У Полацку 12 верасня стартавала рэспубліканская акцыя «Сімвал адзінства», прымеркаваная да Дня народнага адзінства. Яе арганізатарамі выступілі Рэспубліканскае грамадскае аб’яднанне «Патрыёты Беларусі» і Федэрацыя прафсаюзаў Беларусі. Усяго ўдзельнікі акцыі на аўтамабілях наведаюць 118 райцэнтраў краіны і праедуць звыш 7 тысяч кіламетраў.
Адпраўной кропкай акцыі старажытны Полацк быў абраны невыпадкова: менавіта на гэтай тэрыторыі зараджалася наша дзяржаўнасць. Старт аўтапрабегу на Кургане бессмяротнасці, дзе сабрана зямля з усіх брацкіх магіл Беларусі, даў полацкі заслужаны тэатр «Пілігрым» спектаклем на ваенную тэматыку. Падчас дзеяння ўдзельнікаў мерапрыемства знаёмілі з гісторыяй вызвалення горада ад нямецка-фашысцкіх захопнікаў — толькі 4 ліпеня 1944 года Полаччына стала свабоднай, больш 20 гадоў спатрэбілася, каб узняць горад з руін. Адсюль удзельнікі акцыі ўзялі першую дэталь сімвалічнага гадзінніка памяці, які складуць у адно цэлае на апошняй станцыі мерапрыемства.
«Дэталі гадзінніка абраны злучным звяном невыпадкова — гэта сімвал таго, што ўсе вобласці і мы, беларусы, — частка адзінага механізму і існаваць асобна не можам», — падкрэсліла старшыня Віцебскай абласной арганізацыі РГА «Патрыёты Беларусі» Вольга Мацюсь.
На ўсім шляху — звыш 7 тысяч кіламетраў — патрыёты будуць устанаўліваць банэры, прымеркаваныя да Года гістарычнай памяці, і шыльды з QR-кадамі на брацкіх пахаваннях і месцах спаленых вёсак. З дапамогай смартфона любы жадаючы зможа не толькі азнаёміцца з гісторыяй воінскага мемарыяла, але і паслухаць успаміны жывых сведкаў страшных ваенных ліхалеццяў — удзельнікаў Вялікай Айчыннай. Яшчэ арганізатары плануюць збіраць грамадзянскія ініцыятывы і прапановы па паляпшэнню ўзроўню жыцця населеных пунктаў. Па словах намесніка старшыні РГА «Патрыёты Беларусі» Ганны Харуты, не менш важнай задачай падчас работы з насельніцтвам з’яўляецца зладжаная работа паміж грамадскімі аб’яднаннямі. Моладзевыя ініцыятывы перададуць БРСМ, пытанні сям’і — Беларускаму саюзу жанчын. Гэта яшчэ адзін паказчык адзінства, нават у межах такога ўзаемадзеяння.
У райцэнтрах, якія будуць прымаць эстафету акцыі, пройдуць святочныя канцэрты з удзелам беларускіх артыстаў пры падтрымцы Міністэрства культуры Рэспублікі Беларусь. На іх будуць запрошаны ветраны вайны і працы, актывісты грамадскіх арганізацый і працаўнікі.
У маршруце калоны, у складзе якой 42 аўтамабілі, — Полацк, Наваполацк, Браслаў, Верхнядзвінск, Расоны, Мёры. Рэспубліканская акцыя робіць патрыятычныя прыпынкі ў Шаркаўшчыне, Паставах, Глыбокім, Докшыцах, Лепелі. Пазней да ўдзельнікаў «Сімвала адзінства» далучацца жыхары Гродзенскай, Брэсцкай, Гомельскай, Магілёўскай і Мінскай абласцей. Фінал акцыі пройдзе 10-11 снежня ў Мінску.
Надыходзячы Дзень народнага адзінства будзе адзначацца ў нашай краіне ў другі раз. Ідэя яго ўстанаўлення прагучала ў лютым мінулага года на VI Усебеларускім народным сходзе. Прэзідэнт падтрымаў ініцыятыву і падпісаў 7 чэрвеня 2021 года ўказ аб заснаванні новага дзяржаўнага свята. Сёлета, у Год гістарычнай памяці, яно абяцае быць яшчэ больш маштабным і насычаным.
Аляксандра ГВОЗДЗЕВА
Фота БелТА
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».
