Вы тут

Як рабіць дзяўчыне прапанову выйсці замуж, каб яна не адмовіла?


У Магілёве падвялі вынікі рэспубліканскага конкурсу маладых сямей «Шчаслівыя разам». Па традыцыі яго арганізатарам і ідэйным натхняльнікам з’яўляецца Беларускі дзяржаўны ўніверсітэт харчовых і хімічных тэхналогій з Магілёва.


Сёлета конкурс праводзіўся ў чацвёрты раз, яго ўдзельнікамі сталі восем студэнцкіх сямей практычна з кожнага рэгіёна Беларусі. Для перамогі ім трэба было прадэманстраваць уменне весці агульную гаспадарку, гатаваць, годна выходзіць са складаных сітуацый. У нялёгкай барацьбе перамаглі сужэнцы з Гродзенскага ўніверсітэта імя Я. Купалы Дзмітрый і Кацярына Валчкі. Прадстаўнікі гэтай ВНУ бяруць удзел у конкурсе з моманту яго заснавання, але пераможцамі сталі ўпершыню. 

— Пара вельмі цікавая і прыгожая, бачна як яны кахаюць адзін аднаго, — адзначае прарэктар па выхаваўчай рабоце Магілёўскага ўніверсітэта харчовых і хімічных тэхналогій Вольга Мацыкава. — У іх была незвычайная канцэпцыя сервіроўкі, арыгінальныя стравы, кранальны творчы нумар. Пара выключная. Мне таксама спадабалася пара з Гродзенскага медуніверсітэту, яны былі самыя юныя ўдзельнікі і вельмі ўлюблёныя. Калі глядзіш на такія сем’і, сэрца радуецца.

Разыначкай конкурсу стала сапраўднае студэнцкае вяселле. Студэнты ўніверсітэта — арганізатара конкурсу зарэгістравалі шлюб. Яна — з Віцебска, ён — са Жлобіна, пазнаёміліся ў сценах магілёўскай ВНУ. Пралогам конкурсу стаў іх сямейны танец, маладых павіншавалі залатыя юбіляры сямейнага жыцця — Уладзімір Львовіч і Вольга Дзмітрыеўна Малышавы, выкладчыкі ўніверсітэта. Яны, дарэчы, узнагароджаны расійскім ордэнам Святых набожных князёў Пятра і Фяўронні і ўяўляюць сабой прыклад сапраўднай, моцнай сям’і. Абодва доўгі час працавалі ва ўніверсітэце. Зараз Вольга Дзмітрыеўна на пенсіі, але актыўны член магілёўскай гарадской ветэранскай арганізацыі.

— Для нашых маладажонаў Уладзімір і Вольга Малышавы сапраўдны прыклад для пераймання, — кажа Вольга Мацыкава. — І парады такой вопытнай сямейнай пары для пачынаючай — вялікая справа. Не выключна, што Лера і Данііл, якія распісаліся падчас правядзення нашага конкурсу, налета стануць яго ўдзельнікамі.

Цікавасць да конкурсу наогул расце. Пастаянныя яго ўдзельнікі — Гродзенскі ўніверсітэт імя Я.Купалы, Беларуская сельскагаспадарчая акадэмія з Горак, не першы раз прымаюць удзел курсанты інстытута пагранічнай службы з Мінска і гродзенскі медыцынскі ўніверсітэт. Упершыню ўдзельнічаў Беларускі ўніверсітэт транспарту (іх студэнцкая сям’я заняла трэцяе месца), Віцебскі ўніверсітэт імя П. Машэрава, Беларускі тэхнічны ўніверсітэт, Беларуская акадэмія мастацтваў.

— Штогод геаграфія ВНУ пашыраецца, — адзначае Вольга Мацыкава. — І сем’і — цудоўныя! Толькі дзеля таго, каб пазнаёміцца з імі, трэба арганізоўваць гэты конкурс. Кожны раз, калі бачыш гэтыя шчаслівыя твары і чуеш словы ўдзячнасці, адчуваеш задавальненне. З моманту правядзення конкурсу ў нашым універсітэце рабяты сталі смялей уступаць у шлюб. Адзін наш студэнт прызнаўся, што цяпер ведае, як рабіць дзяўчыне прапанову выйсці замуж, каб яна не адмовіла. Ён даведаўся пра гэта на нашым вечары знаёмстваў, які прайшоў у рамках конкурсу.

Яшчэ адна фішка сёлетняга конкурсу — удзел студэнцкіх сямей у журы. У якасці суддзяў выступілі некалькі пар магілёўскага ўніверсітэта харчовых і хімічных тэхналогій. Адна пара ацэньвала кулінарны конкурс і конкурс сервіроўкі, другая — вынікі квэста. Справіліся на выдатна, галоўнае — атрымалі вопыт.

На мерапрыемстве таксама прысутнічаў прарэктар Беларускага тэхнічнага ўніверсітэта, які прызнаўся, што прыехаў пераймаць вопыт, бо рэзананс пра конкурс вялікі. Маўляў, такія добрыя практыкі трэба вывучаць і браць на ўзбраенне. Чаму б і не? Вопыт паказвае, што сем’і, якія ўзніклі падчас студэнцкага перыяду жыцця, самыя моцныя.

Нэлі ЗІГУЛЯ

Фота Таццяны ПАДЛІПСКАЙ

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.