У сталіцы з’явілася новая база для заняткаў біятлонам

Для дзяцей, якія займаюцца ў Мінскай гарадской прафсаюзнай спартыўнай школе па зімовых відах спорту, абсталявана новая спецыялізаваная пляцоўка для заняткаў на адкрытым паветры, уладкаваныя бытавыя памяшканні, закуплены спартыўны інвентар, рыштунак і трэнажоры. Як паведамілі ў прэс-службе ФПБ, праект рэалізуецца Федэрацыяй прафсаюзаў пры падтрымцы Міністэрства спорту і турызму і Нацыянальнага алімпійскага камітэта.

Трэба сказаць, што на дадзены момант у сістэме Федэрацыі прафсаюзаў дзейнічаюць 103 спартшколы. Большая іх частка будавалася дастаткова даўно, яшчэ ў савецкія часы, таму ў апошнія гады прафсаюзы мэтанакіравана абнаўляюць матэрыяльна-тэхнічную базу гэтых спартыўных устаноў: укладвае сродкі ў рамонт памяшканняў, спартыўных залаў, набыццё сучаснага спартыўнага рыштунку.

У прыватнасці, за некалькі гадоў абноўлены больш за 100 спартыўных аб'ектаў, з’яўляюцца дадатковыя аддзяленні па запатрабаваных напрамках.

– Сёння не толькі дзеці, але і ўсё больш дарослых хочуць займацца спортам. Спорт – гэта настрой, характар, здароўе. Таму вельмі важна, каб была даступнасць такіх заняткаў, – падкрэсліў на адкрыцці старшыня Федэрацыі прафсаюзаў Міхаіл Орда. – Нашы спартыўныя прафсаюзныя школы якраз і працуюць для гэтага. У нас усе заняткі праходзяць на бясплатнай аснове. Мы бяром усіх жадаючых дзяцей. Не важна, ёсць здольнасці, няма – галоўнае жаданне і воля. І вядома, мы стараемся забяспечыць камфортныя ўмовы для заняткаў. Мы гэта робім не толькі дзеля высокіх дасягненняў, але і дзеля таго, каб у дзяцей было больш магчымасцяў рэалізаваць сябе, правесці час з карысцю.

Трэба адзначыць, што менавіта зімовыя віды спорту з'яўляюцца аднымі з найбольш масавых і запатрабаваных сярод дзяцей, якія займаюцца ў спартшколах прафсаюзаў. Што датычыцца непасрэдна біятлону, то ўсяго ў краіне дзейнічаюць чатыры такія аддзяленні, у якіх трэніруюцца звыш 630 дзяцей і падлеткаў пад кіраўніцтвам парадку 40 вопытных педагогаў.

Як адзначыў міністр спорту і турызму Сяргей Кавальчук, абнаўленне базы Мінскай гарадской прафсаюзнай спартшколы па зімовых відах спорту ўжо стала імпульсам для прыцягнення дзяцей у спорт. У школу набралі тры дадатковыя групы па пачатковай падрыхтоўцы – гэта больш за 100 дзяцей.

– Зроблены рамонт – і гэта толькі пачатак. Калі будзеце якасна, добра займацца, паказваць вынікі, пераходзіць у вышэйшую звяно падрыхтоўкі, мы можам далей развіваць школу, – звярнуўся да выхаванцаў установы міністр спорту. – Гэтая школа – наш падарунак вам, ну а за вамі – вашы годныя выступы.

Таксама сваю падтрымку школе аказаў і Нацыянальны алімпійскі камітэт: прадстаўнікі спартыўнага ведамства ўручылі сертыфікат больш чым на 16 тысяч рублёў для закупкі спортінвентару і рыштунку.

Наша даведка

Мінская гарадская СДЮШАР прафсаюзаў па зімовых відах спорту з’явілася ў 1972 годзе.

Цяпер у спартшколе займаюцца 223 чалавекі, у тым ліку на аддзяленні біятлону – 118. У трэнерскім складзе – 15 педагогаў.

У 2020 годзе перададзена ў вышэйшую звяно падрыхтоўкі 7 чалавек, у 2021-м  – тры.

Выхаванцы спартшколы ў складзе нацыянальнай каманды – Святлана Андрыюк (лыжныя гонкі), Аліна Пільчук (біятлон). У зборных камандах – 5 чалавек.