Хочаце кніжны падарунак на зімовы вечар? Добры выбар — вядомы класічны раман у новай стыльнай серыі. Магчыма, гэта будзе першая ваша пакупка з серыі Scrіpta manent, якая прадстаўляе найлепшае з беларускай літаратурнай класікі. Упэўнена, захочацца паставіць на паліцы ўсе тамы. Перад Новым годам выдавецтва выпусціла ў серыі раман Івана Шамякіна «Сэрца на далоні». Час дзеяння там, вядома, савецкі — партыйныя сходы, таварыскія суды за амаральнасць... Але жарсці чалавечыя застаюцца ўсё тымі ж — каханне, рэўнасць, зайздрасць, подласць... Вас захопіць гісторыя кардыяхірурга Яраша і яго выратавальніка, мужнага доктара Савіча, які ў вайну ратаваў людзей, загінуў нескароны, але фашысты выдалі яго за свайго паслугача. І толькі доктар Яраш з сябрамі можа заступіцца за яго добрае імя, за ягоную дачку Зосю... А ў Яраша хваравіта раўнівая жонка, якая нават да няшчаснай хворай Зосі раўнуе. А тут і закаханая ў кардыёхірурга медсястра Маша, у якой свае два Рамэа... Будзе нясумна. Ну і бонус — многія падзеі адбываюцца на фоне навагодніх свят. Вось як разбэшчаны маладзён Славік купляе ёлачку:
«— Што ты прывезла ламачча нейкага, а не елак? — закрычаў ён на маладую чырванашчокую жанчыну, якая ў кажуху, у валёнках сядзела на грудцы крыжавін і смачна ела свежую булку. — Думаеш, гарадскія — дурні, любую дрэнь праглынуць? Ці, можа, ім грошай няма куды дзяваць?
— А ты б пазней паспаў, можа б, табе сама Снягурачка прынесла елку, — хораша ўсміхнулася яна. — Елкі як елкі. Хто гэта будзе добры ельнік рубіць? У цябе елка два дні пастаяла, ды і на сметнік. А з добрай ялінкі якое дрэва вырасце!
Яе мудрая разважлівасць, спакой і здаровы апетыт неяк дзіўна супакоілі Славіка, нават развесялілі, настроілі па-святочнаму. Ён хутка выбраў елку, разлічыўся».
Але не суджана было той ёлачцы ўпрыгожыць свята хлопца, бо па дарозе сустрэў ён любую Машу і даведаўся, што яна выбрала не яго...
Красамоўны і фінал рамана. З аднаго боку, Яраш у святочную ноч прыміраецца з жонкай, да ягонага навагодняга тосту нельга не далучыцца:
«— Вып'ем за добрых дзяцей. І за добрых людзей!
Але, п'ючы, ён зноў падумаў пра Зосю. Дзе яна? Куды магла паехаць у такі час?»
Радавацца простым, шчырым, чалавечым рэчам і не забывацца на тых, каму патрэбныя наша спачуванне і дапамога — гэтаму варта павучыцца ў Івана Шамякіна. Важна і тое, што ў герояў ёсць рэальныя прататыпы, героі вайны — найперш доктар Клумаў, і тут гучыць тэма неабходнасці змагання за праўду аб падзеях трагічнага ваеннага часу.
Калі хочаце зрабіць добры падарунак дзецям, купіце гэтую кніжку. Па-першае, няхай дзіця засвойвае беларускую мову па захапляльным, добра вядомым творы ў перакладзе Настассі Галкоўскай. Калі па-беларуску з юным чытачом загавораць Бураціна, ліса Аліса і Карабас-Барабас, гэта куды лепш запомніцца, чым практыкаванні з падручнікаў. Па-другое, выданне ўнікальнае: паўтарае выдадзенае ў 1975 годзе, аформленае акварэльнымі малюнкамі народнага мастака Беларусі Васіля Шаранговіча. Мастак, дарэчы, тлумачыў, што выбіраў для ілюстравання менавіта тыя моманты, дзе героі эмацыянальна перажываюць, а Бураціна ўвогуле для яго стаў настолькі жывым персанажам, што майстар з ім размаўляў. Так што маеце ў адным «флаконе» і захапляльны тэкст, і дапаможнік па вывучэнні беларускай мовы, і мастацкі альбом. Для дарослых цікава паглядзець, як змянілася ўспрыманне гэтай казкі — бо сучасны дзіцёнак ведае і хрысціянскую казку Калодзі пра Пінокіа, якая паслужыла асновай для савецкай інтэрпрэтацыі Аляксея Талстога, і мульцікаў наглядзеўся пра лялек-монстраў і штучны інтэлект... Сучасным прачытаннем казкі пра Бураціна займаюцца многія з рознай ступенню «сцёбу», напрыклад, запісваючы П'еро ў эма, Дурэмара — у дробныя прадпрымальнікі, а Карабаса — у «эфектыўныя менеджары». Бураціна часам трактуецца як «наша ўнутранае «Я», неспакойнае, трывожнае, што працінае носам намаляваны агмень. Часам казку разглядаюць як мадэль грамадства: Карабас-Барабас — капітал, чарапаха Тарціла — рэлігія, Дурэмар — навука... Ніхто не забараняе і вам знайсці ўласныя падтэксты і паралелі. А знаўцам мовы можна яшчэ і параўнаць розныя варыянты перакладу, якія існуюць, напрыклад, як лепш гучыць — «Прыгоды Бураціны» ці «Прыгоды Бураціна»?
Выданні для агляду прадстаўленыя кніжнай крамай «Акадэмічная кніга», Мінск, пр. Незалежасці, 72
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».