Старшыня Віцебскага аблвыканкама Аляксандр Субоцін, якога нядаўна прызначылі на пасаду, павіншаваў з каляднымі і навагоднімі святамі выхаванцаў Дзіцячага дома Віцебска. Гэта адбылося ў рамках рэспубліканскай акцыі «Нашы дзеці». З ім у госці да дзятвы завіталі іншыя афіцыйныя асобы абласнога і гарадскога ўзроўняў улады.
У гэтай установе на сёння знаходзяцца семдзесят хлопчыкаў і дзяўчынак ва ўзросце ад трох да шаснаццаці гадоў. Калектыў стараецца стварыць сямейную атмасферу, у чым і ўпэўніліся члены афіцыйнай дэлегацыі.
У бягучым годзе каля дваццаці дзяцей вярнулі біялагічным бацькам, бо апошнія кардынальна змянілі сваё жыццё, кінулі ўжываць алкаголь. Прыкладна над столькімі ж дзецьмі аформілі апеку. Дзесяць дзяцей усынавілі, а яшчэ дзевяць цяпер у дзіцячых дамах сямейнага тыпу... І ў гэтым віцябчане самыя папяховыя ў Беларусі.
У якасці падарунка ад Аляксандра Субоціна дзіцячаму дому — тэлевізары, пыласос і акустычная сістэма.
У сваю чаргу кіраўнік абласнога выканкама атрымаў на памяць мяккую цацку — сімвал будучага года — тыграня, якога зрабілі выхаванцы пад кіраўніцтвам педагогаў.
Ад гарсавета ўстанове ўручаны сертыфікат на пакупку мэблі, а ад адміністрацыі Кастрычніцкага раёна горада Віцебска, на тэрыторыі якога знаходзіцца дзіцячы дом, — дакументы на набыццё новага халадзільніка.
Падчас мерапрыемства дзеці паказалі міні-спектакль, у канцы якога, безумоўна, перамагаюць любоў і сяброўства. Госці з задавальненнем бралі ўдзел у карагодах, падпявалі.
Аляксандр Субоцін пажадаў юным землякам, каб іх мары збываліся, каб яны верылі, што добрае і светлае абавязкова будзе ў іх жыцці.
Аляксандр ПУКШАНСКІ
Фота Алега КЛІМОВІЧА
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
