Лукашэнка: Беларусь памятае ўсіх герояў і бязвінных ахвяр вайны

Паважаныя суайчыннікі!

Сёння мы ўспамінаем журботную дату. Восемдзесят адзін год таму цёплая, сонечная нядзельная раніца 22 чэрвеня для мільёнаў савецкіх грамадзян у адно імгненне абярнулася жахамі бамбёжак, бязлітасным знішчэннем мірных жыхароў і бясконцым болем. Размах фашысцкага тэрору быў такі, што мы да гэтага часу не ведаем дакладнай колькасці страт.

Больш як год Генеральная пракуратура расследуе справу аб генацыдзе беларускага народа, выкрываючы ўсё новыя і новыя месцы масавых пахаванняў людзей — расстраляных, павешаных, спаленых жывымі.

Многім на Захадзе хацелася б забыцца пра зверствы, якія чынілі іх бацькі і дзяды на нашай зямлі. Яны ўжо перапісалі гісторыю вайны ў сваіх падручніках, аддалі забыццю вялікі подзвіг савецкага салдата, які крывёй заплаціў за свабоду і жыццё народаў Еўропы. Цяпер замахнуліся на нашу гістарычную памяць.

Але мы ведаем: набат праўды праб'ецца скрозь сцяну маўчання і хлусні. Злачынствам нацыстаў на беларускай зямлі будзе дадзена належная прававая ацэнка, а вынікі расследавання — прадстаўлены сусветнай супольнасці.

Беларусь памятае ўсіх герояў і бязвінных ахвяр той вайны. Памятае яна і імёны тых, хто супрацоўнічаў з ваеннымі злачынцамі і ўдзельнічаў у крывавых расправах з насельніцтвам.

Мы зробім усё, каб нашы дзеці і ўнукі захоўвалі гэтую памяць як залог адзінства нацыі і мірнай будучыні дзяржавы.

У Дзень усенароднай памяці ахвяр Вялікай Айчыннай вайны і генацыду беларускага народа мы, беларусы, схіляем галовы перад свяшчэнным подзвігам пераможцаў, якія вызвалілі свет ад нацызму, і ўзвышаем свой голас у абарону гістарычнай праўды і справядлівасці.

Прэзідэнт Рэспублікі Беларусь Аляксандр Лукашэнка

22 чэрвеня 2022 года

Прэв’ю: БелТА