Калі будзеце ў Круглым, дзеля цікавасці наведайце танцпляцоўку на беразе Друці. Любы месціч вам пакажа дарогу да яе. Магчыма, гэта і не самая вялікая ў раёне славутасць, але вельмі папулярная ў моладзі, асабліва ў летні перыяд. Днём непадалёк ад яе можна пазагараць, а вечарам — патанцаваць на дыскатэцы. Знамянальна, што заслуга ў існаванні гэтай танцпляцоўкі належыць не мясцоваму жылкамгасу, а... школьнікам. Менавіта яны ажыццявілі гэты праект у рамках свайго школьнага, то-бок дзіцячага, парламента. А цяпер плануюць яго яшчэ і развіваць.
Дзіцячы парламент, дарэчы, ёсць яшчэ не ў кожным раёне, але Круглянскі такую форму работы з моладдзю практыкуе ўжо восьмы год. І калі спачатку былі нейкія шурпатасці, то сёння такая работа ідзе гладка.
Суполка існуе пры Круглянскім раённым Цэнтры творчасці дзяцей і моладзі «Вясёлка» і непасрэдна супрацоўнічае з раённым Саветам дэпутатаў. Школьнікі ўдзельнічаюць у сесіях, выносяць на абмеркаванне свае прапановы. У раёне 6 школ, ад кожнай у парламенце есць прадстаўнікі. Усяго гэта 13 актыўных, крэатыўных, неабыякавых маладых людзей з 8-11 класаў. Выбары ў парламент праводзяцца штогод, і трэба яшчэ пазмагацца, каб трапіць у дзіцячы Савет.
— Я дзяўчына актыўная, паспяваю і спортам займацца, і грамадскім жыццём, — усміхаецца старшыня дзіцячага парламента Валянціна Коваль, вучаніца 10 класа Круглянскай школы № 1. — У парламенце ўжо другі год, першы — у якасці кіраўніка. Выбіраюцца таксама намеснік старшыні і сакратар парламента. Пра школьнае дэпутацтва даведалася яшчэ ў малодшых класах, марыла хутчэй падрасці і далучыцца да справы. Я добра ведаю, што нашай моладзі трэба, чаго ў горадзе не хапае для вольнага часу.
Менавіта Валянціна прапанавала летась рэанімаваць закінутую танцпляцоўку на беразе рэчкі. Аднагодкі падтрымалі ідэю, і дзяўчынка агучыла прапанову на сесіі раённага Савета дэпутатаў. Дарослым задума спадабалася, а раённая арганізацыя «Аграпрамтэхзабеспячэнне» дапамагла яе матэрыялізаваць. Моладзь таксама ў баку не засталася: прыходзілі на суботнікі, дапамагалі прыбіраць смецце. Валянціна ўспамінае, што нават на планёркі, якія праводзіліся проста на беразе Друці, паспявала забягаць да школы. Трэба было нешта скарэкціраваць, узгадніць, дапрацаваць. У выніку атрымалася «цукерка». А галоўнае — нават рэкламы рабіць не прыйшлося. Усе школьнікі раёна ведалі, што ў Круглым ствараецца цудоўнае месца для адпачынку, і чакалі, калі нарэшце іх мара спраўдзіцца.
— Асабіста мяне натхніў яшчэ і вопыт маіх папярэднікаў, — прызнаецца школьніца. — Некалькі гадоў таму кіраўніком дзіцячага парламента была Ганна Кулікоўская. Цяпер яна студэнтка трэцяга курса БДУ. А калі кіравала нашым парламентам, прапанавала стварыць у гарадскім парку варкаўт-пляцоўку. Раённыя дэпутаты яе ідэю падтрымалі. Гэта пляцоўка і сёння папулярная ў нашых рабят. Туды прыходзяць пазаймацца і больш дарослыя людзі.
Валянціна прызнаецца, што такая грамадская работа навучыла яе шмат у чым разбірацца. Яна разумее, што трэба прапаноўваць рэальныя праекты, бо ўсё каштуе грошай і не заўсёды можа быць рэалізавана. Напрыклад, было б цудоўна мець сваю маладзёжную штаб-кватэру, дзе можна было б сустракацца, піць гарбату, гуляць у настольныя гульні. Але ж знайсці памяшканне не так проста, плюс яго трэба будзе рамантаваць і на нейкія сродкі ўтрымліваць. На жаль, са сродкамі праблема, таму даводзіцца больш цвяроза глядзець на такія рэчы.
Нядаўна дзіцячы парламент прапанаваў мясцовым дэпутатам рэалізаваць праект з летнім кінатэатрам.
— Гэта своеасаблівы працяг тэмы танцпляцоўкі, — з захапленнем расказвае Валянціна. — Дарослыя расказваюць, што ў час іх маладосці гэта была распаўсюджаная справа. І нам стала цікава. Чаму б не адрадзіць такую добрую традыцыю? Тым больш вялікіх затрат для гэтага не спатрэбіцца. Трэба знайсці толькі нешта накшталт экрана і прыстасавання для трансляцыі фільмаў. Наша танцпляцоўка ідэальна падыходзіць для летняга кінатэатра.
Дзяўчына кажа, што калі абмяркоўвала гэтую ідэю з сябрамі, адразу ж пайшлі прапановы канкрэтных фільмаў, якія б там можна было паглядзець. Але вырашылі падбор рэпертуару адкласці на потым. Сёння знайсці ў інтэрнэце падыходзячыя кінастужкі — не праблема. Вядома, што работа кінатэатра пад адкрытым небам абмежаваная сезоннасцю, аднак школьнікі перакананыя, што нават у такім фармаце можна было б заахвоціць моладзь бавіць час разам, кагосьці — адцягнуць ад шкодных звычак, паказаць, як шмат вакол адметных і карысных мерапрыемстваў.
Суразмоўніца прызнаецца, што работа ў парламенце дазволіла ёй пра многае даведацца, ацаніць свой патэнцыял. Нядаўна яна перамагла ў раённым этапе конкурсу «Лідар года», цяпер рыхтуецца да абласных спаборніцтваў. Жыць цікава і паўнавартасна нічога не перашкаджае, лічыць яна. І дзіцячы парламент — адзін са спосабаў дасягнуць такой мэты.
— Нас чуюць, падтрымліваюць, і гэта вельмі важна, — адзначае Валянціна. — Мы маем магчымасць уносіць свае прапановы, прагаворваць іх на публіцы, шукаць варыянты вырашэння. Гэта вельмі карысны вопыт. Нават у тым выпадку, калі прапанова не знайшла водгуку ў раённай улады.
Сяргей Храмцоў, старшыня Круглянскага райсавета дэпутатаў:
— Дзіцячы парламент — гэта наша змена і першыя памочнікі. У нас няма ВНУ, сярэдніх спецыяльных і прафесійна-тэхнічных устаноў, ёсць толькі школы, і там шмат дзяцей актыўных, якія жадаюць самарэалізавацца. Яны матываваныя, пасіянарныя, гатовыя да супрацоўніцтва. У іх ёсць ініцыятывы, але іх трэба пачуць. А пачуць іх можна толькі праз лідараў. І дзіцячы парламент вельмі добрае ўтварэнне, якое дапамагае выхоўваць такіх лідараў. Яны балаціруюцца, удзельнічаюць у выбарах — у іх усё па-сур'ёзнаму. Мы ж толькі дапамагаем, падцягваем, падказваем. Яны ведаюць, што патрэбна іх аднагодкам, і прапануюць ініцыятывы, якія трэба ажыццявіць у Круглым. Ініцыятыва пад назвай «Спуск да рэчкі і капітальны рамонт танцпляцоўкі» паказала, што такое супрацоўніцтва можа быць плённым. Мы нават па ініцыятыве школьнікаў залажылі там капсулу з пасланнем да нашчадкаў. Дзеці самі склалі тэкст і вызначылі дату, калі можна будзе адчыніць капсулу. А сёлета старшыня дзіцячага парламента выступіла з прапановай удасканаліць праект і зрабіць нешта накшталт летняга кінатэатра. Ініцыятыва нам падалася цікавай, і мы яе адназначна падтрымаем!
Нэлі ЗІГУЛЯ
Фота з архіва Валянціны КОВАЛЬ
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
