Калі ў пачатку сакавіка ў нас у большасці раёнаў было суха, то ў апошнія дні месяца — як прарвала. Большую частку гэтага тыдня тэрыторыя краіны будзе знаходзіцца ва ўладзе атмасферных франтоў, таму без мокрага снегу і дажджу не абыдзецца. Разам з тым тэмпературны фон будзе паніжацца. А з серады начныя мінімумы ўсё больш будуць схіляцца да адмоўных значэнняў, паведамляюць спецыялісты Рэспубліканскага цэнтра гідраметэаралогіі, кантролю радыеактыўнага забруджвання і маніторынгу навакольнага асяроддзя Мінпрыроды. Падобна на тое, што вясна не вельмі спяшаецца…
Ужо ў аўторак па поўначы ў многіх раёнах краіны, на астатняй тэрыторыі — месцамі, пройдуць кароткачасовыя ападкі ў выглядзе дажджу і мокрага снегу. Раніцай па паўночным усходзе на асобных участках дарог магчыма галалёдзіца. Месцамі будзе ўзмацненне заходняга, паўночна-заходняга ветру парывамі да 15–20 м/с. Тэмпература паветра ўдзень – ад плюс 2 градусаў па поўначы да 13 цяпла па поўдні краіны.
Больш халодныя ночы стануць з’яўляцца ў нас з серады. У перадапошні дзень месяца месцамі па краіне чакаюцца кароткачасовыя ападкі ў выглядзе мокрага снегу і дажджу. Уначы і раніцай па паўночным усходзе на асобных участках дарог будзе галалёдзіца. Тэмпература паветра ўначы будзе ад мінус 6 градусаў да 1 марозу, тэмпература ўдзень складзе ад 1 да 7 цяпла, а ў паўднёвых раёнах — плюс 10 градусаў.
У чацвер на большай частцы тэрыторыі краіны ападкі будуць ужо сур’ёзныя, але ўсё ў тым жа выглядзе (мокры снег, дождж). Уначы і раніцай на асобных участках дарог чакаецца галалёдзіца. Тэмпература паветра ўначы складзе ад мінус 5 градусаў да 2 цяпла, праўда па поўначы — да 7 градусаў марозу. Удзень будзе ад плюс 1 да плюс 8 градусаў.
Паводле папярэдніх прагнозаў, у пятніцу на большай частцы краіны прагназуюцца мокры снег і дождж. З мокрым снегам дзесьці нават праз цур. Месцамі будуць моцныя ападкі, наліпанне мокрага снегу, слабы галалёд і на асобных участках дарог магчыма галалёдзіца. Уначы і раніцай месцамі чакаецца ўзмацненне ветру парывамі да 15–18 м/с. Тэмпература паветра ўначы плануецца ад мінус 5 градусаў да 2 цяпла, а ў дзённы час тэмпература паветра складзе ад 1 градуса марозу да плюс 6 градусаў. Па паўднёвым усходзе ўначы — плюс 3–4 градусы, удзень месцамі будзе 7–12 цяпла. Відавочна не май месяц. Дакладна.
Сяргей КУРКАЧ
Фота Маргарыты ПАЛЮХОВІЧ
Мерапрыемства праводзіцца на добраахвотнай аснове.
Не выявіць ні секунды абыякавасці.