У дні правядзення XXІ Нацыянальнага фестывалю беларускай песні і паэзіі «Маладзечна-2022» 10 і 11 чэрвеня гледачоў сацыякультурнага тэлеканала чакаюць прэм'еры, шэраг рэпартажаў і інтэрв'ю, а наведвальнікаў культурнага форуму — тэматычныя сустрэчы з творчай групай «Беларусь 3». Сёння ўвечары глядзіце прамую трансляцыю ўрачыстага адкрыцця, а заўтра ў вячэрнім эфіры тэлегледачы змогуць убачыць гала-канцэрт закрыцця фэсту «Настальгічны дывертысмент».
Як паведамляе афіша фэстывалю, у час урачыстага адкрыцця адбудзецца ўзнагароджанне лаўрэатаў Нацыянальнага конкурсу маладых выканаўцаў беларускай эстраднай песні, а пасля ўвазе аўдыторыі будзе прадстаўлена канцэртная праграма «ХХІ — адлік новага часу. Пачатак» у выкананні заслужанага калектыву Рэспублікі Беларусь «Нацыянальны акадэмічны канцэртны аркестр Беларусі». Мастацкі кіраўнік і галоўны дырыжор — Максім Расоха. Удзел у мерапрыемстве таксама возьме шэраг вядомых беларускіх артыстаў, сярод якіх Вікторыя Алешка, Ірына Дарафеева, Дзмітрый Карачоўскі, Наталля Тамела, Беларускі дзяржаўны ансамбль «Песняры» і лаўрэаты Нацыянальнага конкурсу маладых выканаўцаў эстраднай песні.
А на наступны дзень на канцэрце закрыцця фестывалю запланаваны выступленні Нацыянальнага акадэмічнага народнага аркестра Беларусі імя І. Жыновіча з праграмай «Песні вяртаюцца», ансамбля «Сябры», гурта «Аўра», ансамбля «Чараўніцы», артыстаў Алены Ланской, Аляксандра Саладухі, фольк-бэнду «Неруш» і іншых. Выступіць тут і пераможца шоу «Х-Фактар. Беларусь» Андрэй Панісаў. Таму плануйце свае вечары з разлікам усё ж не прапусціць прамыя трансляцыі Нацыянальнага фестывалю беларускай песні і паэзіі «Маладзечна-2022» і атрымаць асалоду ад сустрэчы з любімымі выканаўцамі.
Насычаныя фестывальныя дні «Беларусь 3» правядзе разам з жыхарамі і гасцямі Маладзечна. У праграме культурнага форуму — адразу некалькі актыўнасцяў, падрыхтаваных тэлеканалам. Так, сёння на вялікім экране кінатэатра «Радзіма» — паказ дакументальнай стужкі «Імправізацыя», прысвечанай памяці Міхаіла Фінберга — стваральніка і ідэйнага натхняльніка фестывалю ў Маладзечне. Як адзначыла сцэнарыст фільма Надзея Габец, у ходзе яго падрыхтоўкі каманда тэлеканала сабрала мноства жывых успамінаў: 17 інтэрв'ю, 700 хвілін — іх хапіла б на паўнавартасны цыкл фільмаў!
У мясцовым Палацы культуры ў фестывальныя дні можна будзе ўбачыць фотавыставу, прысвечаную эпізодам стварэння тэлепраекта «Жывая спадчына», лаўрэата прафесійнай прэміі «Тэлевяршыня-2022».
У суботу, 11 чэрвеня, таксама на базе культурнай установы ў 14.00 (з нагоды 10-годдзя музычна-пазнавальнага праекта «Наперад у мінулае») адбудзецца творчая сустрэча з яго аўтарамі. Першы юбілей праграмы, якая ў вандроўках па ўсёй краіне пры дапамозе фальклорных калектываў і прафесійных музыкаў стварае аўдыятэку народных беларускіх песень у сучаснай аранжыроўцы, адзначаецца выхадам пяцісотай кампазіцыі. Яна прагучыць упершыню, у жывым выкананні і ў сяброўскім коле на сустрэчы з вядучай праграмы Аксанай Вечар і рэжысёрам Анатолем Вечарам, аранжыроўшчыкамі і народнымі калектывамі. Спецыяльныя госці — заслужаныя артысткі Рэспублікі Беларусь Наталля Тамела і Алена Ланская.
А самыя яскравыя моманты фестывальных дзён, рэпартажы з тэматычных пляцовак, сустрэчы з удзельнікамі і гасцямі прапануюць гледачам тэлеканала «Беларусь 3» карэспандэнты праграмы «Навіны культуры».
Алена ДРАПКО
Мерапрыемства праводзіцца на добраахвотнай аснове.
Не выявіць ні секунды абыякавасці.
