Вы тут

Да кітайскай касмічнай станцыі стартуе новы экіпаж


Касманаўты Фэй Цзюньлун, Дэн Цінмін і Чжан Лу сёння накіруюцца на Нацыянальную арбітальную станцыю КНР «Цяньгун» у складзе місіі касмічнага карабля «Шэньчжоў-15». Аб гэтым паведаміла Канцылярыя праграмы пілатуемай касманаўтыкі Кітая (CMSА), перадае «Жэньмінь жыбаа» анлайн».


«Фэй Цзюньлун будзе выконваць абавязкі камандзіра карабля», — адзначаецца ў паведамленні CMSА. Касмічны карабель з тайканаўтамі на борце будзе запушчаны да станцыі з дапамогай ракеты-носьбіта «Чанчжэн-2F» са стартавай пляцоўкі касмадрома Цзюцюань, што на паўночным захадзе Кітая, у 23.08 па пекінскім часе (18.08 па мінскім часе).

У рамках гэтай місіі ўпершыню ў гісторыі кітайскай касманаўтыкі будзе праведзена ратацыя экіпажаў на арбітальнай станцыі. Некаторы час на «Цяньгун» будуць адначасова знаходзіцца шэсць чалавек, пасля чаго экіпаж місіі «Шэньчжоў-14» (Чэнь Дун, Лю Ян і Цай Цзючжэ), які працаваў на станцыі з чэрвеня гэтага года, пакіне яе і вернецца на Зямлю.

Плануецца, што новы экіпаж прабудзе на станцыі шэсць месяцаў. Для Фэя Цзюньлуна гэта місія стане другой у кар’еры тайканаўта — у 2005 годзе ён выконваў абавязкі камандзіра карабля місіі «Шэньчжоў-6», у рамках якой упершыню ў гісторыі кітайскай касманаўтыкі быў здзейснены палёт двух тайканаўтаў на арбіту і другі пілатуемы палёт, у цэлым. Два іншыя члены экіпажа адправяцца ў космас упершыню. Аб гэтым паведаміў памочнік начальніка CMSА Цзі Цымін.

Цяпер «Цяньгун» знаходзіцца на этапе будаўніцтва, пасля яго завяршэння ў канцы гэтага года пачнецца паўнацэнная эксплуатацыя арбітальнай лабараторыі. Станцыя складаецца з базавага модуля «Цяньхэ» і двух прыстыкаваных да яго па абодвух баках модуляў — «Мэньцяня» і «Вэньцяня», якія будуць выкарыстоўвацца для правядзення навуковых даследаванняў і эксперыментаў ва ўмовах бязважкасці.

Агульная вага станцыі «Цяньгун», якая будзе знаходзіцца на вышыні 400 кіламетраў, пасля завяршэння яе будаўніцтва складзе каля 90 тон. Яна будзе ў пяць разоў меншая за Міжнародную касмічную станцыю і будзе здольная на пастаяннай аснове прымаць трох членаў экіпажа (і да шасці пры змене экіпажаў). Тэрмін эксплуатацыі кітайскай касмічнай станцыі складае каля 10 год.

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».