Будынак ужо даўно арганічна ўпісаўся ў ландшафт беларускай сталіцы. Убачыць яго як звонку, а тым больш унутры, жадаюць многія жыхары краіны, а таксама яе госці. Такая магчымасць ёсць: рэгулярна для самых разнастайных дэлегацый з розных рэгіёнаў краіны Палац Незалежнасці адчыняе свае дзверы. Паказаць славутасць Мінска, месца, дзе прымаюцца самыя важныя дзяржаўныя рашэнні, — жаданне Прэзідэнта.
На гэты раз пахадзіць па велічных залах, кожная з якіх мае сваю гісторыю, унікальнае творчае аздабленне, выпаў гонар найлепшым у вучобе школьнікам Віцебска, а таксама тым, хто плануе прысвяціць сваё жыццё служэнню Айчыне.
Пачалася экскурсія з наведвання галоўнай цырыманіяльнай пляцоўкі нашай краіны. Тут маладыя людзі даведаліся аб дэталях і цікавых фактах, звязаных з будаўніцтвам Палаца Незалежнасці. У прыватнасці, хлопцаў і дзяўчат уразіла тое, што ва ўзвядзенні аб’екта ўдзельнічалі выключна беларускія майстры. Да слова, пры будаўніцтве Палаца прымянялася ўсё, што можна вырабіць у краіне. Кожная зала — прадмет мастацтва. Кожная дэталь інтэр’еру — ўласны почырк беларускіх майстроў, на якіх багатая наша краіна.
Як прызналася Лізавета Барысава, адзінаццацікласніца гімназіі № 9 Віцебска, заходзячы ў іх, яна адчувае сябе важным чалавекам. «Вельмі прыемна, што магчымасць наведаць гэтае сімвалічнае ў нашай краіне месца прадастаўляецца звычайным школьнікам, — удакладніла дзяўчына. — Асабліва ганарова, калі ўсведамляеш той факт, што па гэтых калідорах ходзіць наш Прэзідэнт, кіраўнікі іншых дзяржаў».
Наведвальнікі з цікавасцю даведаліся, што замест запланаваных 57 месяцаў Палац Незалежнасці быў пабудаваны за 30. Аднак паскоранае ўзвядзенне гэтага знакавага аб’екта ніколькі не сказалася на якасці работы: дагэтуль майстры з іншых краін, якія бываюць у гэтых сценах, здзіўляюцца прафесіяналізму нашых спецыялістаў, якія здолелі за дастаткова кароткі тэрмін увасобіць задуманнае.
— Вельмі цікава наведаць залы, дзе адбываліся знакавыя падзеі ў нашай, а таксама сусветнай гісторыі, — адзначыў старшы віцэ-сяржант 4 курса Спецыялізаванага ліцэя МУС Арцём Кавалёў. — Кожная зала мае сваю адметнасць: характэрны свой дэкор, свая атмасфера. Напрыклад, у самай вялікай мне вельмі спадабалася люстра, якая па сваёй велічыне і масе заслужана знаходзілася ў топ-10 свету.
Усяго ў Палацы Незалежнасці — 20 залаў. Сярод найбольш папулярных у наведвальнікаў — зялёная, якая ўвайшла ў сусветную гісторыю як месца, дзе ў лютым 2015 года на працягу амаль 16 гадзін адбываліся перагаворы па ўрэгуляванні канфлікту ва Украіне. Актыўна фатаграфаваліся школьнікі і ліцэісты і ў зале ўрачыстых цырымоній, якая з’яўляецца адной з самых вялікіх у краіне і адначасова можа прыняць да тысячы чалавек. Уважліва юныя наведвальнікі вывучалі і экспазіцыю музея падарункаў, у якім захоўваюцца падарункі Прэзідэнту, уручаныя ў розны час рознымі людзьмі і дэлегацыямі. Нікога не пакінуў раўнадушным і зімовы сад, які вельмі арганічна ўпісаны ў канцэпцыю Палаца Незалежнасці. Тут, дарэчы, растуць фруктовыя дрэвы, якія яшчэ і даюць плён — у гэтым школьнікі і ліцэісты маглі пераканацца асабіста.
На вучаніцу 10 класа віцебскай гімназіі № 9 Арыну Цімчанку ўражанне аказала камінная зала Палаца Незалежнасці. «Сама атмасфера, яе афармленне настройвае на працу, — заўважыла школьніца. — Запомніліся карціны беларускіх мастакоў і дзіцячы фотаздымак Прэзідэнта: такога дакладна не ўбачыш у інтэрнэце».
— Сёння мы даведаліся шмат чаго новага, у тым ліку атрымалі веды аб гісторыі Палаца Незалежнасці, гісторыі нашай краіны, аб некаторых дэталях жыцця нашага Прэзідэнта, — падзялілася ўражаннямі вучаніца 9 класа гімназіі № 8 Віцебска Дзіяна Озерава. — Такім чынам, мы ўмацоўваем любоў да нашай краіны. Такія экскурсіі аказваюць значны ўплыў на фарміраванне нашага патрыятычнага светапогляду. Вельмі прыемна, што ўсё, што мы ўбачылі, створана беларускімі майстрамі. Гэта ўсяляе ў нас гонар за сваіх суайчыннікаў, рукамі якіх створаны такі велічны будынак, гонар за сваю краіну.
Вераніка КАНЮТА
Фота БелТА
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.