Міністр працы і сацыяльнай абароны Ірына Касцевіч паўдзельнічала ў навагодняй акцыі «Нашы дзеці» ў Івянецкім доме-інтернаце для дзяцей-інвалідаў з асаблівасцямі фізічнага развіцця.
Выхаванцы сустрэлі гасцей тэатральнай пастаноўкай «Навагодні цуд», прадэманстраваўшы свае акцёрскія таленты.
— Кіраўніцтва і супрацоўнікі Міністэрства традыцыйна ў рамках акцыі «Нашы дзеці» наведваюць дзевяць дамоў-інтэрнатаў для дзяцей-інвалідаў і Рэспубліканскі рэабілітацыйны цэнтр для дзяцей-інвалідаў — гэта нашы адрасы клопату. У гэтых дамах-інтэрнатах пражываюць каля 600 дзяцей з 3-й і 4-й ступенню страты здароўя. І плюс яшчэ маладыя інваліды, якія ўсё дзяцінства пражылі ў такіх установах і застаюцца тут, — сказала Ірына Касцевіч.
Міністр уручыла дзецям і выпускнікам памятныя і салодкія падарункі, а ўстанове — сертыфікат на дзве тысячы рублёў на набыццё кандыцыянера і іншых неабходных рэчаў. Дарэчы, сёлета работнікі цэнтральнага апарата і падпарадкаваных арганізацый ведамства сабралі больш як 22 тысячы рублёў, каб закупіць неабходныя для дзяцей тавары і абсталяванне.
Ірына Касцевіч адзначыла, што ў год на ўтрыманне дзевяці ўстаноў расходуецца каля 28 мільёнаў рублёў. А на адно дзіця ў Івянецкім доме-інтэрнаце — 2,7 тысячы ў месяц.
Пасля гасцям была прадстаўлена навагодняя выстава вырабаў «Калекцыя навагодніх ідэй», а таксама фотавыстава «Фарбы жыцця». Усе працы — творчасць выхаванцаў дома-інтэрната. Дзеці займаюцца дэкаратыўна-прыкладной і мастацкай творчасцю ў гуртках «Умелыя ручкі», «Па краінах і кантынентах», «Тэатр мініяцюр», «Творчыя майстэрні. Гідамі па выстаўцы выступілі двое рабят — Андрэй Клок і Алена Лысенка.
Прыехалі на сустрэчу і 12 выпускнікоў дома-інтэрната, якія расказалі дзецям і міністру пра тое, як склалася іх дарослае жыццё. Больш за чвэрць стагоддзя таму сцены інтэрната пакінула Ганна Гарчакова. Яна шматразовы чэмпіён свету па спартыўных танцах на інвалідных калясках, у яе скарбонцы каля 60 медалёў розных міжнародных спаборніцтваў. Ганна лаўрэат міжнароднай прэміі «Філантроп» і прэміі «Гонар нацыі, уладальніца звання «Мінчанін года — 2018» і іншых рэгалій. Ганна Гарчакова прыклад і натхненне для многіх юнакоў і дзяўчат, у тым ліку і без фізічных асаблівасцяў.
Выпускнікі інтэрната знайшлі сябе ў самых розных прафесіях — ад прадаўцоў у буйных гандлёвых сетках да праграмістаў.
Многія з іх стварылі сем’і і выхоўваюць дзяцей. Усяго з 1963 года ўстанова выпусціла больш за 850 выхаванцаў.
— Вы выходзіце ў дарослы свет, атрымліваеце прафесію, знаходзіце каханне, ствараеце сям’ю, нараджаеце дзетак. Гэта вынікі і нашай работы. Мы ганарымся нашымі выпускнікамі. Яны заўсёды нашы дзеці, незалежна ад таго, колькі ім гадоў, — сказала на развітанне Ірына Касцевіч.
Намеснік міністра працы і сацыяльнай абароны Марына Арцёменка ў гэты дзень наведала Чэрвенскі дзіцячы дом-інтэртат і павіншавала выхаванцаў з надыходзячымі святамі. А ў Рэчыцкі дом-інтэрнат прыехала начальнік галоўнага ўпраўлення сацыяльнага абслугоўвання і сацыяльнай дапамогі Міністэрства працы і сацыяльнай абароны Кацярына Каляда. Усе выхаванцы атрымалі падарункі, а дзіцячыя ўстановы — грашовыя сертыфікаты.
Алена КРАВЕЦ
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».