Накладам 2000 экзэмпляраў у Выдавецкім доме «Звязда» пабачыў свет «Тлумачальны слоўнік беларускай мовы для школьнікаў». Укладальнікі — дасведчаныя мовазнаўцы кандыдат філалагічных навук, дырэктар Інстытут мовазнаўства імя Якуба Коласа Цэнтра даследаванняў беларускай культуры, мовы і літаратуры Нацыянальнай акадэміі навук Беларусі І. Л. Капылоў, кандыдат філалагічных навук С. Я. Рапацэвіч. У слоўніку даецца тлумачэнне звыш 8000 найбольш ужывальных у школьнай практыцы і найбольш складаных для разумення слоў і ўстойлівых выразаў. Кніга адрасуецца навучэнцам сярэдніх агульнаадукацыйных школ і спецыяльных навучальных устаноў, а таксама тым, хто цікавіцца значэннем і правільным ужываннем беларускай лексікі.
Слоўнік змяшчае кніжную лексіку, лексіку народных гаворак, устойлівыя выразы, тэрміны з розных галін ведаў, якія сустракаюцца ў школьнай практыцы, а таксама словы, што выйшлі з актыўнага ўжытку ў сучаснай беларускай літаратурнай мове, але выкарыстоўваюцца ў творах беларускіх пісьменнікаў, — патлумачвае характар выдання Ігар Лявонцьевіч Капылоў. — У кнігу ўключана вялікая колькасць слоў, што актывізаваліся ў апошнія гады: рэлігійная лексіка, сацыяльна-палітычная і эканамічная тэрміналогія, тэрміналогія інфармацыйных тэхналогій. Пры тлумачэнні мнагазначных слоў прыводзяцца тыя значэнні, з якімі найбольш часта сутыкаюцца вучні пры знаёмстве з вучэбнай і мастацкай літаратурай.
Выпуск выдання ажыццёўлены па заказе і пры фінансавай падтрымцы Міністэрства інфармацыі Рэспублікі Беларусь.
Гэты кніжны праект — толькі адна з навінак у галіне мовазнаўства, якімі мы зараз апякуемся, — каменціруе навіну загадчык кніжнай групы Выдавецкага дома «Звязда» Наталля Шчарбакова. — Збіраемся ў бліжэйшы час падрыхтаваць з Інстытутам мовазнаўства імя Якуба Коласа Нацыянальнай акадэміі навук Беларусі і іншыя кніжныя выданні, адрасаваныя агульнаадукацыйнай школе.
«Тлумачальны слоўнік беларускай мовы для школьнікаў» можна набыць у «Акадэмкнізе» па адрасе: Мінск, праспект Незалежнасці, 72, у сетцы крам ААТ «Белкніга» альбо непасрэдна ў Выдавецкім доме «Звязда» па адрасе: Мінск, вуліца Захарава, 19, тэл. + 375 29 329 38 34.
Мікола БЕРЛЕЖ
Прэв’ю: pexels.com
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
