Рэгістрацыя абітурыентаў на ЦТ пачынаецца 2 мая

Абітурыентаў чакаюць у пунктах рэгістрацыі ў будні з 9.00 да 19.00, а таксама па суботах 14 і 28 мая — з 9.00 да 18.00. Трэба мець на ўвазе, што 2 мая для пунктаў рэгістрацыі — рабочы дзень, а вось 3 і 9 мая яны не працуюць. 

У абітурыентаў ёсць выбар: на ЦТ можна зрэгістравацца анлайн або прыйсці ў пункт рэгістрацыі асабіста.

Напрыклад, для падачы заявы на ўдзел у ЦТ можна запоўніць электронную форму на сайце Рэспубліканскага інстытута кантролю ведаў/

Спачатку трэба ўвесці свае даныя (серыю і нумар дакумента, які сведчыць асобу, мабільны нумар тэлефона). Затым абітурыенту прыйдзе SMS з паролем да асабістага кабінета. Ён фарміруецца ў момант першага ўваходу. У наступныя разы трэба будзе толькі ўвесці лагін і пароль.

Далей у сістэме неабходна выбраць прадметы, пункты тэсціравання і іншыя дадзеныя. Наступны этап — аплата за ўдзел у ЦТ праз сістэму АРІП. Правесці аплату трэба не пазней за 1 чэрвеня, выкарыстоўваючы нумар свайго асабовага рахунку, указанага ў асабістым кабінеце сістэмы рэгістрацыі. Гэта сума складае 0,1 базавай велічыні за адзін вучэбны прамет (.3,2 рубля). У кошт закладваюцца выдаткі на работу пунктаў рэгістрацыі, афармленне дакументаў і правядзенне экзамену. 

Выбар мовы, на якой абітурыент жадае здаваць тэсты, ажыццяўляецца яшчэ на этапе падачы заявы і рэгістрацыі на ЦТ. Заява запаўняецца ўдзельнікам ЦТ на адной з дзвюх дзяржаўных моў: беларускай ці рускай на выбар. Трэба мець на ўвазе, што пазней зона рэгістрацыі бланка адказаў будзе запаўняцца абітурыентам на той жа мове, на якой была пададзена заява пры рэгістрацыі. І сертыфікат удзельніка ЦТ будзе запаўняцца таксама на той мове, на якой падавалася заява. 

Абітурыентам трэба мець на ўвазе, што папярэдняя рэгістрацыя будзе даступная да 12 гадзін 1 чэрвеня. А ў апошні дзень пасля 12 гадзін і да закрыцця пунктаў рэгістрацыі падаць заяву на ўдзел у ЦТ можна будзе толькі асабіста.

— Рэгістрацыя завяршаецца атрыманнем пропускаў, па якія трэба звярнуцца асабіста не пазней за 1 чэрвеня, — падкрэслівае дырэктар Рэспубліканскага інстытута кантролю ведаў Юрый Міксюк — У графе «Абраныя прадметы і пункты тэсціравання» будуць указаны адрасы пунктаў рэгістрацыі (іх 41). У адзін з іх неабходна будзе завітаць з пашпартам, ID-картай, пасведчаннем на жыхарства або пасведчаннем бежанца. Забраць пропускі замест абітурыента могуць таксама яго законныя прадстаўнікі. Менавіту ў пропуску ўказваецца інфармацыя, калі і куды трэба прыходзіць у дзень правядзення тэсціравання. Без пропускаў на тэсціраванне не пусцяць. 

Абітурыентам трэба быць уважлівымі: пропуск для ўдзелу ў ЦТ лічыцца зарэгістраваным, калі на ім ёсць пячатка ўстановы, вызначанай пунктам рэгістрацыі на ЦТ, подпіс упаўнаважанага прадстаўніка пункта рэгістрацыі і ўказаны рэгістрацыйны нумар. У выпадку страты пропуску выдаецца дублікат.

Пакуль абітурыент не атрымаў пропуск, у асабістым кабінеце можна змяніць даныя ў заяве: набор прадметаў, мову прадастаўлення тэста і г. д. Калі з’явіцца неабходнасць гэта зрабіць пасля атрымання пропуску, трэба будзе звяртацца ў пункт ЦТ асабіста. Адпаведна, калі ты рэгістраваўся афлайн, то і змены ўносяцца ў тым пункце, дзе ты пісаў заяву. Аднак усе маніпуляцыі магчымыя толькі да 1 чэрвеня (уключна).

Калі абітурыент жадае запісацца на ЦТ афлайн, ён (або яго законны прадстаўнік) можа звярнуцца ў адзін з 41 пунктаў рэгістрацыі. Аднак у любы час гэта зрабіць немагчыма. У мэтах недапушчэння масавага збору людзей пункты рэгістрацыі арганізуюць папярэдні запіс (фарміруюць электронную чаргу), што дасць магчымасць вызначыць дату і час наведвання абітурыентамі пунктаў рэгістрацыі. У сувязі з гэтым перад наведваннем пункта рэгістрацыі неабходна азнаёміцца з інфармацыяй на яго сайце. Адрасы, тэлефоны, графік работы пунктаў рэгістрацыі размешчаны на сайце Рэспубліканскга інстытута кантролю ведаў у раздзеле «Пункты рэгістрацыі і правядзення ЦТ». Пры сабе абавязкова трэба мець дакумент, які сведчыць асобу, і грошы для аплаты тэсціравання.

У кожным з пунктаў рэгістрацыі абітурыент можна запісацца ў любую ВНУ, дзе яму будзе больш зручна здаваць экзамен. Усё таму, што сістэма рэгістрацыі аўтаматызаваная. Напрыклад, прыйшоўшы ў Гродзенскі дзяржаўны ўніверсітэт, можна падаць заяўку на здачу ЦТ у Мінску, Магілёве, Гомелі, Брэсце, Віцебску і г. д. І зусім неабавязкова пісаць тэсціраванне ў ВНУ, куды абітурыент збіраецца паступаць. Лепш выбраць месца бліжэй да дома, каб пазбегнуць непрадбачаных сітуацый (спазнення транспарту, забытых дакументаў і г. д.). 

Абітурыенты са шматдзетных сем’яў здаюць ЦТ бясплатна. Ім трэба прынесці даведку аб месцы жыхарства і складзе сям’і і іх ксеракопіі. Таксама бясплатна рэгіструюцца на тэсціраванне сіраты, інваліды I і II груп, абітурыенты, чые бацькі сталі інвалідамі на ваеннай службе. Падрабязнасці можна даведацца ў 12-м пункце Палажэння аб правядзенні ЦТ.

Абітурыенты, з якіх не спаганяецца плата за прыём і афармленне дакументаў для ўдзелу ў ЦТ, не могуць падаць заяўку анлайн. ​Зрабіць гэта трэба асабіста або праз законнага прадстаўніка. 

Абітурыентам дазваляецца зарэгістравацца не больш як на чатыры дысцыпліны. Такім чынам, у іх ёсць магчымасць ракіроўкі пры паступленні на роднасныя спецыяльнасці. Па вопыце папярэдніх гадоў, прыкладна палова абітурыентаў выбіраюць чацвёрты рэзервовы прадмет.

Замежнікі могуць зарэгістравацца на ЦТ любым з вышэйпералічаных спосабаў. Калі няма магчымасці аплаціць удзел у ЦТ і атрымаць пропускі да 1 чэрвеня, то можна прайсці рэгістрацыю па прыбыцці ў Беларусь. Трэба будзе звярнуцца ў пункт рэгістрацыі не пазней чым за адзін дзень да пачатку тэсціравання, атрымаць асабовы рахунак, унесці плату за прыём і афармленне дакументаў праз сістэму «Разлік» (АРІП), выкарыстоўваючы нумар асабовага рахунку, атрыманага ў пункце рэгістрацыі. Пры сабе, вядома, трэба мець пашпарт.

Цэнтралізаванае тэсціраванне стартуе ў Беларусі 14 чэрвеня. У гэты дзень абітурыенты здаюць ЦТ па беларускай мове. Самымі масавымі выпрабаваннямі традыцыйна будуць ЦТ па матэматыцы і рускай мове. Пад іх правядзенне «забраніравана» па два дні. 16 і 17 чэрвеня абітурыенты здаюць рускую мову, 19 чэрвеня — грамадазнаўства, 21 і 22 чэрвеня — матэматыку, 24 чэрвеня — біялогію, 26 чэрвеня — замежную мову, 28 чэрвеня — хімію, 30 чэрвеня — фізіку, 2 ліпеня — гісторыю Беларусі, 4 ліпеня — геаграфію і 6 ліпеня — сусветную гісторыю найноўшага часу. 

Для тых, хто прапусціў ЦТ па ўважлівай прычыне, прадугледжаны тры рэзервовыя дні. Зарэгістравацца для здачы ЦТ у дадатковыя дні можна будзе з 2 па 7 ліпеня. Але для таго, каб быць дапушчанымі да экзамену, давядзецца дакументальна пацвердзіць, што прычына пропуску была насамрэч уважлівай. 

Надзея НІКАЛАЕВА 

Фота Яўгена ПЯСЕЦКАГА