Віцебскі дзяржаўны індустрыяльны каледж працуе толькі з пачатку сёлетняга вучэбнага года. Аднак ахвотных вучыцца тут па некаторых спецыяльнасцях больш, чым у прэстыжных універсітэтах краіны: конкурс два з паловай чалавекі на месца. Попыт на выпускнікоў перавышае прапанову ў чатыры разы. У гэтай установе адукацыі рэалізоўваюць пілотны праект «Інклюзіўны касір», дзякуючы якому людзі з абмежаванымі магчымасцямі могуць атрымаць запатрабаваную кваліфікацыю і ўладкавацца на працу ў адзін з самых буйных у Беларусі гандлёвых рытэйлераў.
Новая навучальная створана не з нуля, яна атрымала новы статус, працягваючы найлепшыя традыцыі дзяржаўнага політэхнічнага прафесійнага ліцэя і індустрыяльна-педагагічнага каледжа.
Паводле слоў дырэктара ўстановы адукацыі дэпутата Віцебскага абласнога Савета Руслана Вінакурава, у абедзвюх установах рыхтавалі прадстаўнікоў або аднолькавых, або блізкіх прафесій сферы гандлю і паслуг.
Сёння агульная колькасць навучэнцаў перавышае тысячу чалавек. Іх вучаць прыкладна дзвесце выкладчыкаў.
Аптымізацыя дазволіць акумуліраваць і больш прадумана расходаваць бюджэтныя сродкі. А якасць навучання, і без таго высокая, будзе павышацца, адпавядаць патрэбам рынку працы.
У хлопцаў і дзяўчат не адбылося ніякіх пагаршэнняў з-за змены статусу і назвы навучальнай установы. Тут можна атрымаць прафесіі пекара, афіцыянта, бармена, кандытара, кухара, кантралёра-касіра, прадаўца... І нават дзве адначасова. Не кажучы пра тое, што навыкі кухара і кандытара карысна атрымаць для жыцця.
Такія спецыялісты лёгка знаходзяць працу як на радзіме, так і за яе межамі. Трэнд часу — развіццё сферы харчавання. Яго не змяніла нават пандэмія COVІD-19 і звязаныя з ёй абмежаванні. У Віцебскі індустрыяльны каледж прыязджаюць вучыцца і жыхары прыгранічных расійскіх рэгіёнаў. Дарэчы, выпускнікі — кандытары, кухары і іншыя маладыя спецыялісты — маюць магчымасць выбіраць для працаўладкавання найбольш аптымальныя варыянты з мноства тых, дзе іх чакаюць.
У навучальнай установе ёсць рэсурсны цэнтр з добрай сталовай і стыльнай кавярняй. Там гатуюць і падаюць стравы навучэнцы. Гэта — практычныя заняткі пад кіраўніцтвам выкладчыкаў, што, дарэчы, станоўча адлюстроўваецца на кошце. А каля крамы на колах у двары каледжа выстройваюцца чэргі па гарачыя піражкі і іншую смакату. Нядаўна адкрылася яшчэ адна крама, там акцэнт зроблены на натуральныя інгрэдыенты.
У каледжы працэс навучання максімальна практыка-арыентаваны, падкрэсліла намеснік дырэктара па вучэбна-вытворчай рабоце Марына Уласевіч.
У кавярню каледжа з задавальненнем ходзяць гараджане і прыезджыя. Адна з цікавостак — гарбата тут падаграваецца ў чайніку свечкай. Дызайн і мэбля прадуманы і зроблены рукамі выкладчыкаў і навучэнцаў. Для абслугоўвання заказалі адмысловае праграмнае забеспячэнне: юныя афіцыянты падыходзяць да столікаў з планшэтамі. Штучны інтэлект кантралюе, колькі і чаго заказалі, якая страва самая папулярная, ці ёсць дэфіцыт, ці хапае вытворчых інгрэдыентаў.
У кавярні і на кухні адпрацоўваюць тэарэтычныя веды на практыцы навучэнцы каля дзесяці навучальных устаноў вобласці. Вопытам дзеляцца метадам «роўны роўнаму».
Аўтара гэтых радкоў зацікавіла магчымасць навучыцца рабіць цукеркі. Аказваецца, усе ахвотныя могуць за грошы наведваць майстар-класы. За пару дзён навучаць размаўляць з шакаладам на «ты».
Раней кулінарыць вучылі людзей з інваліднасцю, цяпер яны могуць тут атрымаць прафесію. Адзін з рэалізатараў праекта — Віцебская аб'яднаная арганізацыя «Рэспубліканскай асацыяцыі інвалідаў-калясачнікаў».
Урокі пачаліся ў канцы лета. Працягласць навучання — менш чым палова года. На заняткі і дадому, калі трэба, могуць прывозіць на спецыяльным транспарце. Гэта было прадумана падчас падрыхтоўкі праекта, які ажыццяўляецца пры фінансавым удзеле адной з нямецкіх дабрачынных арганізацый.
У памяшканні для заняткаў ёсць копія месца працы будучага выпускніка ў гандлёвым цэнтры. Сюды прыязджаюць вучыцца не толькі з Віцебшчыны, але і з Міншчыны.
Карэспандэнт пагутарыў з будучымі касірамі. Казалі, што вучыцца вельмі цікава, выкладчыкі да іх ставяцца як да блізкіх.
Напрацаваны вопыт будзе пераймацца ў іншых абласцях Беларусі. Зацікаўленасць выказваюць і буйныя гандлёвыя карпарацыі.
Аляксандр ПУКШАНСКІ
Фота аўтара
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».