і мігрантаў у раёне граніцы паміж Польшчай і Беларуссю. У распаўсюджанай у Жэневе сумеснай заяве яны таксама выказаліся за забеспячэнне неадкладнага доступу да ўсіх пацярпелых, каб аказаць ім медыцынскую і іншую дапамогу, паведаміла ТАСС. «УВКБ і МАМ усхваляваны і абураны выпадкамі смерці каля беларуска-польскай граніцы», — гаворыцца ў дакуменце. Дзве арганізацыі «выказваюць свае спачуванні сем'ям памерлых і заклікаюць да неадкладнага расследавання гэтай трагедыі». Падкрэсліваецца, што, згодна з наяўнымі звесткамі, «ад пераахаладжэння памерлі два іракскія грамадзяніны».
УВКБ і МАМ заклікалі таксама забяспечыць «неадкладны доступ да тых, хто пацярпеў, каб аказаць неабходную для выратавання жыцця медыцынскую дапамогу, харчаванне, ваду і дах над галавой, асабліва з улікам надыходу зімы». Як адзначылі аўтары заявы, апошнія месяцы «групы людзей, якія шукаюць прыстанак, і мігрантаў праходзілі транзітам праз Беларусь у пошуку прыстанку ў суседніх дзяржавах ЕС — Літве, Латвіі і Польшчы». У сувязі з гэтым УВКБ і МАМ «з усё большай заклапочанасцю сочаць за паведамленнямі аб адмове ва ўездзе людзям на гэтых граніцах», паколькі «групы людзей на працягу тыдняў знаходзяцца ў цяжкім становішчы, не маюць доступу да якой-небудзь дапамогі, атрымання прыстанку або да базавых паслуг». Пры гэтым «многія былі пакінуты ў цяжкай сітуацыі» і церпяць ад гіпатэрміі. Некаторыя былі выратаваны з балот. Ва УВКБ і МАМ лічаць, што ў такіх умовах неабходна дзейнічаць у адпаведнасці з міжнароднымі прававымі абавязацельствамі. Дзяржавы павінны супрацоўнічаць у вырашэнні цяперашняй сітуацыі, аддаючы прыярытэт правам чалавека. Дзве арганізацыі нагадалі, што выдварэнне асоб, якія шукаюць прыстанішча, ставіць пад пагрозу іх жыццё і з'яўляецца незаконным згодна з міжнародным правам.
УВКБ і МАМ падтрымліваюць кантакт з уладамі адпаведных краін у вывучэнні «розных варыянтаў для людзей, якія заселі на граніцах». Размова ідзе, у прыватнасці, аб забеспячэнні доступу да працэдур атрымання прыстанку і з'яднання сем'яў, а таксама аб магчымым добраахвотным вяртанні для тых, хто не мае патрэбы ў міжнароднай абароне. Як падкрэслілі аўтары дакумента, «мігранты і прасіцелі прыстанішча ніколі не павінны выкарыстоўвацца дзяржавамі для дасягнення палітычных мэт». Пры гэтым «палітычныя рознагалоссі па пытанні аб адказнасці ніколі не павінны прыводзіць да страты жыццяў».
Пётр ДУНЬКО
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.