У парламентах Беларусі і Венесуэлы будзе адноўлена дзейнасць груп сяброўства

У парламентах Беларусі і Венесуэлы будзе адноўлена дзейнасць груп сяброўства.

Адпаведнае пісьмо з пажаданнем аднавіць дзейнасць рабочых груп паміж парламентамі дхвюх краін ад прэзідэнта Нацыянальнай асамблеі Венесуэлы на днях атрымаў старшыня Палаты прадстаўнікоў Уладзімір Андрэйчанка. Пра гэта ён расказаў падчас сустрэчы з Надзвычайным і Паўнамоцным Паслом Венесуэлы ў Беларусі Франклінам Рамірэсам Араке. 

«Я цалкам падзяляю меркаванне старшыні Нацыянальнай Асамблеі Венесуэлы аб неабходнасці развіцця і актывізацыі міжпарламенцкага дыялогу паміж Беларуссю і Венесуэлай. Нашы адносіны былі выбудаваны на павазе, салідарнасці, сяброўстве, падтрымцы ў міжпарламенцкіх арганізацыях», — сказаў Уладзімір Андрэйчанка.

Кіраўнік ніжняй палаты парламента папрасіў пасла перадаць венесуэльскаму калегу, што Беларусь са свайго боку таксама стварае рабочую групу. Узначаліць яе дэпутат Сяргей Клішэвіч, персанальны склад будзе сфарміраваны ў бліжэйшы час.

Паводле Уладзіміра Андрэйчанкі, беларуска-венесуэльскія сустрэчы ў парламенце становяцца традыцыяй, што з’яўляецца добрым знакам для далейшага развіцця супрацоўніцтва краін, наладжвання цесных палітычных, гандлёва-эканамічных, гуманітарных сувязяў.

«Венесуэла для Рэспублікі Беларусь з’яўляецца ключавым, перспектыўным партнёрам у Лацінаамерыканскім рэгіёне. Мы вельмі цэнім сяброўства, што склалася з вашай краінай і вашым народам, — дадаў старшыня Палаты прадстаўнікоў. — Летась Прэзідэнты нашых краін назначылі сваіх спецпрадстаўнікоў, якія абмяняліся візітамі. Як вы ведаеце, намечаны шляхі актывізацыі міжурадавых адносін, перазапуску эканамічных праектаў. У нас у машынабудаванні, сельскай гаспадарцы, будаўніцтве былі створаны сумесныя праекты. Важна, што спецпрадстаўнікі вызначылі шляхі і кірункі нашага далейшага супрацоўніцтва». 

Франклін Рамірэс Араке ў сваю чаргу пагадзіўся, што назначэнне Прэзідэнтамі спецпрадстаўнікоў садзейнічала перазапуску адносін паміж краінамі. Па яго словах, менавіта дзякуючы гэтым асобам летась у Каракасе адбылося восьмае пасяджэнне беларуска-венесуэльскай камісіі высокага ўзроўню, у выніку работы якой былі намечаны канкрэтныя планы на 2022 год.

«Мы спадзяёмся, што гэта работа дазволіць выйсці на правядзенне сустрэч на самым высокім узроўні і нам удасца правесці эканамічны форум ў рамках дзявятага пасяджэння беларуска-венесуэльскай камісіі высокага ўзроўню. Мы з аптымізмам глядзім на магчымасць сустрэчы кіраўнікоў краін у гэтым жа годзе, — сказаў пасол. — Важным момантам для нас з’яўляецца стварэнне рабочай групы паміж парламентамі. Гэта яшчэ адзін крок да ўзмацнення нашага ўзаемадзеяння на палітычным фронце». 

Каментарый у тэму

Сяргей Клішэвіч, дэпутат Палаты прадстаўнікоў, член Пастаяннай камісіі па адукацыі, культуры і навуцы: «Аднаўленне работы і стварэнне ў нашых парламентах групы сяброўства будзе добрым задзелам для актывізацыі адносін не толькі ў палітычнай плоскасці, але і ў гуманітарнай, эканамічнай. Безумоўна, палітыка ўплывае на прыняцце і сацыяльна-эканамічных ініцыятыў, што зараз вельмі важна ў жорсткім свеце, дзе развязана геапалітычная барацьба. Венесуэла — наш палітычны саюзнік на амерыканскім кантыненце. Таму для нас сёння вельмі важна такія кантакты аднавіць і далей палітычна падтрымліваць адзін аднаго, як мы гэта робім на новым узроўні».

Марыя ДАДАЛКА