Вы тут

Як правільна аднаўляцца пасля COVID-19?


Нават у лёгкай форме перанесеная каранавірусная інфекцыя не праходзіць для арганізма бясследна. Пасля папраўкі многія скардзяцца на зніжэнне працаздольнасці, частыя галавакружэнні, сухі кашаль, боль у грудзях, аддышку пры хуткай хадзе або любой фізічнай нагрузцы і г. д. Такі стан можа доўжыцца не тыдні, а месяцы.


Фота: pixabay.com

Пра тое, як правільна арганізаваць перыяд аднаўлення і рэабілітацыі расказвае ўрач па медыцынскай прафілактыцы Мінскага абласнога цэнтра гігіены, эпідэміялогіі і грамадскага здароўя Ганна Радзіч.

Нажаль, на сённяшні дзень няма адмысловых медыкаментаў ці тэхналогій, якія дапамогуць хутка аднавіць здароўе пасля COVID-19. Аднак ёсць комплекс мерапрыемстваў, каб падтрымаць аслаблены арганізм.

Гэты комплекс уключае ў сябе:

  • Дыхальную гімнастыку;
  • Фізічную актыўнасць;
  • Псіхаэмацыйны стан.

Чалавеку, які перанёс каранавірус і пнеўманію, перш за ўсё, неабходны спакой і правільны пітны рэжым з ужываннем не менш за 2 літраў вады ў суткі. Дыетолагі раяць тым часам лёгкае харчаванне: супы-пюрэ, стравы на пару, выключыць смажанае, салодкае, кансервы, фаст-фуд. І, натуральна, звесці да мінімуму паступленне ў арганізм нікатыну, кафеіну і алкаголю.


Дыхальная гімнастыка

Існуе мноства дыхальных практык, якія не патрабуюць спецыяльнай падрыхтоўкі, іх можна выконваць самастойна ў хатніх умовах у добра праветраным памяшканні.

Варыянт 1. Сядзьце ў зручнае становішча так, каб спіна мела добрую апору, пакладзяце адну руку на грудзі, а другую — на жывот. І сканцэнтруйцеся на дыханні. Рабіце павольныя ўдыхі праз нос (ці рот, калі не можаце інакш) і павольныя выдыхі праз рот. Старайцеся дыхаць павольна, расслаблена, роўна і спакойна, прыкладаючы як мага менш намаганняў. Спачатку дыхайце так, каб паднімалася толькі рука, якая ляжыць на грудзях. Затрымайце паветра і затым выдыхніце яго праз рот. Паўтарыце некалькі разоў.

Цяпер наадварот, дыхайце так, каб паднімалася толькі рука, якая ляжыць на жываце. Грудзі не павінны рухацца. Паўтарыце некалькі разоў.

Затым паспрабуйце па чарзе дыхаць так, каб спачатку паднімалася рука, якая ляжыць на жываце, а потым рука, якая ляжыць на грудзях. Пасля гэтага дыхайце глыбока, выкарыстоўваючы адначасова абодва віды дыхання. Рабіце невялікія паўзы паміж удыхам і выдыхам.

Варыянт 2. Можна выкарыстоўваць метранамізаванае дыханне: павольнае глыбокае дыханне жыватом. Гэта дыханне карысна практыкаваць, напрыклад, пры ўздыме па ўсходах ці па дарозе, якая ідзе ўверх, «пад горку».

Павольнае дыханне таксама дапамагае зменшыць стрэс і з’яўляецца яшчэ адной разнавіднасцю рэлаксацыі.


Фізічная актыўнасць

Памяншэнню стрэсу пасля перанесенага небяспечнага захворвання і зніжэнню верагоднасці развіцця дэпрэсіі садзейнічае фізічная актыўнасць. Яе інтэнсіўнасць трэба павялічваць паступова. Пачынаць можна з пешых прагулак на свежым паветры. Патроху павялічвайце адлегласць, старайцеся шпацыраваць у лесапаркавай зоне па перасечанай мясцовасці, з уздымам у гару і спускам уніз. Калі сілы адновяцца, можна вярнуцца да заняткаў у басейне і яздзе на веласіпедзе.

Выконвайце дома нескладаныя практыкаванні: а) седзячы на крэсле; б) нахілы стоячы і разнапланавыя рухі рукамі, уцягваючы ў дзейнасць аддзелы пазваночніка; в) практыкаванні лежачы на дыване; г) хадзьба на месцы з глыбокімі ўдыхамі-выдыхамі і інш. Большасць гэтых практыкаванняў мы рабілі на школьных уроках фізкультуры.

Практыкаванні рэкамендуецца рабіць у тры падыходы па 7-10 паўтораў кожнае, з кароткім перапынкам для адпачынку. Можна пачынаць з меншай колькасці паўтораў, паступова давёўшы іх лік да 10.

Калі практыкаванні выконваюцца без цяжкасцяў і ў поўным аб’ёме, то выкарыстоўвайце абцяжарванне, каб прымусіць вашыя мышцы працаваць мацней. Гэта могуць быць невялікія гантэлі ці пластыкавыя бутэлькі з вадой. Не забывайце трымаць выправу і ўцягваць жывот, выконвайце практыкаванні ў павольным тэмпе. Рабіце ўдых, калі рыхтуецеся выканаць самую цяжкую частку практыкаванні, і выдых — калі прыкладаеце намаганне.

Практыкаванні рэкамендуецца рабіць на працягу 20-30 хвілін 5 дзён у тыдзень. Дарэчы, да ліку практыкаванняў можа быць аднесена любая фізічная актыўнасць, у выніку якой глыбіня і частата дыхання ўмерана павялічваюцца.

Каб не падвяргаць арганізм перагрузкам, працягласць і інтэнсіўнасць практыкаванняў варта павялічваць паступова.


Псіхаэмацыйны дабрабыт

Для поўнай папраўкі гэта мае вельмі вялікае значэнне. Першым чынам, не сыходзьце ў сябе, імкніцеся падтрымліваць сацыяльныя сувязі. Гутаркі з блізкімі сябрамі і сваякамі не толькі памяншаюць стрэс, але і дапамагаюць знайсці спосабы пераадолення цяжкасцей, звязаныя з аднаўленнем ранейшага ўзроўню здароўя і актыўнага жыцця.

Пачніце з расслабляльных відаў дзейнасці. Слухайце прыемную музыку, гледзіце кінафільмы. Важна чытаць — гэта дапаможа аднаўленню функцый галаўнога мозгу, хоць пры наяўнасці такіх сімптомаў, як слабасць, галаўны боль і хуткая стамляльнасць, гэта будзе няпроста. Галаваломкі, гульні са словамі і лікамі карысныя для развіцця памяці і дапамогуць вярнуць хуткасць рэакцый. Не забывайце пра хобі — заняткі любімай справай спрыяюць паляпшэнню настрою.

Працэс вяртання да ранейшага ўзроўню паўсядзённай актыўнасці павінен быць паступовым. Не спрабуйце рабіць усё і адразу, пакуль не адчуеце, што гатовы да выканання сваіх ранейшых функцый. Аднаўленне пасля каранавіруса можа заняць не адзін месяц, таму назапасьцеся цярпеннем і планамерна пад кантролем урача рухайцеся наперад.

Друкуецца ў часопісе «Алеся»

Выбар рэдакцыі

Рэгіёны

Сок з дастаўкай і з ледзяшамі: на Брэстчыне пачаўся сезон нарыхтоўкі бярозавіку

Сок з дастаўкай і з ледзяшамі: на Брэстчыне пачаўся сезон нарыхтоўкі бярозавіку

Як мы бярозавік куплялі на гандлёвай пляцоўцы лясгаса і ў лясніцтве

Культура

Анатоль Ярмоленка: Нас натхняе беларуская паэтычная класіка

Анатоль Ярмоленка: Нас натхняе беларуская паэтычная класіка

Творчая вечарына народнага артыста Беларусі прайшла ў адной з мінскіх гімназій.