Вы тут

Генпракуратура ўнесла прапановы па ўвекавечанні памяці ахвяр генацыду ў гады ВАВ


Адпаведны дакумент, асноўнай мэтай якога з'яўляецца захаванне гістарычнай памяці, генеральны пракурор Андрэй Швед накіраваў у Савет Міністраў. У працэсе рэалізацыі дзяржаўнай праграмы «Увекавечанне памяці аб загінулых пры абароне Айчыны» на 2021 — 2025 гады ўраду прапанавана стварыць спецыяльную міжведамасную камісію, у кампетэнцыі якой будзе вызначэнне памятных месцаў пахаванняў астанкаў ахвяр генацыду беларускага народа, а таксама арганізацыя работы па захаванасці месцаў выяўленых астанкаў, іх пахаванне і перапахаванне з выкананнем рытуалаў і неабходных ушанаванняў.


Фота: БелТА

Нагадаем, вясной Генеральная пракуратура распачала крымінальную справу аб генацыдзе беларускага народа ў гады Вялікай Айчыннай вайны і ў пасляваенны перыяд. Падчас расследавання ўстанаўліваюцца раней невядомыя месцы масавых забойстваў мірных жыхароў, якія патрабуюць абазначэння.

Невыпадкова Генеральная пракуратура прапаноўвае разгледзець пытанне аб стварэнні адзінага мемарыяльнага комплексу ахвяр генацыду ў гады Вялікай Айчыннай вайны, а таксама адпаведнага памятнага знака адзінага ўзору. Акрамя таго, на думку прадстаўнікоў ведамства, звесткі аб ахвярах генацыду трэба ўнесці ў «Кнігу памяці» Беларусі. Па прапанове Генпракуратуры міністэрствам адукацыі і інфармацыі будзе даручана абнавіць і сістэматызаваць інфармацыйную, асветніцкую, вучэбна-выхаваўчую работу для фарміравання ў падрастаючага пакалення маральнай і грамадска-палітычнай пазіцыі ў адносінах да падзей і вынікаў Другой сусветнай вайны, а таксама фундаментальных каштоўнасцяў, захавання гістарычнай памяці, у тым ліку праз уключэнне адпаведных заняткаў у навучальную праграму.

У музейных установах краіны плануецца стварыць экспазіцыі, прысвечаныя ахвярам генацыду беларускага народа ў гады Вялікай Айчыннай вайны. У Генпракуратуры лічаць, што гэта дазволіць данесці да грамадзян, асабліва да моладзі, асновы фундаментальных ідэй міру і непахіснасці правоў чалавека. Усё гэта будзе садзейнічаць фарміраванню аб'ектыўнага ўяўлення аб каштоўнасных арыенцірах цывілізаванага грамадства, стане ідэалагічным інструментам барацьбы з праяўленнем нацызму ў сучасных умовах.

Беларускім дзяржаўным музеем гісторыі Вялікай Айчыннай вайны запланавана стварыць перасоўную часовую экспазіцыю «Генацыд беларускага народа», якая будзе экспанавацца ў гарадах і іншых населеных пунктах нашай краіны. Многія экспанаты, прадастаўленыя ў тым ліку Генеральнай пракуратурай, будуць прадэманстраваны ўпершыню. Акрамя таго, матэрыяламі па генацыдзе дапоўніцца экспазіцыя музейнай залы «Нацысцкі акупацыйны рэжым на тэрыторыі Беларусі. 1941-1944 гг.».

— Тэма генацыду беларускага народа з'яўляецца адной з вядучых тэм нашага музея, — адзначыла намеснік дырэктара Беларускага дзяржаўнага музея гісторыі Вялікай Айчыннай вайны па навуковай рабоце Ганна ГАЛІНСКАЯ. — Гэтай праблематыцы заўсёды ўдзяляецца вялікая ўвага. На базе фондавых матэрыялаў музея, архіўных дакументаў, а таксама матэрыялаў, перададзеных Генеральнай пракуратурай Рэспублікі Беларусь, будзе створана перасоўная выстаўка «Генацыд беларускага народа». У ёй будуць адлюстраваны розныя напрамкі, якія пакажуць усю трагедыю беларускага народа ў гады Вялікай Айчыннай вайны: і спаленыя разам з жыхарамі вёскі, і расстрэлы, і масавыя публічныя пакаранні... Прычым тэма генацыду будзе паказана не толькі на прыкладзе сталіцы і Мінскай вобласці, а і ўсіх абласцей Беларусі. У музейную залу «Нацысцкі акупацыйны рэжым на тэрыторыі Беларусі» плануецца ўключыць новыя матэрыялы, знойдзеныя Генеральнай пракуратурай падчас расследавання крымінальнай справы аб генацыдзе і работы на месцах злачынстваў нямецка-фашысцкіх захопнікаў.

Дарэчы, днямі ў межах заведзенай крымінальнай справы Генпракуратура накіравала даручэнні аб прававой дапамозе па справе аб генацыдзе беларускага народа ў 17 краін. «Мы разумеем, што хтосьці дасць адказы і дапаможа ў расследаванні крымінальнай справы, а хтосьці — не, — паведаміў у эфіры тэлеканала СТБ кіраўнік следчай групы па крымінальнай справе аб генацыдзе Генеральнай пракуратуры Валерый ТАЎКАЧОЎ. — У якасці прыкладу, на жаль, прывяду Літву і Латвію, які адмовілі нам у прававой дапамозе па крымінальнай справе аб генацыдзе, матывуючы тым, што гэта можа адбіцца на пытаннях іх нацыянальнай бяспекі. Фактычна мы бачым, што яны не хочуць аказваць нам дапамогу ў расследаванні крымінальнай справы супраць чалавецтва, масавага забойства мірнага насельніцтва і дапамагчы аднавіць гістарычную справядлівасць, паказаць маштабы трагедыі беларускага народа».

У той жа час актыўнае садзейнічанне ў расследаванні аказвае Расійская Федэрацыя, якая стварыла ўсе ўмовы для работы беларускіх спецыялістаў з іх архіўнымі дакументамі. Спасылаючыся на канкрэтныя факты, эксперты аднагалосна заяўляюць: маштабы трагедыі значна большыя, чым мы дагэтуль уяўлялі.

Вераніка КАНЮТА

Выбар рэдакцыі

Грамадства

Як сэканоміць на «камуналцы»? Інструкцыя ад спецыялістаў

Як сэканоміць на «камуналцы»? Інструкцыя ад спецыялістаў

Хто мае права на вяртанне грошай, а хто — заплаціць цалкам.

Культура

Канкурсант ад Беларусі на «Віцебск-2022» Ганна Трубяцкая: Маладыя маюць права быць на вялікай сцэне

Канкурсант ад Беларусі на «Віцебск-2022» Ганна Трубяцкая: Маладыя маюць права быць на вялікай сцэне

Артыстка з чароўным голасам сёлета прадставіць Беларусь на конкурсе эстраднай песні «Віцебск—2022».

Грамадства

Як самі бацькі псуюць сваіх дзяцей? 5 галоўных памылак дарослых. Не рабіце так ніколі

Як самі бацькі псуюць сваіх дзяцей? 5 галоўных памылак дарослых. Не рабіце так ніколі

Выхаванне дзяцей — не самая простая задача. Капрызы, істэрыкі — гэта толькі частка праблем, з якімі сутыкаюцца сучасныя бацькі.

Грамадства

Рызыкі лічбавай прасторы. Як не трапіць на вуду інтэрнэт-махляроў

Рызыкі лічбавай прасторы. Як не трапіць на вуду інтэрнэт-махляроў

Цалкам вырашыць праблему кібернебяспекі немагчыма.