Супрацоўнікаў, а таксама ветэранаў органаў і падраздзяленняў па надзвычайных сітуацыях з прафесійным святам — Днём ратавальніка, якое адзначаецца сёння, павіншаваў Прэзідэнт Беларусі. Аляксандр Лукашэнка падкрэсліў, што, дэманструючы адданасць сваёй справе, мужнасць і адвагу ў самых цяжкіх і небяспечных сітуацыях, ратавальнікі кожны раз прыходзяць праверку на трываласць з гонарам і годнасцю.
Найлепшыя ратавальнікі Мінскай вобласці атрымалі ўзнагароды ў зале Славы Беларускага дзяржаўнага музея гісторыі Вялікай Айчыннай вайны. Як яны самі адзначаюць, вельмі сімвалічна, што сабраліся ў гэтым знакавым для нашай краіны месцы ў Год гістарычнай памяці.
— Прафесія ратавальніка — адна з самых складаных, але і адна з найбольш высакародных, — заўважыў, віншуючы супрацоўнікаў Міністэрства па надзвычайных сітуацыях, старшыня Мінскага аблвыканкама Аляксандр ТУРЧЫН. — Рызыкуючы жыццём, вы ратуеце жыцці нашых грамадзян: тушыце пажары, дапамагаеце падчас дарожна-транспартных здарэнняў, шукаеце тых, хто заблукаў у лесе... Дзякуючы вам, многія аб’екты народна-гаспадарчага комплексу былі выратаваныя. Мы будзем працягваць будаваць для вас жыллё, набываць тэхніку, узводзіць будынкі. Гэта сістэмная работа праводзіцца для таго, каб вам, людзям, якія рызыкуюць сваім жыццём, даводзілася працаваць у добрых умовах.
Як адзначыў начальнік Мінскага абласнога ўпраўлення МНС палкоўнік унутранай службы Сяргей ЛАПАНОВІЧ, за мінулы год ратавальнікі вобласці здзейснілі звыш сямі тысяч выездаў, выратавалі 277 чалавек, у тым ліку 30 дзяцей. «Самае галоўнае, што летась мы не дапусцілі буйных надзвычайных сітуацый, разам з прадстаўнікамі іншых сілавых структур спрацавалі разам па папярэджанні гібелі людзей, — расказаў начальнік Мінскага абласнога ўпраўлення МНС. — Развіваецца матэрыяльна-тэхнічная база, будуюцца падраздзяленні — мы робім усё для таго, каб ратавальнікам было камфортна несці службу, а атрыманыя рэсурсы толькі садзейнічалі ліквідацыі надзвычайных сітуацый».
Сярод узнагароджаных і адзначаных — Дзмітрый Хоміч, жыхар Любанскага раёна. Ён не прафесійны ратавальнік, але, калі ўбачыў у доме аднавяскоўца задымленне, не раздумваючы кінуўся на дапамогу.
Інструктар-кіроўца пажарнай аварыйна-ратавальнай часці № 1 г. Мар’іна Горка Дзмітрый Якімук, які служыць у МНС ужо 15 гадоў, аб прафесіі ратавальніка марыў з дзяцінства. «Я, напэўна, народжаны ратаваць людзей, — прызнаецца супрацоўнік МНС. — У надзвычайнай сітуацыі мы не думаем аб тым, што падвяргаем сваё жыццё небяспецы. У першую чаргу, мы павінны не даць загінуць іншаму чалавеку».
Вераніка КАНЮТА
Фота Мінскага абласнога ўпраўлення МНС
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
