Прэзідэнт Беларусі Аляксандр Лукашэнка ў Санкт-Пецярбургу прымае ўдзел у нефармальнай сустрэчы кіраўнікоў дзяржаў — удзельніц СНД. Беларускі лідар сёння раніцай прыбыў у Расійскую Федэрацыю з двухдзённым працоўным візітам, перадае БелТА.
Мерапрыемства праводзіцца ў Прэзідэнцкай бібліятэцы імя Б.Н.Ельцына. Лідары краін падвядуць вынікі старшынства Беларусі ў Садружнасці ў 2021 годзе, абмяняюцца думкамі па вырашэнні агульных актуальных праблем, абмяркуюць далейшыя меры па павышэнні эфектыўнасці супрацоўніцтва і сацыяльна-эканамічнаму развіццю краін СНД. Сустрэча знамянальная яшчэ і тым, што ў снежні споўнілася 30 гадоў з дня ўтварэння СНД.
Адкрываючы нефармальны саміт, Уладзімір Пуцін падкрэсліў, што бягучы год асаблівы для СНД — Садружнасці споўнілася 30 гадоў. «За мінулыя гады і дзесяцігоддзі шмат што кардынальна змянілася. Але само стварэнне арганізацыі было, безумоўна, апраўданым», — падкрэсліў расійскі лідар.
Ён адзначыў: інтэграцыя паглыблялася ў розных аспектах, у тым ліку ў сферах гарантавання бяспекі, эканомікі. А сувязі, якія захаваліся яшчэ са часоў СССР гуляюць сваю дадатковую ролю. Больш за тое, шмат што ўдалося не толькі захаваць, але і развіць на зусім новай базе. Гэта, упэўнены Прэзідэнт Расіі, дае магчымасць краінам праходзіць цяжкі час пандэміі, захоўваючы тыя магчымасці і канкурэнтныя перавагі, якія ім дасталіся з мінулага.
Адна з тэм нефармальнай сустрэчы — агульная барацьба з пандэміяй каранавіруснай інфекцыі. «Нашы калегі супрацоўнічаюць вельмі канкрэтна, глыбока», — падкрэсліў Уладзімір Пуцін.
Як паведамлялася БелТА, на 29 снежня запланавана сустрэча Аляксандра Лукашэнкі з Прэзідэнтам Расійскай Федэрацыі Уладзімірам Пуціным. Кіраўнікі дзяржаў абмяркуюць актуальныя пытанні беларуска-расійскага супрацоўніцтва.
У час саміту лідэры краін Садружнасці падрабязна абмеркавалі развіццё эпідэміялагічнай сітуацыі і прапановы па прыняцці дадатковых мер у барацьбе з пандэміяй COVID-19. Для гэтага на сустрэчу спецыяльна запрасілі кіраўніка Федэральнай службы па наглядзе ў сферы абароны правоў спажыўцоў і дабрабыту чалавека — галоўнага дзяржаўнага санітарнага ўрача Расіі Ганну Папову, якая выступіла па гэтай праблематыцы. Лідары СНД, рэагуючы на яе выступленне, агучылі сваё бачанне сітуацыі і задалі спецыялісту свае пытанні.
Аляксандр Лукашэнка ў сваю чаргу адзначыў, што для кіраўнікоў дзяржаў важна разумець, як будзе развівацца сітуацыя з пандэміяй у будучым. «Галоўнае пытанне для нас — пытанне прагнозу», — падкрэсліў беларускі лідар.
Ганна Папова адказала, што пытанне, як будзе развівацца сітуацыя ў будучым, дастаткова складанае. «Ні ў каго ў свеце адназначнага адказу, што будзе заўтра, не. Але абсалютна дакладна: калі мы сёння не будзем прышчапляцца і прымаць тыя санітарныя меры, якія прымаем, заўтра будзе значна горш, — падкрэсліла яна. — Які б ні прыйшоў штам, гэта штам гэтага ж віду, і таму вакцынная абарона будзе працаваць».
«Я размаўляў з кіраўніком Інстытута імя Гамалеі, яны правялі даследаванне: „Спадарожнік V“ дакладна нейтралізуе новы штам амікрон. Ён мне расказаў, што толькі клініка можа даваць канчатковы адказ на пытанне, у якой ступені, але ўзровень нейтралізацыі вельмі высокі», — заявіў у сваю чаргу Прэзідэнт Расіі Уладзімір Пуцін.
Аляксандр Лукашэнка ўдакладніў у галоўнага санітарнага ўрача Расіі, ці варта пасля мікрону чакаць новых штамаў каранавіруса.
«Ніводзін вірус не спыняецца ў сваім развіцці і чакаць, што амікрон будзе фінальным варыянтам... Які будзе наступны, сёння сказаць нельга, але любы вірус жыве толькі тады, калі ён мяняецца», — растлумачыла Ганна Папова.
«Скажыце, амікрон, калі размаўляць па-народнаму, лягчэй дэльты?» — задаў яшчэ адно ўдакладняючае пытанне кіраўнік беларускай дзяржавы.
Як расказала галоўны санітарны ўрач, расійскія спецыялісты пабывалі ў ПАР, каб вывучыць амікрон-штам. Высветлілася, што ў гэтай краіне вірус не выклікае цяжкай плыні хваробы, акрамя тых, хто не прышчэплены або мае спадарожныя захворванні. Аднак, растлумачыла Ганна Папова, магчыма, гэта з-за таго, што сярэдні ўзрост жыхароў ПАР да 30 гадоў, а маладыя людзі лягчэй пераносяць захворванне.
Не зусім паказальная, паводле яе слоў, і сітуацыя з амікронам у Вялікабрытаніі: там агульны ўзровень імунізацыі перавышае 80%.
«Нейкіх іншых сур’ёзных эпідэміялагічных назіранняў пакуль не апублікавана — мы вельмі ўважліва за гэтым сочым. Але тое, што ён (амікрон-штам. — Заўвага БелТА) значна больш заразны, больш людзей адразу заражаецца, — гэта вельмі важна. Таму што, калі ў віруса такая актыўнасць, у поле яго дзеяння з вялікай верагоднасцю трапляюць людзі, для якіх захварэць любым варыянтам гэтага віруса — высокая рызыка. Гэта можа выклікаць перагрузку (сістэмы аховы здароўя. — Заўвага БелТА)», — адзначыла Ганна Папова.
У цэлым жа пакуль спецыялісты не могуць сказаць, што пандэмія ідзе на спад, і рыхтуюцца супрацьдзейнічаць распаўсюджванню новага штаму, працягваць абараняць людзей, падсумавала галоўны санітарны ўрач Расіі.
Далейшае абмеркаванне эпідэміялагічнай сітуацыі на прасторы СНД і іншых тэм, якія датычацца развіцця інтэграцыйных працэсаў, лідары Садружнасці прадоўжылі ўжо ў закрытым фармаце.
Фота: Прэс-служба Прэзідэнта РФ — БелТА
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».