Вы тут

Купалаўскі год у Печышчах


Повязь народнага песняра Беларусі Янкі Купалы з Татарстанам — асобная тэма ў гісторыі беларуска-расійскага літаратурнага і культурнага пабрацімства. Пра гэта нагадваюць і падзеі сёлетняга года, калі мы адзначаем 140-годдзе з дня нараджэння Янкі Купалы. 


Яшчэ 2 красавіка ў Дзень яднання народаў Беларусі і Расіі музей класіка беларускай літаратуры ў Печышчах, які месціцца непадалёку ад Казані, прэзентаваў у Доме Дружбы народаў Рэспублікі Татарстан адмысловую выстаўку мастацкіх прац юных мастакоў Расіі «Па Купалаўскіх старонках». Хлопчыкі і дзяўчынкі з усіх куткоў Расійскай Федэрацыі прадставілі мастацкі плён музейнага праекта «Чытаем Купалу разам». 

На выявах — уражанні юных мастакоў ад знаёмства з вершамі «Спадчына», «Хлопчык і лётчык», «Мужык», «Явар і каліна», з п’есай «Паўлінка», іншымі творамі народнага песняра. «Песняй вясны лебядзінаю,/ Скінуўшы зімнія чары,/ Шэпчуцца явар з калінаю/ Ў сумнай даліне над ярам./ Лісцікі зеляняй хваляцца/ Небу панятлівай мовай,/ Росамі мыюцца раніцай,/ Песцяцца сонцам паўднёвым...» Каб пачуць і па-мастацку перадаць з дапамогай фарбаў гэты паэтычны стан, трэба ўнікліва ўгледзецца ў напісанае Купалам, што і зрабілі школьнікі Расіі. 

Цяпер выстаўка працуе ўжо ў самім музеі Янкі Купалы ў сяле Печышчы. Сюды яна пераехала 21 мая. 

— Наведвальнікі нашага ўнікальнага і для Татарстана і для ўсёй Расійскай Федэрацыі музея беларускага класіка змогуць знаёміцца з працамі юных матскоў да 1 верасня, — расказвае дырэктар музея, добры сябар Беларусі Рыма Абызава. — Дарэчы, сёлетні год пазначаны ў нашай краіне як Год народнага мастацтва і нематэрыяльнай культурнай спадчыны Расіі. У музей на адкрыццё выстаўкі мы запрасілі навучэнцаў мастацкага аддзялення Дзіцячай школы мастацтваў Верхнеўслонскага раёна. Дзеці змаглі не толькі пазнаёміцца з працамі сваіх равеснікаў, але ўбачылі і свае творы на выстаўцы пераможцаў усерасійскага праекта. Заўважу, што гэта не адзінае наша мерапрыемства да 140-годдзя Янкі Купалы. 25 чэрвеня правядзём сустрэчу пад назвай «Пясняр зямлі беларускай» — са святочным канцэртам і адкрыццём бронзавай мемарыяльнай дошкі ў памяць пра наведванне нашай старонкі Купалам, пра тое, як шчыра паставіліся нашы прашчуры да паэта, які патрапіў у Татарстан у эвакуацыю, калі яго родны край тапталі боты фашысцкіх катаў. А напрыканцы жніўня правядзём вялікае свята паэзіі «Янка Купала ў дыялогу культур», да ўдзелу ў якім спрычыняцца ФНКА «Беларусы Расіі», розныя рэгіянальныя аддзяленні гэтай грамадскай арганізацыі, Саюз пісьменнікаў Беларусі, Дзяржаўны літаратурны музей Янкі Купалы ў Мінску. 

Рыма Абызава — часты госць у Беларусі, часты госць у мінскім Купалаўскім музеі. І зараз яна асабіста робіць усё магчымае дзеля захавання ў Татарстане памяці пра вялікага сына зямлі беларускай. Варта нагадаць, што ў апошнія гады шмат намаганняў да новых пераўвасабленняў паэзіі Янкі Купалы на татарскую мову зрабіў лаўрэат Дзяржаўнай прэміі Расійскай Федэрацыі, народны паэт Татарстана Рэнат Харыс. 

Кастусь ХАДЫКА

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

РАК. У першай палове тыдня будзеце актыўна вучыцца новаму і размаўляць з людзьмі. У сярэдзіне тыдня можа змяніцца настрой, з'явіцца дакладнае разуменне сваіх мэт.

Калейдаскоп

«I гэты чалавек застаўся жыць...» Медыкі ў беларускай літаратуры. Тэст

«I гэты чалавек застаўся жыць...» Медыкі ў беларускай літаратуры. Тэст

Кожную трэцюю нядзелю червеня адзначаецца Дзень медыцынскага работніка.