У Польшчы знайшлі старажытнае ювелірнае ўпрыгожванне

У польскай пячоры Стайня навукоўцы знайшлі самае старажытнае з вядомых навуцы ювелірных упрыгожванняў. Гэта падвеска са слановай косці ўзростам больш за 41,5 тыс.гадоў. Апісанне знаходкі апублікаваў навуковы часопіс Scientific Reports, перадае ТАСС.

«Гэта ўпрыгожванне кажа аб незвычайных творчых здольнасцях людзей, якія жылі тут, а таксама аб іх уменні звяртацца з прыладамі працы. Таўшчыня падвескі складае ўсяго 3,7 мм, што кажа аб неверагодным спрыце, з якім у ёй былі зробленыя адтуліны і начэрчаныя ўзоры», — распавяла Віялета Навачэўска, адзін з аўтараў артыкула, навуковы супрацоўнік Вроцлаўскага ўніверсітэта.

Да нядаўняга часу навукоўцы лічылі, што чалавечая культура, у тым ліку абстрактнае выяўленчае мастацтва, рэлігія і розныя ўяўленні аб тым свеце, з’явіліся адносна нядаўна — ужо пасля таго, як нашы продкі перайшлі да аселага ладу жыцця. У апошнія гады гэтыя ўяўленні пачалі падвяргацца сумневам дзякуючы некалькім знаходкам у Еўропе і Азіі.

У прыватнасці, навукоўцы выявілі, што старажытныя жыхары Паўднёва-Усходняй Азіі асвоілі абстрактнае выяўленчае мастацтва ўжо 44 тыс. гадоў таму, а іх сучаснікі з Еўропы ўжо ў гэты час пачалі здзяйсняць нешта, падобнае на рэлігійныя абрады. Вывучэнне магіл неандэртальцаў у Іраку і Іспаніі паказвае, што гэта магло быць характэрна не толькі для краманьёнцаў, але і для іх вымерлых суседзяў.

Навачэўска і яе калегі высветлілі, што аналагічныя здольнасці былі і ў тых, хто прыкладна ў гэты ж час, у канцы палеаліту, жыў на тэрыторыі сучаснай Польшчы. Гэта адкрыццё навукоўцы зрабілі падчас працы ў пячоры Стайня, якая размешчана на поўдні краіны, у некалькіх кіламетрах ад Кракава.

У адкладах часоў позняга палеаліту навукоўцы знайшлі два незвычайныя прадметы — падвеску са слановай косці і касцяное шыла. Радыёвугляродны аналіз паказаў, што ўзрост артэфактаў складае каля 41,5 тыс. гадоў. Гэта робіць падвеску самым старажытным з вядомых навуцы ювелірным упрыгожваннем свету. Выходзіць, што гэтыя артэфакты вырабілі першыя краманьёнцы Еўропы, а не неандэртальцы, якія ўжо вымерлі да таго часу.

Асаблівую цікавасць, па словах навукоўцаў, у іх выклікала падвеска. Яна ўяўляе сабой тонкую касцяную пласцінку таўшчынёй 3,7 мм, даўжынёй і шырынёй у некалькі сантыметраў. Яна пакрыта ўзорам з акружнасцяў і ліній. Навукоўцы мяркуюць, што яны складаюцца ў дыяграму фаз Месяца ці ж падліковую таблічку. У кутах пласцінкі былі прасвідраваныя дзве невялікія адтуліны.

Што цікава, падобныя, але менш старажытныя ўпрыгажэнні падобнага роду былі раней знойдзеныя антраполагамі і ў іншых рэгіёнах Еўропы. Гэта сведчыць на карысць таго, што традыцыі іх вырабу маглі спантанна з’явіцца ў канцы палеаліту адразу ў некалькіх рэгіёнах Еўропы, а не ў адной яе кропцы, як лічылі многія антраполагі раней, падсумавалі Навачэўска і яе калегі.

Прэв’ю: pixabay.com