Услаўляючы гармонію ў мастацтве. Выставу Альгерда Малішэўскага прадставяць у Мінску

Выставачны праект Беларускага саюза мастакоў «Альгерд Малішэўскі. Эпоха», прысвечаны 100-годдзю з дня нараджэння вядомага мастака і педагога, прадставяць 7 ліпеня ў Палацы мастацтваў, паведамляе БелТА са спасылкай на першага намесніка старшыні Беларускага саюза мастакоў мастацтвазнавец Наталлю Шаранговіч.

У экспазіцыі — карціны заслужанага мастака Беларусі, ветэрана вайны Альгерда Малішэўскага з калекцыі Беларускага саюза мастакоў і сямейнага збору Эліны Малішэўскай.

«Альгерд Малішэўскі быў майстрам экспрэсіўнай, вобразнай сюжэтна-тэматычнай карціны, цудоўным каларыстам, які таленавіта і віртуозна валодаў фарбамі на палатне. Ён лічыў жывапіс не проста намаляванай карцінай, а эмацыянальным арганізмам, праз які свет успрымаецца жывым і непасрэдным. Яго творчы ўздым прыпаў на 1960-я гады, якія сталі пераломнымі для нашага мастацтва, бо гэта перыяд зараджэння новых форм пластычнай мовы. Пошук па колеры, фактуры, рытме, святле — адзін з прынцыпаў усяго творчага шляху Альгерда Малішэўскага, які стаў асновай яго творчай дзейнасці», — сказала Наталля Шаранговіч.

Большую частку выставы складуць работы яго вучняў з вучылішча імя А.Глебава, дзе майстар выкладаў з 1953 па 1981 год. Сярод іх Зоя Літвінава, Святлана Каткова, Георгій Скрыпнічэнка, Мікалай Селяшчук, Алег Маціевіч, Уладзімір Гардзенка, Міхаіл Рагалевіч, Васіль Сумараў, Уладзімір Уродніч, Мікалай Апіёк, Уладзімір Зінкевіч, Мікалай Цудзік, Мікалай і Марыя Ісаёнкі, Сяргей Малішэўскі, Генадзь Козел, Уладзіслаў Куфко, Алег Назаранка і многія іншыя.

«Немагчыма сабраць і прадставіць усіх вучняў майстра на адной выставе, але нават пры гэтым, далёка не поўным коле мастакоў, якія сёння ўжо з’яўляюцца вядомымі майстрамі ў Беларусі, можна гаварыць аб несумненным педагагічным таленце Альгерда Малішэўскага. Аб эпосе яго вялікага ўплыву на моладзь у перыяд яе выхавання, фарміравання як асоб і мастакоў», — адзначыла Наталля Шаранговіч.

Альгерд Малішэўскі любіў жывапіс: французскіх імпрэсіяністаў, барбізонцаў, Паала Веранезе, Тыцыяна Вячэліа, Эль Грэка, Ван Гога, Канстанціна Каровіна, і асабліва Поля Сезана. Ён лічыў іх эталонам для кожнага мастака.

«Нягледзячы на ваенную маладосць, майстар услаўляў гармонію ў мастацтве, радасць чалавечага быцця ў пейзажах і нацюрмортах. Мастак шукае ў іх адказы на хвалюючыя пытанні: што ён за чалавек, як звязаны з рэчаіснасцю і навакольным асяроддзем. Нават банальныя сцэны з аператарамі МТЗ, будаўнікамі Чыжоўкі, партрэты прарабаў, урачоў і нафтавікоў ён ператварыў у феерверк фарбаў. Але галоўнае, што гучыць у палотнах Альгерда Малішэўскага, — уся нястрымнасць душы жывапісца, пакланенне перад родным краем і яго людзьмі», — сказала на заканчэнне мастацтвазнавец.

Альгерд Малішэўскі (1922-1989) нарадзіўся ў Бабруйску. Быў удзельнікам Вялікай Айчыннай вайны. У 1952 годзе скончыў факультэт жывапісу Харкаўскага мастацкага інстытута. З’яўляецца ўдзельнікам мастацкіх выстаў з 1956 года, членам Беларускага саюза мастакоў з 1965 года. Атрымаў званне заслужанага мастака БССР у 1977 годзе. Яго работы захоўваюцца ў Нацыянальным мастацкім музеі Рэспублікі Беларусь, Нацыянальным цэнтры сучасных мастацтваў, фондах Беларускага саюза мастакоў.

Выстава «Альгерд Малішэўскі. Эпоха» падрыхтавана пры падтрымцы Мінскага дзяржаўнага мастацкага каледжа імя А.Глебава.

Прэв’ю: БелТА