Вы тут

Будзем з дранікамі


Яшчэ здалёк было чуваць, як у скверы 40 гадоў Перамогі ў Магілёве гучыць музыка і артысты нешта спяваюць пра бульбу і дранікі. Арганізатары прымеркавалі да чарговага кірмашу свята ў народных традыцыях «Багач». Пад спевы калектываў мастацкай самадзейнасці ішоў бадзёры гандаль сёлетнім ураджаем.


Сельскагаспадарчыя кірмашы працуюць у Магілёве з верасня і кожныя выхадныя мяняюць сваё месца дыслакацыі, каб быць бліжэй да спальных раёнаў. Жыхарам так лягчэй данесці дадому тавар. Гэтым разам гандаль разгарнуўся, лічы, у цэнтры горада, і народ ішоў сюды болей адпачыць, чым атаварыцца. У продажы было ўсё: пачынаючы ад шашлыкоў, заканчваючы садавіной-гароднінай. І ніхто без кліентаў не сумаваў.

На свята прыехалі аб'яднаныя праектам сыравары са Слаўгарадскага, Чэрыкаўскага і Краснапольскага раёнаў, прапаноўвалі «Фермерскі сыр для ўсёй сям'і». У асартыменце — 17 найменняў, і гэта толькі траціна ад таго, на што здольныя сыравары. Людміла Ерафеева са Слаўгарадскага раёна — сыравар са стажам, аўтарытэтна заяўляе, што з малаком праблем няма, а значыць, увесь год будзем са смачнымі самаробнымі сырамі. У суразмоўніцы, напрыклад, тры каровы і тры казы. Смяецца, што, калі попыт на малако павялічыцца, фермеры дапамогуць. Кожны дзень сыравары робяць па 10 кілаграмаў сыру, і ўсё разыходзіцца. У Людмілы нават аграсядзіба ў Гіжэнцы называецца «Сырная». Турысты там вельмі любяць адпачываць.

Іду да палаткі, дзе ўтварылася вялікая чарга. Высвятляецца, што бульба тут каштуе на 20 капеек танней, чым у астатніх, — усяго
рубель.

— Бульбу і іншую гародніну бяром у фермераў, — падзялілася прадавачка. — Танней ужо не будзе, бульба, наадварот, даражэе. І не толькі бульба — морква, сталовыя буракі, капуста. Фермеры дыктуюць сваю цану.

Прадаўцы з Дашкаўкі прапаноўвалі вырашчаную на сваіх палетках бульбу — жоўценькую, апетытную. Гэта папулярныя ў Беларусі познія сарты «Брыз» і «Гала». Народ між тым не спяшаўся купляць, бо цана — рубель дваццаць за кіло. Але шмат хто браў тэлефончык «на ўсялякі выпадак». Калі трэба, бульбу даставяць проста дадому. Цікаўлюся, чаму цана «кусаецца». У адказ хлопцы скардзяцца, што сёлетні ўраджай меншы чым леташні ў два разы. «Рубель дваццаць — адэкватная цана, — лічаць яны. — Гэта ж нядорага ў параўнанні з тым, колькі ў бульбу ўкладзена сіл».

А вось з рыбай сёлета ўраджай, смяецца хлопец, які гандлюе амурам і таўсталобікам. Ён прадстаўляе саўгас «Пална» з Быхаўскага раёна.

— Усе нашы прадпрыемствы прымаюць актыўны ўдзел у сельскагаспадарчых кірмашах у Мінску, Магілёве, Бабруйску і райцэнтрах, — падзялілася начальнік упраўлення гандлю аблспажыўтаварыства Нэлі БЯКАСАВА. — Мы прапаноўваем плодаагароднінную прадукцыю, дзікарослую ягаду, у тым ліку журавіны, а таксама мясныя вырабы. У мінулыя выхадныя ў скверы 40 гадоў Перамогі гандлявалі пяць нашых прадпрыемстваў. У Бабруйскім раёне мы ўдзельнічалі адразу ў трох кірмашах, непасрэдна ў горадзе — па вуліцы Максіма Горкага і на Бабруйскім рынку. А таксама выязджалі на свята «Глушанскі хутарок». Наогул, у Магілёве і Бабруйску на цэнтральных рынках мы ўсе дні акрамя панядзелка (выхадны дзень на рынках) прапаноўваем і мясную, і плодаагароднінную прадукцыю. На раёнах сельскагаспадарчую прадукцыю ў поўным асартыменце прапануюць крамы 15 райспажыўтаварыстваў.

Што датычыцца непасрэдна Магілёва, то тут графік па кірмашах распісаны да 7 лістапада. Напрыклад, у найбліжэйшыя выхадныя — 9 і 10 кастрычніка — яны разгорнуцца ў мікрараёнах Казіміраўка і Саломенка, а таксама ў раёне школы № 41 па вуліцы Фаціна.

— Ураджай сёлетні горшы па прычыне засушлівага лета, — паведаміў начальнік аддзела камітэта па сельскай гаспадарцы і харчаванні Ілья Мальчэўскі. — На 4 кастрычніка было прыбрана 60 % бульбы. Ураджайнасць 277 цэнтнераў з гектара супраць 352 леташніх. Горш урадзіла морква, капуста і сталовыя буракі. Але таго, што мы сабралі і яшчэ збяром, дакладна хопіць да будучага ўраджаю.

Нэлі ЗІГУЛЯ

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.