Вы тут

Як выбраць самыя дакладныя тэрмометр і танометр


У апошнія гады з прычыны пандэміі многія медыцынскія тэрміны сталі агульнаўжывальнымі словамі, і практычна ў кожным доме з'явіліся медыцынскія гаджэты, якія дапамагаюць сачыць за здароўем. Але сёння мы хочам пагаварыць не пра модныя пульсаксіметры, а пра самыя неабходныя прыстасаванні — тэрмометры для вымярэння тэмпературы цела і танометры, якія вымяраюць артэрыяльны ціск.


Дыстанцыйныя тэрмометры – ідэальны выбар для мам маленькіх дзяцей.

Але гэта не дакладна?

Восень і зіма, як вядома, — сезон абвастрэння рэспіраторных захворванняў. Штогадовыя эпідэміі грыпу і ВРВІ даўно сталі для нас звыклымі, а цяпер да іх дадаўся і ковід. Але які б шкодны вірус ні залез у ваш арганізм, важна зрэагаваць як мага раней. А значыць, тэрмометр павінен быць сёння ў кожным доме — гэта аксіёма. Бо тэмпература цела — найважнейшы паказчык здароўя.

Калі вы прадукт савецкай эпохі, то тэрмометр для вымярэння тэмпературы цела вы, хутчэй за ўсё, называеце градуснікам. Сучасная моладзь часцей кажа «тэрмометр», распавядае фармацэўт адной з мінскіх аптэк Любоў Казлевіч. Зрэшты, і старэйшае пакаленне, і маладыя пакупнікі ў большасці выпадкаў сёння не выбіраюць ртутны градуснік. А дарма. Фармацэўты сцвярджаюць, што менавіта гэты класічны прыбор прайшоў праверку часам і па-ранейшаму застаецца самым дакладным.

Медыкі называюць ртутны тэрмометр «максімальным», расказвае ўрач-гігіеніст Валянціна Гапановіч.

— Дасягаючы максімальнага значэння, слупок не апускаецца самастойна — градуснік трэба страсянуць, каб «абнуліць», — тлумачыць суразмоўца.

Безумоўныя плюсы ртутнага тэрмометра — высокая дакладнасць, даступны кошт (8-9 рублёў) і нескладанасць выкарыстання. А яшчэ — настальгія па дзяцінстве: класічны градуснік нязменна выклікае асацыяцыі з бацькоўскім клопатам, журавінавым морсам, утульнасцю і спакоем. Ну, а мінусы прыбора — неабходнасць беражлівых адносін да яго (шкляны градуснік лёгка разбіць) і тое, што ртуць атрутная. Менавіта таму сёння некаторыя медыкі заклікаюць ад яго адмовіцца.

Дарэчы, а вы ведаеце, што рабіць, разбіўшы ртутны градуснік?

— Найважнейшае пытанне — як паступіць, калі тэрмометр усё ж разбіўся. Перш-наперш патэлефанаваць у МНС або санітарна-эпідэміялагічную службу, — адзначае Валянціна Гапановіч. — Калі ртуць выцекла, эвакуіруйце ўсіх з пакоя. Галоўнае — не панікаваць. Калі разаб'ецца адзін ртутны градуснік, вы не атрымаеце вострага атручвання.

Збіраць ртуць з разбітага градусніка самастойна не варта. Бо калі некалькі шарыкаў ртуці затояцца ў кутку пакоя, яны будуць патроху атручваць вас і вашых блізкіх. Пры гэтым паху ртуць не мае і няўзброеным вокам яе пары не ўбачыш.

Зрэшты, альтэрнатыў гэтаму прыбору сёння на аптэчных паліцах дастаткова. Гэта галінстанавыя, электронныя і інфрачырвоныя тэрмометры.

Галінстанавы, ён жа бязртутны, тэрмометр — прамы спадчыннік вышэйапісанай класікі, толькі больш бяспечны. Вонкава ён мала адрозніваецца ад ртутнага, але ўнутры яго капіляра — не таксічная ртуць, а бяспечны для чалавека сплаў галінстан (волава, галій, індый). Прыбор не саступае ртутнаму градусніку ў дакладнасці, але куды больш бяспечны. Калі ён разаб'ецца, гэта не прычыніць ніякай шкоды, адзначае спецыяліст.

Ёсць у прыбора і мінус — яго таксама трэба страсянуць, каб «абнуліць» вымяральны слупок да нізкіх значэнняў. Вось толькі страсаць давядзецца вельмі моцна — гэты напаўняльнік не настолькі рухомы, як ртуць. Акрамя таго, прыціскаць бязртутны тэрмометр да скуры трэба мацней, чым ртутны, каб атрымаць дакладны вынік без хібнасцяў. Каштуе бязртутны градуснік у сярэднім 14-15 рублёў.

Лічбавы электронны тэрмометр — найбольш распаўсюджаны сёння прыбор для вымярэння тэмпературы: ён ёсць практычна ў кожнага. Напэўна, яго бачылі ўсе: пластыкавы корпус і дысплей, на які выводзіцца вынік вымярэнняў. Аб заканчэнні вымярэнняў прыбор апавяшчае гукавым сігналам.

— Сярэдні час вымярэння тэмпературы цела з дапамогай электроннага градусніка — 3—5 хвілін. Але рэкамендуецца патрымаць яго яшчэ пару хвілін для дакладнасці, — адзначае Валянціна Гапановіч.

Да плюсоў прыбора адносяцца бяспека і магчымасць захаваць даныя папярэдніх замераў у памяці тэрмометра. Ну, а мінусы — тое, што калі прыціскаць яго да цела няшчыльна, паказанні будуць далёкія ад рэальных. І тут больш высокая ў параўнанні з ртутным цана, вядома (у сярэднім ад 15 да 20 рублёў).

Лічбавы электронны тэрмометр – найбольш распаўсюджаная прылада для вымярэння тэмпературы цела.

Інфрачырвоны тэрмометр, ён жа бескантактавы, або дыстанцыйны, — ідэальны выбар для мам маленькіх дзяцей. Даведацца пра тэмпературу з яго дапамогай можна літаральна за 1-2 секунды. У сувязі з супрацьэпідэмічнымі мерапрыемствамі ў апошнія гады такія градуснікі бачылі, напэўна, усе — гэта тыя «пісталецікі», якія выкарыстоўваюць у фае паліклінік, каб выявіць хворых наведвальнікаў.

— Бескантактавы тэрмометр фіксуе цеплавое выпраменьванне цела чалавека і выводзіць паказанні на экран, — тлумачыць Любоў Казлевіч.

Пры выбары гэтага тэрмометра варта звярнуць увагу на такія характарыстыкі прыбора, як хібнасць вымярэнняў (выбірайце тыя, у якіх яна не перавышае
0,3 градуса), а таксама, колькасць апошніх вымярэнняў у памяці.

Месцы вымярэння тэмпературы такім тэрмометрам — лоб, скроні. Ёсць таксама тэрмометры, якімі вымяраць тэмпературу трэба ў вушной ракавіне.

Безумоўнымі плюсамі прыбора можна назваць прастату і хуткасць выкарыстання, а мінусы — магчымая недакладнасць, а таксама высокая цана (у сярэднім ад 45—50 рублёў, але па акцыі можна знайсці і за 29). І яшчэ адзін нюанс: інфрачырвонаму тэрмометру трэба «даваць адпачываць». Занадта частае вымярэнне тэмпературы прыводзіць да награвання прылады, а гэта дрэнна ўплывае на яго дакладнасць, распавяла супрацоўнік аптэкі.

Важнае пытанне: колькі трымаць кожны тэрмометр, каб паказанні былі дакладныя?

— Каб атрымаць дакладныя паказанні ртутнага тэрмометра, аптымальны час, які яго варта трымаць пад пахай, складае каля 5 хвілін, — распавядае Валянціна Гапановіч. — Галінстанавы медыцынскі тэрмометр таксама трымаюць пад пахай 3—5 хвілін. Інфрачырвонай прыладзе патрабуецца некалькі секунд. Лічбавы градуснік пакажа тэмпературу за перыяд ад 10-20 секунд да 3 хвілін у залежнасці ад мадэлі.

Не трэба ціснуць!

Высокі артэрыяльны ціск — адна з самых распаўсюджаных праблем сучаснага чалавека. І гіпертанія часта абвастраецца (або ўпершыню праяўляе сябе) з прыходам восені. Пахаладала, і нам хочацца сагрэцца — напрыклад, кубачкам духмянай кавы. Надвор'е за акном сумнае, і мы дадаем да кавы пірожнае, каб узняць настрой. Кафеін выводзіць з арганізма ваду, цукар у залішніх колькасцях загушчае кроў. Вынік — высокія лічбы АЦ, галаўны боль, шум у вушах.

З павышаным артэрыяльным ціскам многія маюць справу гадамі, нават не здагадваючыся пра гэта, кажуць медыкі. І папярэджваюць: бестурботнае стаўленне да лічбаў ціску — шлях да сур'ёзных наступстваў. Словам, танометр — яшчэ адзін musthave ў кожным доме. Кардыёлагі раяць рэгулярна вымяраць артэрыяльны ціск нават маладым людзям — проста каб мець уяўленне, што адбываецца з іх сардэчна-сасудзістай сістэмай. Калі ў выпадку з'яўлення высокіх лічбаў АЦ зрэагаваць хутка, гэта дазволіць пазбегнуць гіпертанічнага крызу. Такім чынам, выбіраем танометр. І пачнём з механічнага. Як і ў выпадку з тэрмометрамі, старая добрая класіка была і застаецца эталонам дакладнасці. Але з агаворкай: у руках медыцынскага супрацоўніка. Або проста дасведчанага ў зносінах з гэтым «капрызным» прыборам чалавека. Механічны танометр патрабуе некаторага спрыту: каб вымераць з яго дапамогай ціск маме або бабулі, а тым больш самому сабе, неабходна папрактыкавацца.

У выпадку вымярэння ўласнага ціску вам давядзецца пампаваць грушу, напружваць увагу і прыслухоўвацца, каб улавіць тоны сэрца. А такія «практыкаванні» якраз і павышаюць ціск, асабліва калі вы да іх не прывыклі. І ў выніку паказанні прыбора будуць вышэйшымі, чым рэальныя, адзначаюць супрацоўнікі аптэк.

Плюсамі прылады з'яўляюцца яе даўгавечнасць (ламацца там асабліва няма чаму) і вельмі бюджэтная цана (ад 32 рублёў). Мінус — некаторая складанасць выкарыстання для пачаткоўцаў.

Электронныя аўтаматычныя танометры сёння выбіраюць часцей за ўсё.

Асучаснены варыянт класічнага танометра — паўаўтаматычны прыбор. Тут вынік вымярэнняў вы ўбачыце на экране, але пампаваць грушу для нагнятання паветра ў манжэту вам усё роўна прыйдзецца. Гэта значыць, магчымасць больш высокіх лічбаў верхняга і ніжняга ціску не выключаная. Плюсы — цэнавы фактар (ад 60 рублёў) і прастата ў выкарыстанні ў параўнанні з механічным. Мінусы — магчымая недакладнаць вымярэнняў у сувязі з тым, што вам прыйдзецца актыўна працаваць далонню і пальцамі (як і ў папярэднім выпадку).

Электронны аўтаматычны танометр сёння выбірае большасць пакупнікоў, распавядалі ў аптэках Мінска. Такія прыборы простыя ў выкарыстанні і досыць дакладныя, падыдуць як пачаткоўцам, так і гіпертонікам «са стажам». Варыянтаў у аптэках мноства: ад простых да складаных з безліччу опцый. Ёсць мадэлі, якія разлічваюць сярэдняе значэнне трох замераў, здольныя знайсці сярэдні паказчык вашага ціску за тыдзень і нават весці дзённік замераў (які патрэбны вашаму доктару, калі ў вас гіпертанія). А таксама мераюць пульс і могуць дыягнаставаць мігальную арытмію. Гэта плюсы. Адзіны мінус — высокая цана. Але яна значна вар'іруецца ў залежнасці ад колькасці опцый і вытворцы. Сёння, адзначае спецыяліст, найбольш часты выбар — адносна нескладаныя аўтаматычныя танометры з найбольш патрэбнымі функцыямі (у сярэднім яны абыдуцца рублёў у 80—120). Звычайна пакупнікам важна, каб у памяці прыбора захоўваліся папярэднія вымярэнні, а таксама яго ўменне падлічваць сярэдняе значэнне трох вымярэнняў, вырабленых адно за адным, — гэта найбольш дакладны вынік і менавіта так рэкамендуюць мераць ціск кардыёлагі. Зрэшты, калі вы без двоек скончылі сярэднюю школу, то, напэўна, зможаце вылічыць сярэдняе арыфметычнае трох замераў вашага ціску і без удзелу электронікі — з дапамогай аркуша паперы і ручкі.

— Набываючы танометр, важна правільна выбраць манжэту, — адзначае фармацэўт любоў Казлевіч. — Калі вы будзеце ведаць абхоп рукі там, дзе надзяваецца манжэта (змерце руку кравецкім метрам перад купляй танометра), спецыяліст у аптэцы падбярэ патрэбны памер.

Манжэта — першае, што перастае функцыянаваць у такім прыборы. Сам ён досыць даўгавечны (гарантыю на яго даюць 10 і больш гадоў), а манжэту можна праз пару гадоў памяняць.

Каб вымяраць ціск правільна з дапамогай танометра любой мадыфікацыі, трэба памятаць аб важных правілах, патлумачыла спецыяліст. Перш за ўсё, не варта пераціскаць адзеннем руку ні на плячы, ні бліжэй да запясця — гэта паўплывае на паказанні прыбора. Манжэту надзяваем на тую руку, якую ў паўсядзённым жыцці выкарыстоўваем менш (ляўшы — на правую, праўшы — на левую). Нельга скрыжоўваць ногі і тым больш сядзець, закінуўшы нагу на нагу. Пастава павінна быць свабоднай і зручнай. Вымяраць ціск неабходна моўчкі і не раней чым праз паўгадзіны пасля прыёму ежы.

Аляксандра АНЦЭЛЕВІЧ

Выбар рэдакцыі

Грамадства

Як навучыць дзіця рацыянальна карыстацца грашыма? Парады псіхолага

Як навучыць дзіця рацыянальна карыстацца грашыма? Парады псіхолага

Дзіцяці абавязкова трэба ведаць: Што такое грошы? Навошта яны патрэбны?

Грамадства

У Беларускім дзяржаўным музеі гісторыі Вялікай Айчыннай вайны адкрылася выстаўка «Бітва за Маскву. Бессмяротнасць подзвігу».

У Беларускім дзяржаўным музеі гісторыі Вялікай Айчыннай вайны адкрылася выстаўка «Бітва за Маскву. Бессмяротнасць подзвігу».

Як адзначыла старшыня Савета Рэспублікі Нацыянальнага сходу Наталля Качанава, Вялікая Айчынная вайна і ўсё, што звязана з ёй, — святое.

Палітыка

Крызіс на мяжы. Уся аператыўная інфармацыя на пятніцу (абнаўляецца)

Крызіс на мяжы. Уся аператыўная інфармацыя на пятніцу (абнаўляецца)

Аператыўная інфармацыя з беларуска-польскай мяжы.