Вы тут

Жыровіцкі Свята-Успенскі стаўрапігіяльны мужчынскі манастыр набудзе новае аблічча


У пачатку гэтага года ў Жыровіцкім Свята-Успенскім стаўрапігіяльным мужчынскім манастыры пачнуцца маштабныя рэканструкцыйныя работы. Пытанне аб рамонце і мадэрнізацыі святыні знаходзіцца пад асабістым кантролем Прэзідэнта Беларусі Аляксандра Лукашэнкі. Не так даўно кіраўнік дзяржавы наведаў гэтую мясціну і даручыў на працягу бліжэйшых чатырох гадоў канчаткова добраўпарадкаваць не толькі манастыр і яго тэрыторыю, але і самі Жыровічы.


Адказнасць і фінансаванне

Пытанні па рэканструкцыі і мадэрнізацыі комплексу будуць курыраваць Гродзенскі аблвыканкам сумесна з Міністэрствам культуры і Беларускай Праваслаўнай Царквой. Праграма на 2022–2025 гады па правядзенні рамонтна-рэстаўрацыйных работ мужчынскага манастыра і аграгарадка Жыровічы была прынятая яшчэ ў сярэдзіне мінулай восені.

Ва ўпраўленні капітальнага будаўніцтва Гарадзенскага аблвыканкама растлумачылі, што ў план уключана 29 аб’ектаў, якія падлягаюць рамонту ці рэканструкцыі. Папярэдне, у яго ўвойдуць чатыры крыніцы фінансавання: рэспубліканскі і абласны бюджэты, спонсарская дапамога, а таксама ўласныя сродкі манастыра. Мяркуецца, што на рэалізацыю ўсяго плана будзе накіравана больш за 60 мільёнаў рублёў.

Будуць адноўлены

Жыровіцкі манастыр адносіцца да Беларускага экзархату Рускай Праваслаўнай Царквы, а сам комплекс складаецца з трох цэркваў, семінарыі, манаскіх келляў, трапезнай ды іншых гаспадарчых будынкаў. Цэнтрам з’яўляецца галоўны храм манастыра — Успенскі сабор, у асяроддзі семінарыі і манаскіх келляў, з якімі ён злучаны крытымі пераходамі. На паўднёва-ўсходнім напрамку ад яго знаходзіцца Багаяўленская царква, а на ўсход — узвышаецца Крыжаўздзвіжанская царква, якую таксама рэканструююць.

Для сабора, які з’яўляецца самай важнай кропкай аднаўленчых работ, ужо распрацавана праектна-каштарысная дакументацыя, за ёй пройдзе спецыяльная экспертыза. Аднак, спецыялісты ўжо цяпер могуць сказаць, што адновяцца дах і фасад будынка, а таксама будуць замененыя ўсе інжынерныя збудаванні і камунікацыі. Тут жа ўсталююць сучаснае інжынерна-тэхнічнае абсталяванне — сістэму відэаназірання, ахоўную і пажарную сігналізацыі, падсвятленне будынка. Схема ўсёй існуючай гістарычнай забудовы будзе захавана.

Новая званіца

На тэрыторыі Жыровіцкага манастыра з’явіцца новая званіца, праектаванне якой ужо пачалося сёлета. Яна будзе мець да шасцідзесяці метраў вышыні і стане самай высокай у Беларусі. 

Цяпер у часовай званіцы знаходзяцца дванаццаць званоў, якія прыбылі ў святое месца ў 2020 годзе ў гонар 500-годдзя заснавання манастыра і 550-годдзя з’явы Жыровіцкай іконы Божай Маці. Іх адлівалі ў Варонежы на званаліцейным заводзе «Вера». Вага самага вялікага звана 4200 кілаграм. 

На ім адлітыя словы: «Папячэннем Прэзідэнта Рэспублікі Беларусь Аляксандра Рыгоравіча Лукашэнкі, Прэзідэнта Расійскай Федэрацыі Уладзіміра Уладзіміравіча Пуціна». Асвячэнне званіцы і падораных званоў — значная і для беларускага, і для расійскага народаў падзея, увасабленне моцнага сяброўства паміж нашымі краінамі, адзначыў падчас урачыстай цырымоніі пасол Расійскай Федэрацыі ў Рэспубліцы Беларусь Дзмітрый Мезенцаў.

Самі Жыровічы

Мадэрнізацыя таксама чакае гістарычныя гаспадарчыя будынкі, якія ўваходзяць у склад Жыровіцкага комплексу, святыя крыніцы, а таксама былую сядзібу «Старыя Жыровічы».

Мяркуецца, што «Старыя Жыровічы» — не проста манастырскае падвор’е, але важны турыстычны аб’ект. Тут пастаянна спыняюцца як паломнікі, так і звычайныя вандроўцы.

Самі Жыровічы, размешчаныя ў Слонімскім раёне, таксама зменяцца. Адрамантуюць фасады карпусоў Жыровіцкага аграрна-тэхнічнага каледжа і мясцовага Дома культуры, а таксама ўчастковай бальніцы, школы і ясляў. Разам з тым, рэканструкцыя аграгарадка прыўнясе камфорт не толькі для гасцей і падарожнікаў, але і мясцовых жыхароў.

Цікава ведаць

Гісторыя Свята-Успенскага мужчынскага манастыра ў Жыровічах цягнецца з XVI стагоддзя. Праваслаўны манастыр узнік на месцы, дзе, паводле падання, з’явіўся Жыровіцкі абраз Божай Маці. Для яе ўзвялі драўляны храм, які згарэў, аднак святыня была змешчаная ў новым будынку, вакол якога пасля і паўстаў Жыровіцкі манастыр. Па-ранейшаму самай галоўнай славутасцю манастыра з’яўляецца цудадзейны абраз Божай Маці Жыровіцкай. Ёсць тут яшчэ адна асаблівасць — гэта гаючая крыніца, якая цячэ з-пад Успенскага сабора. Паводле падання, яна паўстала адначасова з з’яўленнем іконы.

У суседняй вёсцы знаходзіцца незвычайны храм-крэпасць Святога Міхаіла, яшчэ адну царкву абароннага тыпу вы знойдзеце ў вёсцы Мураванка.

Аліса СКІБА

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».