Прыток прамых замежных інвестыцый у Кітай перавысіў трыльён юаняў

Цягам студзеня-лістапада аб’ём фактычна выкарыстаных прамых замежных інвестыцый (ПЗІ) у кантынентальнай частцы Кітая ўзрос на 9,9 працэнта ў гадавым вылічэнні і склаў амаль 1,16 трыльёна юаняў. Аб гэтым паведамілі ў Міністэрстве камерцыі КНР, перадае «Жэньмінь жыбаа» анлайн».

Паводле дадзеных міністэрства, прыток ПЗІ ў сферу паслуг павялічыўся на 0,9 працэнта — да 842,6 млрд. юаняў, у той час як у высокатэхналагічных галінах ён узрос на 31,1 працэнта ў параўнанні з адпаведным перыядам летась.

У прыватнасці, прыток прамых замежных інвестыцый у высокатэхналагічную вытворчасць павялічыўся на 58,8 працэнта, у той час як у сектары высокатэхналагічных паслуг паказчык узрос на 23,5 працэнта. За гэты перыяд інвестыцыі з Рэспублікі Карэя, Германіі, Вялікабрытаніі і Японіі ўзраслі адпаведна на 122,1 працэнта, 52,6 працэнта, 33,1 працэнта і 26,6 працэнта.

У студзені-лістападзе прыток ПЗІ ва ўсходнія, цэнтральныя і заходнія рэгіёны Кітая павялічыўся адпаведна на 7,7 працэнта, 28,6 працэнта і 24,6 працэнта.